Dede nahuiiniʼ Samuel guleza ndaaniʼ tabernáculo ne biʼniʼ dxiiñaʼ ndaaniʼ ni. Tabernáculo que nga ti lugar ra rié binni para guni adorar Jiobá. Ñuulaʼdxuʼ ñannuʼ xiñee guleza Samuel ndaaniʼ ni la? Para gánnanu ni, primeru guidúʼyanu historia stiʼ Ana, jñaabe.

Maʼ xadxí racalaʼdxiʼ Ana gapa ti baʼduhuiiniʼ, peru qué ganda gápabe xiiñibe. Ngue runi, biʼniʼ orarbe Jiobá ne gúdxibe laa: «Jiobá, rinabaʼ lii gacaneluʼ naa». Ne bidii stiidxabe laa: «Pa gapaʼ ti xiiñeʼ la? zudieeʼ laabe lii para cuézabe ndaaniʼ tabernáculo ne gúnibe dxiiñaʼ ndaaniʼ ni». Bicaadiaga Jiobá oración stiʼ Ana purtiʼ despué gunda gupa ti baʼduhuiiniʼ. Ne gulee lá laabe Samuel. Biʼniʼ Ana ni bidii stiidxaʼ, purtiʼ dxi napa baʼduhuiiniʼ riʼ biaʼ chonna o tapa iza, yesaanabe laa ndaaniʼ tabernáculo que para guni xhiiñaʼ Dios.

Elí nga sacerdote ni jma risaca ni runi dxiiñaʼ ndaaniʼ tabernáculo que. Guiropaʼ xiiñibe ni maʼ huaniisi laaca rúnicaʼ dxiiñaʼ raqué. Cumu ndaaniʼ tabernáculo que nga runi adorar binni Jiobá la? ngue runi, guiráʼ binni ni nabeza ndaaniʼ ni naquiiñeʼ gúnicaʼ ni jneza. Peru ruuyaʼ Samuel guiráʼ cosa malu runi ca xiiñiʼ Elí. Ñee laaca biʼniʼ Samuel guiráʼ cosa malu bíʼnicabe la? Lii xi raʼbuʼ... Coʼ, qué nusaana Samuel de ñuni ni riuulaʼdxiʼ Jiobá, casi bisiidiʼ bixhoze ne jñaa laa.

Xi naquiiñeʼ ñuni Elí yaʼ. Cadi naquiiñeʼ nulídxebe ca xiiñibe la?... ¡Ngapeʼ nga ni ñúnibe! Naquiiñeʼ nibee Elí ca xiiñiʼ ndaaniʼ tabernáculo que. Peru gastiʼ qué ñúnibe. Ngue runi, bidxiichiné Jiobá laabe ne guiropaʼ xiiñibe ne gudixhe ique guni castigar laacabe.

Ti gueelaʼ, laga nisiaasiʼ Samuel binadiaga cucaa tuuxa ridxi laa. Ne rabi laabe: «¡Samuel!». Óraque biasa guxooñeʼ Samuel zeʼ ra nuu Elí, peru Elí gudxi laabe: «Cadi naa diáʼ cucaaʼ ridxi lii». Zacaca bizaacabe xhupa biaje. Peru ra guionna biaje que gudxi Elí Samuel: «Pa gunadiaʼguʼ gucaacabe ridxi lii sti biaje la? bicabi: “Guníʼ, Jiobá. Cucaadiagaʼ lii”».  Ora guníʼ Samuel ca diidxaʼ riʼ, gudxi Jiobá laa: «Gudxi Elí chiguneʼ castigar binnilidxi pur guiráʼ cosa malu ni huayúnicaʼ». Ñee guca nagana para Samuel gabi ca diidxaʼ riʼ Elí la? Lii xi raʼbuʼ... Nanna dxíchinu guca ni nagana para laabe. Dxandipeʼ la? bidxibi Samuel niníʼ guiráʼ ni gudxi Jiobá laa gabi Elí. Peru bizuubabe stiidxaʼ Jiobá ne bíʼnibe ni na. Guca guiráʼ ni guníʼ Dios, purtiʼ despué guti Elí ne guiropaʼ xiiñiʼ.

Stale nga ni rizíʼdinu de ejemplu stiʼ Samuel. Neca biiyabe guiráʼ cosa malu ni cayuni xcaadxi binni, peru qué nusaana de ñúnibe ni riuulaʼdxiʼ Jiobá. Lii yaʼ, ñee zuʼnuʼ casi bíʼnibe la? Ñee zinanduʼ ejemplu stiʼ Samuel ne zuzuubaluʼ stiidxaʼ Jiobá la? Pa gúniluʼ ni, zusiécheluʼ Jiobá ne laaca zusiécheluʼ bixhoʼzoʼ ne jñoouʼ.