Gunábacabe chigúnicabe dxiiñaʼ né stale gana guidxi Ecuador

Guzéʼtenu xi bizaaca Bruno, ti hombrehuiiniʼ Testigu de Italia. Casi bilúxebe preparatoria ne laabe nga tobi de cani jma nanna, ca binnilídxibe ne ca maestru stibe maca cayábicaʼ laabe chérube scuela roʼ, ngue runi qué guidxélabe xi gúnibe. Peru chupa chonna iza ante, dxi bidiibe laabe Jiobá, guniʼbe zúnibe xhiiñaʼ Jiobá primé lu xquendanabánibe. Yanna, xi bíʼnibe despué yaʼ. Laabe guniʼbe: «Gudxeʼ Jiobá lu ti oración zaquiiñeʼ guendanabani stinneʼ casi maʼ bidieeʼ stiidxaʼ laabe ne zuneʼ ni nabe primé lu xquendanabaneʼ. Peru laaca gudxeʼ laabe qué riuuladxeʼ guneʼ ti cosa si, sínuque guneʼ guiráʼ clase dxiiñaʼ raca ndaaniʼ xquídxibe ni gusiecheʼ naa».

 Gudiʼdiʼ si caadxi iza, yendeza Bruno Ecuador, ti guidxi nuu Sudamérica. Ximodo xa guyé ni laabe raqué yaʼ. Laabe guniʼbe: «Bidii Jiobá naa jma que ni gunabaʼ laa lu oración stinneʼ». Dxi yendabe Ecuador, nabé bidxagayaabe ora bíʼyabe nuu caadxi binni ni maʼ huaniisi raqué ni caʼruʼ guichaganáʼ, laaca yendeza ca binni que raqué para gúnicaʼ jma lu xhiiñaʼ Jiobá.

CANI CAʼRUʼ GUICHAGANÁʼ: CUDIICAʼ LUGAR IQUIIÑEʼ JIOBÁ LAACAʼ

Cásica Bruno, mil de ca xpinni Cristu ni nahuiiniʼ nuu lu guidubi Guidxilayú, cudiicaʼ lugar iquiiñeʼ Dios laacaʼ. Jiobá cayabi laacabe: «Latané guiráʼ ca chii ndaa de ni nápatu [...] ne laguuyaʼ, [...] pa qué zuxheleʼ ca compuerta stiʼ guibáʼ ne zundaateʼ ndaayaʼ stinneʼ luguiatu» (Mal. 3:10). Cumu nadxiicabe Jiobá la? rudiicabe tiempu, stipa stícabe ne cani nápacabe para gúnicabe xhiiñaʼ Reinu ndaaniʼ ti guidxi ra nabé caquiiñeʼ tu gucheeche diidxaʼ.

Ora maʼ yendácabe ra chigucheechecabe diidxaʼ, nagueendaca rudiicabe cuenta «ma stale binni cabeza si ucaa diaga stiidxa Dios. Tu güi ni nga huaxiéʼ» (Mat. 9:37). Nápanu ejemplu stiʼ Jaqueline, de Alemania, laa nabé cayecheʼ ora bicaa ra Yoo Betel stiʼ Ecuador, ca diidxaʼ riʼ: «Maʼ raca chupa iza de cucheecheʼ diidxaʼ raríʼ, ne cayuundaniáʼ trece binni Biblia, tapa de laacabe maʼ qué riaadxaʼ ra ridagulisaadu. ¡Nabé nayecheʼ nuaaʼ!» Chantal, de Canadá, guníʼ: «Lu iza 2008 bedabieeʼ ti lugar nuu gaxha de nisadóʼ stiʼ Ecuador, iza que nuu ti neza binni  ridagulisaa si raqué. Yanna maʼ nuu chonna neza binni ridagulisaa ne nuu jma de treinta precursor. ¡Nabé sicarú nga guuyaʼ modo caniisi stale binni lu stiidxaʼ Dios! Cadi tan xadxí bidxaaʼ de lugar ne yendezaʼ ti guidxi nuu lade ca dani ni láʼ los Andes, nasoo cani biaʼ 2,700 metru. Neca nabeza jma de 75,000 binni raqué, peru ti neza binni ridagulisaa si nuu lugar riʼ. Nabé sicarú modo rucaadiaga binni stiidxaʼ Dios, ne nabé riuuladxeʼ dxiiñaʼ cayuneʼ raríʼ».

