ASTROLOGÍA. Stale binni riníʼ ique pur modo nexheʼ chaahuiʼ ca estrella ca dxi gúlecaʼ zanda gánnacaʼ ximodo zaca xpídacaʼ. Nga runi, ruundacabe ca horóscopo para gánnacabe xi zazaacacabe ne xi caquiiñeʼ gúnicabe para cadi gápacabe guendanagana ne cueendúcabe ni galán lu xquendanabánicabe.

FENG SHUI. Nuu xcaadxi binni riníʼ ique para cheni laacaʼ galán lu xpídacaʼ la? caquiiñeʼ chuʼ ti stipa ni qué ridúʼyanu ra nabézacaʼ. Ti hombre ni nabeza Hong Kong láʼ Lo Wing, * guníʼ: «Gudxi ti maestru de feng shui naa, pa quixheʼ ti speju xiixa lugar ndaaniʼ tienda stinneʼ la? jma zuneʼ ganar bueltu».

RUNI ADORAR BINNI CA NI MAʼ GUTI. Nuu tu runi cré caquiiñeʼ quixhedxí tuuxa ca binnilidxi ni maʼ guti o tuuxa dios para gápacaʼ ne cuʼcaʼ ndaayaʼ laacabe. Van, ti gunaa de Vietnam, guníʼ: «Bineʼ cré pa guneʼ adorar ca binnilidxeʼ ni maʼ guti la? naa ne ca xiiñeʼ zabánidu galán yanna ne despué».

NUU TU RUNI CRÉ RALE BINNI STI BIAJE. Stale binni runi cré ora gátinu la? rálenu sti biaje ne siempre rizaaca ndiʼ. Nuu tu ná, guiráʼ cosa galán o cosa malu ni cazaaca lu xpídanu yanna la? cazaaca ca ni pur guiráʼ cosa ni bíninu lu vida ni gúpanu ante gálenu sti biaje.

Neca stale binni riníʼ ique ti creencia si guiráʼ nga la? nuu tu laa laaca riuulaʼdxiʼ guʼyaʼ xi ná horóscopo, tabla ouija^®, carta de tarot, o cueecabe suerte stiʼ..., pa málasi gacané tobi de ca cosa ca laacaʼ gánnacaʼ xi futuro cabeza laacaʼ.

¿Ñee racané guiráʼ ndiʼ binni guibani nayecheʼ yanna ne despué la?

Guidúʼyanu ni bizaaca Hào, ti hombre nabeza Vietnam. Biʼniʼ crebe astrología, feng shui ne biʼniʼ adorarbe ca binni ni maʼ guti para ganda guibánibe galán. Peru ¿xi bizaacabe yaʼ? Sicaríʼ guníʼ Hào: «Biree guniti negocio stinneʼ, guizáʼ bizaabeʼ stiʼ binni, gupaʼ stale guendanagana ndaaniʼ familia stinneʼ ne dede biʼniʼ huará guiráʼ ngue naa».

Qiuming, de Taiwán, biʼniʼ cré astrología, biʼniʼ cré rale binni sti biaje, destinu, feng shui ne biʼniʼ adorar ca binni ni maʼ guti. Peru despué de biiyaʼ chaahuibe guiráʼ ndiʼ la? guniʼbe: «Bidieeʼ cuenta cadi biaʼsi diʼ guiráʼ creencia riʼ ne ruchenda si guiráʼ costumbre riʼ binni. Maʼ bidieeʼ cuenta guizáʼ ruchee astrología. Ne ora runi cré tuuxa rale binni sti biaje la?..., bueno, pa qué gánnaluʼ xi bíʼniluʼ lu vida ni gúpaluʼ ante, ¿ximodo ndiʼ guchaaluʼ ne gúniluʼ cosa galán lu vida ni gápaluʼ despué de gáleluʼ yaʼ?».

Hào, Qiuming ne stale binni maʼ bidii cuenta qué racané destinu, astrología ne ca binni ni maʼ guti ca laanu para guibáninu nayecheʼ ne nin ca creencia ni napa binni de que ribani tuuxa despué de maʼ guti. Peru ¿ñee riníʼ ndiʼ qué zanda gúninu xiixa para guibáninu nayecheʼ la?

Stale binni runi cré para guibánicaʼ nayecheʼ la? caquiiñeʼ sacaʼ scuela roʼ o gácacaʼ ricu. Peru ¿xi runi sentir ca binni ni huayuni ndiʼ yaʼ?