LECCIÓN 8
¿Xhi ní rsan Dios nuʼ ni ná mal ne rzaknu galzí?
1. ¿Xha guk briká ni ná mal?
Tiemp ni Kasan Dios kanabee de bniety guixliú rliuʼ dek laadeb kɨt ruyntideb gan izikadeb irate de galnagán ni nuʼ lo Guixliú.
Ni ná mal brika lo Guixliú chi bendxáb bní primer dixhiú. Laab gukba tuby ángl zák ne sin duld, per «gady chúuti dxi sutipnéb didxldí» (Juan 8:44). Biú xhgab laʼn kiab dek guyn de bniety adorar laab, adoración ni soltiz Dios rial. Kun tuby dixhiú, bendxáb bkilba Eva, primer gunaa, par ikuadiág xhtidxba kɨt xhtidxti Dios. Adán guʼ xhlad chielni ne iroptedeb kɨt bkuadiagtideb xhtidx Dios. Ni beindeb nadxáb gukni, pur nii nuʼ galzí ne galguty. Bily Génesis 3:1-6, 19.
Chi bendxáb repy Eva dek kɨt ikuadiagtib xhtidx Dios, chik guaʼzba kontr Dios. Zik bliuʼ bendxáb dek kɨt beintib aceptar dek Dios ná ni napak par inabee irate. Zien de bniety lo guixliú nuʼ xhlad bendxáb zik rliuʼdeb dek kɨt rkaztideb ikuadiagdeb xhtidx Dios, pur nii bendxáb ná «ni rnabee lo guɨchliuré». Bily Juan 14:30 ne 1 Juan 5:19.
2. ¿Á nuʼ xhi beinliedx lo irate ni beinché Dios?
Ni beinché Dios kɨt xhi beinliextini. De primer bniety guixliú ne de ángl nialeʼ nikuadiagdeb irate ni rní Dios (Deuteronomio 32:4, 5). Dios bnidxni libertá dunún par kuenu lo ni ná güen ne ni ná mal. Libertá reʼ ruyn rkuadiagnu xhtidx Dios pur ni rkáznu laani. Bily Santiago 1:13-15 ne 1 Juan 5:3.
3. ¿Xhi ní kasan Dios nuʼ galzí?
Jehová kasan dek bendxáb ne de bniety guixliú guaʼz kontr laani pur duxhzi tiémp. ¿Xhi ni bein Dios zik? Par iliuʼni dek nik tuby galrnabee xhte lo guixliú reʼ zeleʼ gakné de bniety guixliú (Eclesiastés 7:29; 8:9). Aguk xop mil iz ni kanabee de bniety guixliú, per kɨt ruyntideb gan izikadeb de bniety mal, guerr ne galguidx. Bily Jeremías 10:23 ne Romanos 9:17.
Bel izannu dek Dios inabee dunún, zuynleʼni dunún ne zapnuʼ zien galnazák (Isaías 48:17, 18). Zedial, Jehová initló de galrnabee xhte de bniety guixliú. Soltiz ibáin de bniety ni guyn ne ikuadiág ni rní Galrnabee xhtenni (Isaías 11:9). Bily Daniel 2:44.
Bguie videu ¿Xhi ní rsan Dios nuʼ galzí?
4. ¿Xhi oportunidá rnidx paciency xhte Dios dunún?
Bendxáb rní dek de bniety ruyndeb servir Dios pur ni nuʼ xhi rdedni laadeb. Xhtios paciency ni rap Dios dunún, zeleʼ iliuʼnu kun galnabáin xhtennu dek bendxáb rní dixhiú ne nuʼnu xhlad Galrnabee xhte Dios kɨt xhlad galrnabee xhte de bniety guixliú. Bily Job 1:8-12 ne Proverbios 27:11.
5. ¿Xha chuʼn xhlad Dios?
Kun ni ruynnu lo galnabáin, xhtennu rliuʼnu a rkaznu o kɨt rkaznu inabee Dios dunún.
Nadoote, na par gakbezaknu xha rkaz Dios guynnu adorar laani ne zuló guynnu lo galnabáin xhtennu zik ni rliuʼ religión ni ná didxlí, nde rliuʼ ni rní lo xhtidx Dios (Juan 4:23). Ne, bel chonalnu ejémpl xhte Jesús dek kɨt nati par ininu tu rial inabee ladxnu nikza chon lo de guerr, zik rliuʼnu dek kɨt nuʼtinu xhlad galrnabee xhte bendxáb. Bily Juan 17:14.
Bendxáb rkil de bniety par ibaindxabdeb ne guyndeb ni kɨt riulaaz Dios. Chi kɨt ruynnu zik, nuʼ de saʼn ne de xhamigunu ruyndeb burl dunún ne ruyndeb dek galnabáin xhtennu rak mazruʼ nagán (1 Pedro 4:3, 4). Bel kazaknu zik, kilnu de saʼn ni rkáz Dios ne ikuadiagnu de leyes ni rní xhtidx Dios. Zik iliuʼnu dek dixhiú ná ni bni bendxáb dek kɨt tu rkuadiagti xhtidx Dios chi nuʼ galnagán. Bily 1 Corintios 6:9, 10 ne 15:33.
Gálrkaz ni rap Dios dunún, rliuʼpak dek zuʼ dxi Dios initló galzí ne ni ná mal. Irate de ni rliuʼ reldilaazpak Dios ne nuʼdeb xhladni, zbaindeb lo Guixliú reʼ sin kɨt chuʼti dxi gatydeb. Bily Juan 3:16.