BIDXIILÚCABE GUENDANAGANA GÚPACABE

Dxandíʼ riuu guendanagana ora chigucheeche tuuxa diidxaʼ sti guidxi. Nuu tiru rihuínnicani dede ante guireecabe xquídxicabe. Kayla, de Estados Unidos, guníʼ: «Guyuu xpinni Cristu ni gudxi naa cadi chaaʼ sti ladu, ne para laacaʼ jneza ngue ni caniʼcaʼ. Cadi cayénecabe xiñee rapaʼ gana gacaʼ precursora ndaaniʼ sti guidxi nuu zitu. Guyuu biaje bicaa ca diidxaʼ que naa guiníʼ iqueʼ pa jneza ngue ni rabeʼ guneʼ». Neca zaqué, guyé Kaila ra racalaʼdxiʼ. Laabe cusiénebe xi gucané laabe: «Bineʼ orar stale ne gunieniáʼ ca bendaʼ ne ca bizanaʼ ni maʼ huaniisi lu stiidxaʼ Dios, laacaʼ bisiénecaʼ naa riguu Jiobá ndaayaʼ guiráʼ tu racalaʼdxiʼ guni jma lu xhiiñabe».

Para xcaadxi xpinni Cristu la? ni raca nagana para laacaʼ nga guiziidicaʼ sti diidxaʼ. Siobhan, ti gunaa Testigu de Irlanda, guníʼ: «Nabé guyuaaʼ triste purtiʼ qué randa riniéʼ stiidxaʼ ca binni que. Bineʼ stipa para cadi guiree gana, ne gucuá iqueʼ guiziideʼ diidxaʼ que ne guxidxeʼ ora gucheeʼ». Anna, de Estonia, guníʼ: «Jma nagueenda biaaʼ guibaneʼ raqué neca nandáʼ, neca nuu stale yudé ne gazeʼ puru nisa nanda, ni jma nagana guca para naa nga guiziideʼ diidxastiá. Chupa chonna biaje guníʼ iqueʼ maʼ qué zanda diʼ. Peru jma gucuá iqueʼ pabiáʼ caziideʼ, ne qué nizaaladxeʼ paraa cucheeʼ».

Laaca nagana nga chuʼ binni zitu de binnilidxi ne de ca xhamigu. Jonathan, de Estados Unidos, guníʼ: «Gudiʼdiʼ si ti tiempu huiiniʼ de yendayaʼ ra chigucheecheʼ diidxaʼ, bibanaʼ ca binnilidxeʼ ne ca xhamiguaʼ. Peru nabé guyuaaʼ nayecheʼ ora bineʼ jma lu xhiiñaʼ Jiobá ne ora biindaʼ Biblia stubeʼ. Guiráʼ ca cosa sicarú rizaacaʼ ora rucheecheʼ diidxaʼ ne ca binni gucaʼ xhamiguaʼ lade ca binni ridagulisaa, gucané cani naa para cadi chuaaʼ triste».

Laaca nagana para guiaa binni guibani sti lugar. Beau, ti xpinni Cristu de Canadá, guníʼ: «Ndaaniʼ  xquidxeʼ qué liica ñuaaʼ xizaa pa nuu biaaniʼ ne nisa tubu, purtiʼ qué ñaadxaʼ cani naa. Peru raríʼ, guiráʼ ora rié biaaniʼ ne nisa». Ndaaniʼ stale guidxi ni deruʼ caroobaʼ, nabé pobre binni, huaxiéʼ galán carru de pasaje stícabe ne nuu stale binni ni qué ganna guʼndaʼ guiʼchiʼ ne gucaa. Ti cosa ni huayacané Inés, de Austria, nga guʼyaʼ chaahuiʼ ca guenda napa ca binni guidxi riʼ. Laabe guniʼbe: «Nabé sicarú modo ridxagalúcabe sti binni, nacháʼhuicabe, riuuláʼdxicabe gacanécabe ne qué rudxiibacabe laca laacabe. Peru ni jma riuuláʼdxicabe nga guiziidicabe de Dios».

QUÉ ZIAADXAʼ NDAAYAʼ STIʼ DIOS LII

Casi maʼ bidúʼyanu, guiráʼ ca xpinni Cristu ni maʼ bizéʼtenu riʼ huayúnicaʼ stipa para gucheechecaʼ diidxaʼ Ecuador, neca huayácani nagana para laacaʼ. Peru maʼ biiyacabe zanda gudii Jiobá laanu «jma que biaʼ iníʼ ique nu inaba nu laa. Ne rihuinni enda nandxóʼ stibe [...] luguiá nu» (Efe. 3:20). Laaca maʼ biiyacabe ximodo runi Jiobá ni maʼ guníʼ ne riguu stale ndaayaʼ laacabe, ne qué riaadxaʼ gastiʼ laacabe (Mal. 3:10). Guidúʼyanu xi riníʼcabe de modo rucheechecabe diidxaʼ.

