Ca binni ni guti ca familia stiʼ nga runi ca guendarinabadiidxaʼ riʼ, ne rúnicabe ni cadi purtiʼ si nuucabe gánnacabe xiñee, sínuque purtiʼ cuyúbicabe tu quixhedxí ladxidóʼcabe. Xcaadxi binni riníʼ nabé feu modo biiticabe stale judíu ne dede riníʼ íquecaʼ pa dxandíʼ nuu Dios la? xiñee bidii lugar guizaaca ndiʼ.

 Ni cadi dxandíʼ: Ti pecadu nga guinabadiidxanu xiñee bidii Dios lugar gúticabe stale judíu.

 Ni dxandíʼ: Stale hombre ne gunaa ni gupa fe gunabadiidxacaʼ xiñee rudii Dios lugar guizaaca cosa malu. Tobi de laacabe nga profeta Habacuc, laa gunabadiidxaʼ Dios: «¿Xiñee rudiiluʼ lugar guizaaca cosa malu ne cayuuyasiouʼ cuquiichinácabe binni nacha’hui’?» (Habacuc 1: 3, Martín Nieto, 1992). Qué nidxiichiné diʼ Jehová laabe pur ni gunabadiidxabe que, sínuque bidii lugar guicá ni lu Biblia para gacané ni laanu tiempu riʼ.

 Ni cadi dxandíʼ: Qué rizaalaʼdxiʼ Dios guʼyaʼ laanu cayuni sufrirnu.

 Ni dxandíʼ: Nanalaʼdxiʼ Dios guizaaca cosa malu ne guni sufrir binni pur laani (Proverbios 6:16-19). Ne lu Biblia ná ca dxi bibani Noé nabé gucaná ladxidóʼ Dios ora biʼyaʼ dxaʼ guendaquéiquiiñeʼ lu Guidxilayú (Génesis 6: 5, 6). Nga runi zanda chuʼnu seguru laaca nabé biuubaʼ ladxidóʼ Dios ora biʼyaʼ pabiáʼ feu modo biiticabe stale judíu dxiqué (Malaquías 3:6).

 Ni cadi dxandíʼ: Dios peʼ bidii lugar gatiʼ stale judíu.

 Ni dxandíʼ: Lu primé siglu que, bidii Dios lugar gunitilú ca binni de Roma Jerusalén (Mateo 23:37–24:2). Guca si ndiʼ, maʼ qué ñacaneruʼ Dios ti grupu de binni para gucaalú ti guidxi «purtiʼ para laabe biaʼca risaca ca judíu ne ni cadi judíu» (Romanos 10: 12, Dios habla hoy [Versión Popular]).

 Ni cadi dxandíʼ: Pa dxandíʼ nuu ti Dios ni napa poder ne ni nadxii binni, ñúnibe xiixa para cadi ñuuticabe stale judíu dxiqué.

 Ni dxandíʼ: Neca rudii Dios lugar gacaná binni cadi laapebe ruseendabe ni (Santiago 1:13; 5:11).

 Purtiʼ cadi laabe cayuni mandarbe Guidxilayú riʼ, sínuque Binidxabaʼ nga cayuni mandar, nga runi biaʼ dxi huabani binni nuu stale yuubaʼ (Lucas 4:1, 2, 6; Juan 12:31). Yanna guidúʼyanu chupa razón ni zeeda lu Biblia ni zacané laanu guiénenu xiñee qué nucueeza Dios ñuuticabe ca judíu dxiqué.

1.   Bizáʼ Dios binni para cuí xi guniné xquendanabani. Dxi bizáʼ Dios Adán ne Eva, gúdxibe laacaʼ xi ribézabe gúnicaʼ, peru qué nucaabe laacaʼ ñúnicaʼ ni nabé. Laacaʼ gucuaacaʼ decisión sticaʼ ne pur ni bíʼnicabe riʼ dede yanna cayacaná binni (Génesis 2:17; 3:6; Romanos 5:12). Dede dxiqué hasta nagasi cayuni sufrir binni pur ca decisión ni cadi jneza ni maʼ gucuaacaʼ. Libru ni láʼ (Declaración de principios del judaísmo conservador) ná: «Lu guidubi Guidxilayú nabé runi sufrir binni purtiʼ qué riquiiñecaʼ libertad maʼ bidii Dios laacaʼ jneza». Nga runi neca ñanda nucaa Dios laanu ñúninu ni nabe, qué rúnidibe ni purtiʼ cudiibe lugar cuinu xi guninenu xquendanabáninu.

2.   Ma’ cadi candaa zuni Dios xiixa pur ca judíu ni gutiʼ dxiqué. Maʼ biʼniʼ prometerbe zandísabe de lade gue’tu’ ca binni ni maʼ gutiʼ, dede ca judíu ni biiticabe que. Laaca zúnibe xiixa para maʼ cadi guietenalaʼdxiʼ binni guiráʼ ca cosa feu ni bizaaca dxiqué (Isaías 65:17; Hechos 24:15). Cumu nabé nadxii Dios binni guidxilayú la? nga rusihuinni zuni cumplirbe guiráʼ ca promesa stibe (Juan 3:16).

 Ca familia stiʼ ca judíu ni biiticabe dxiqué, tiempu riʼ maʼ nexhedxí ladxidoʼcaʼ ne maʼ nápacaʼ fe Dios. ¿Xi gucané laacabe yaʼ? Biénecabe xiñee rudii Dios lugar guizaaca cosa malu ne maʼ biziidicabe xi chiguni Dios para cuee guiráʼ ca cosa malu ni runiná binni.