Biʼniʼ prometer Jiobá Jacob zapa laabe cásica gupa Abrahán ne Isaac. Yendeza Jacob ti lugar ni láʼ Harán. Raqué bichaganabe, gúpabe stale xiiñibe ne guizáʼ ricu gúcabe.

Ra gudiʼdiʼ tiempu, gudxi Jiobá laabe: «Bibiguetaʼ xquidxi bixhózeluʼ ne jñaaluʼ». Ngue runi biree Jacob ne familia stiʼ zecaʼ. Neza zécabe que, málasi beeda ca mozo stibe ne gúdxicaʼ laabe: «Zeeda Esaú bíʼchiluʼ ra nuunu né tapa gayuaa hombre». Bidxíbibe ñuniná Esaú laabe ne familia stibe. Ngue runi biʼniʼ orarbe Jiobá: «Bilá naa de lu náʼ bicheʼ». Sti dxi que, biseendaʼ Jacob ti regalu para Esaú, bidiibe laa stale dendxuʼ, chiva, vaca, camellu ne burru.

Gueelaʼ que, ora biaana Jacob stubi, biiyabe ti ángel. Bicaalú ángel que laabe. Bidxelasaacabe dede ra maʼ zirá gueelaʼ. Neca gucaná Jacob, qué nusaana de nudxiilú. Gudxi ángel que laabe: «Bindaa naa». Peru Jacob bicabi laabe: «Coʼ, qué zudieeʼ lugar cheluʼ dede ora uguuluʼ ndaayaʼ naa».

Últimu la? guluu ángel que ndaayaʼ Jacob. Yanna huaxa gunna Jacob qué zudii Jiobá lugar guniná Esaú laa.

Siadóʼ que, de zitu biiyaʼ Jacob zeeda Esaú ne tapa gayuaa hombre. Nagueendaca bireebe para guidxagalube Esaú, ne ora  yendabe ra nuu bizuxíbibe nezalú gadxe biaje. Bixooñeʼ Esaú ra nuu Jacob ne gudiidxi laabe. Bizulú cayuunaʼ guirópacabe ne raqué biʼniʼ chaahuicabe guendanagana gúpacabe. ¿Ñee rábiluʼ guyuulaʼdxiʼ Jiobá ni biʼniʼ Jacob la?

Despué, bibiguetaʼ Esaú ra lidxi ne Jacob biree zeʼ guidxi ra biʼniʼ mandar Jiobá laa cheʼ. Gupa Jacob 12 xiiñiʼ: Rubén, Simeón, Leví, Judá, Dan, Neftalí, Gad, Aser, Isacar, Zabulón, José ne Benjamín. Despué, biquiiñeʼ Jiobá José, tobi de ca xiiñiʼ Jacob para gulá xquidxi. ¿Ñee nápaluʼ gana gánnaluʼ ximodo bíʼnibe ni la? Guidúʼyanu ni.