Yanna ra maʼ biziidiluʼ stale cosa risaca ni rusiidiʼ Biblia, maʼ gucaneni lii gannaxhiiluʼ Dios jma. Peru naquiiñeʼ gúniluʼ stipa para cadi guiaanadxiluʼ de gannaxhiiluʼ laabe (1 Pedro 2:2). Zacaaluʼ guendanabani ni qué zaluxe pa chuʼluʼ gaxha de Jiobá ra gúʼndaluʼ Stiidxabe. Biindaʼ Juan 17:3 ne Judas 21.

Ra jma guiziidiluʼ de Dios, jma zaguidxi fe stiluʼ ne pur laani zanda gusiécheluʼ laabe (Hebreos 11:1, 6). Fe ca rucaani laanu gaca arrepentirnu ne guchaʼnu modo nabáninu. Biindaʼ Hechos 3:19.

Cumu guiranu nga riuuláʼdxinu gábinu binni xiixa diidxaʼ sicarú ni nánnanu la? zándaca ziuuláʼdxiluʼ güíneluʼ xcaadxi binni de ni maʼ biziidiluʼ. Ora jma maʼ ziziidiluʼ de lu Biblia, zánnaluʼ iquiiñeluʼ Stiidxaʼ Dios para guiníʼneluʼ binni de Jiobá ne zanda gábiluʼ laacaʼ ca diidxaʼ sicarú nápabe para binni guidxilayú. Biindaʼ Romanos 10:12-15.

Zanda guzulú guiníʼneluʼ ca binnilídxiluʼ ne ca xhamíguluʼ de ni caziidiluʼ. Ne naquiiñeʼ gácaluʼ nachaʼhuiʼ ne guni respetarluʼ laacabe. Lugar de gábiluʼ laacabe cadi jneza ni runi crécabe la? gudxi laacabe xi maʼ bizabiruaa Dios guni. Bietenalaʼdxiʼ, jma zanda gacaneluʼ laacabe pur modo nabániluʼ que pur ca diidxaʼ ni guiniʼluʼ. Biindaʼ 2 Timoteo 2:24, 25.

Ra gúʼndaluʼ Biblia zacaneni lii gaca xhamíguluʼ Jiobá ne guiziidiluʼ jma de laabe. Ne zacá nga zeeda gácaluʼ tobi de ca binnilidxi Dios. Biindaʼ 2 Corintios 6:​18.

Cadi gusaana de guiziidiluʼ cani zeeda lu Stiidxaʼ Dios (Hebreos 5:13, 14). Gunabaʼ ti testigu stiʼ Jiobá gusiidiʼ lii de Biblia ne iquiiñebe libru Xipeʼ ndiʼ cusiidiʼ Biblia. Ra jma guiziidiluʼ jma nayecheʼ zabániluʼ. Biindaʼ Salmo 1:1-3 ne 73:27, 28.

Cadi guiaandaʼ lii Jiobá nga ti Dios nayecheʼ, ne de laabe zeeda guiráʼ diidxaʼ sicarú ni cá lu Biblia ne zanda guidxíñaluʼ laabe pa guidagulisaaneluʼ ca xpínnibe ni qué rucheené laabe (Hebreos 10:24, 25). Ne pa qué gusaana de gúniluʼ ni na Jiobá né stale gana la? zacaaluʼ guendanabani ni qué zaluxe. Nga runi, ni jma galán gúniluʼ nga guidxíñaluʼ Dios. Biindaʼ Tito 1:2.