Elisaeʼ u testigo Jéeoba, letiʼeʼ táan kaʼach u tsʼáaik xook tiʼ juntúul koʼolel. Le táan u xookoʼoboʼ kʼuch juntúul sacerdote yéetel u yatan. Letiʼeʼ tu yojéelteʼ maʼ úuch kíimik u hijoʼobiʼ.

 Le sacerdote yéetel u yatanoʼ káaj u yokʼoloʼob le ka tu yaʼalaj Elisa yaachajaʼan u yóol yoʼolal le baʼax úuchoʼ. Le sacerdote túunoʼ tu yaʼalaj: «¡Maʼ tin naʼatik baʼaxten Dioseʼ tu chaʼaj u yúuchul lelaʼ! ¿Bix táabik u luʼsten in juntúuliliʼ hijo? Tsʼoʼok 28 años káajak in meyajtik yéetel in beetik baʼaloʼob maʼalobtak, ¿bey wa túun u boʼotiktenaʼ?».

 Elisaeʼ tu tsolajtiʼobeʼ maʼ Dios beet u kíimil u hijoʼobiʼ. Tʼaanajoʼob xan tiʼ u kuxtal Jesús tu kʼuboʼ, u kaʼa kuxkíintaʼal le kimenoʼoboʼ yéetel baʼaxten ku chaʼik Dios u yúuchul baʼaloʼob kʼaastak. Le sacerdote yéetel u yatanoʼ tu yaʼaloʼob tiʼ Elisaeʼ jach letiʼe baʼax taak u yojéeltikoʼoboʼ yéetel jach letiʼe baʼax táan u kʼáatkoʼob tiʼ Diosoʼ.

 Ka máan junpʼéel semanaeʼ le sacerdote yéetel u yatanoʼ suunajoʼob tu yotoch le koʼolel ku xook yéetel Elisaoʼ. Letiʼobeʼ táan kaʼach u xokikoʼob le jaats «Le k-láakʼtsiloʼob yéetel k-amigoʼob kimenoʼoboʼ yaan u kaʼa kuxtaloʼob» teʼ libro ¿Baʼax jach tu jaajil ku kaʼansik le Bibliaoʼ? Le sacerdote yéetel u yatanoʼ jach táakpajoʼob teʼ xookoʼ.

 Ka máan kʼiineʼ le sacerdote yéetel u yatanoʼ binoʼob tiʼ junpʼéel asamblea beetaʼab tumen u testigoʼob Jéeoba tu kaajil Tiflis (Georgia). Letiʼobeʼ jach jatsʼuts úuchik u yilkoʼob bix u yaabiltmiluba le sukuʼunoʼoboʼ. Jach bey u kʼáatoʼob kaʼach ka u bisuba le máaxoʼob yanoʼob tu religiónoʼoboʼ, chéen baʼaleʼ maʼ bey u biskubaʼobiʼ.