Bruno: «Dxi yendayaʼ Ecuador, bicheecheʼ diidxaʼ ti lugar ni runibiáʼ binni casi región amazónica. Despué, dxi cusiroobacabe Yoo Betel yegacaniáʼ raqué, yanna maʼ runeʼ dxiiñaʼ ndaaniʼ ni. Dxi gulezaʼ Italia, gudixhe iqueʼ guneʼ xhiiñaʼ Jiobá primé lu xquendanabaneʼ, ne gucanebe naa guibaneʼ nayecheʼ ne guneʼ gadxé gadxé dxiiñaʼ ndaaniʼ xquídxibe».

Beau: «Jma maʼ nuaaʼ gaxha de Jiobá, purtiʼ ra nuaaʼ guidxi Ecuador riquiiñeʼ guiráʼ tiempu stinneʼ para guneʼ xhiiñabe. Ne sti ndaayaʼ gucuaaʼ nga binebiaʼyaʼ xcaadxi lugar sicarú, laani nga tobi de cani nabé guyuuladxeʼ guneʼ maʼ raca stale iza».

Anna: «Qué niníʼ iqueʼ pa nidxiña dxi ñuneʼ dxiiñaʼ casi runi ti misionera, caʼruʼ ndaʼ guichaganaʼyaʼ. Peru yanna maʼ nannaʼ zanda guneʼ ni. Nabé maʼ guluu Jiobá ndaayaʼ naa, ne nuaaʼ nayecheʼ purtiʼ cayacaniáʼ binni gaca discípulo stiʼ Cristu, racaniáʼ ra cabí Yoo stiʼ Reinu ne ridxelaʼ xcaadxi binni para gaca xhamiguaʼ».

Elke, de Austria, guníʼ: «Dxi guyuaaʼ xquidxeʼ, gunabaʼ Jiobá gacané naa guidxelaʼ ti binni para guundaniáʼ laa Biblia. ¡Yanna maʼ ruundaniáʼ quince binni raríʼ! Ora guuyaʼ pabiáʼ nayecheʼ nuu ca binni ni caniisi lu stiidxaʼ Dios la? laaca rusiécheni naa».

Joel: «Guizáʼ galán nga guʼnuʼ xhiiñaʼ Jiobá ti lugar ra qué runibiaʼluʼ. Riziidiluʼ guni creluʼ laabe jma, ne riuuluʼ jma nayecheʼ ora gúʼyaluʼ caguube ndaayaʼ ca stipa cayuʼnuʼ. Dxi biree de Estados Unidos para bendaʼ raríʼ, xhoopaʼ si binni rucheeche diidxaʼ nuu lu grupu ra guyuaaʼ; gudiʼdiʼ si ti iza, maʼ nuu veintiuno, ne guyé 110 binni dxi bietenaláʼdxidu guendaguti stiʼ Cristu».

LII YAʼ, XI CANÍʼ ÍQUELUʼ GÚNILUʼ

Pa testigu stiʼ Jiobá lii ne zanda chigunuʼ xhiiñabe sti lugar ra caquiiñeʼ tu gucheeche diidxaʼ, ñee zudiiluʼ lugar guseendabe lii tobi de ca lugar ca la? Dxandíʼ, naquiiñeʼ guiníʼ ique binni ni stale. Peru ni jma caquiiñeʼ nga gannaxhiiluʼ Jiobá ne gannaxhiiluʼ sti binni. Pa nadxiiluʼ laacabe ne ruuyuʼ zanda guʼnuʼ dxiiñaʼ ca, bizeeteni lu ca oración ni guʼnuʼ. Laaca galán gábiluʼ ni bixhózeluʼ ne jñaaluʼ ne ca binnigola nuu ra ridagulisaaluʼ. Zándaca laaca zudiiluʼ cuenta zanda guʼnuʼ jma lu dxiiñaʼ ni nabé risaca riʼ.

[Ni caníʼ yaza 3]

«Bineʼ orar stale ne gunieniáʼ ca bendaʼ ne ca bizanaʼ ni maʼ huaniisi lu stiidxaʼ Dios, laacaʼ bisiénecaʼ naa riguu Jiobá ndaayaʼ guiráʼ tu racalaʼdxiʼ guni jma lu xhiiñabe.» (Kayla, de Estados Unidos)

[Imagen ne cuadru ni zeeda lu yaza 6]

Xi zanda guʼnuʼ para gucheecheluʼ diidxaʼ sti guidxi

• Gulee tiempu para gúʼndaluʼ Biblia

• Biindaʼ Xhiiñaʼ Reinu stiʼ agosto 2011, yaza 4 dede 6

• Guniʼné tuuxa ni maʼ yegucheeche diidxaʼ sti guidxi

• Gunabadiidxaʼ xi costumbre nápacabe raqué ne biziidiʼ caadxi historia stiʼ guidxi ca

• Gucuaa ti cursu huiiniʼ ni zanda gacané lii guiziidiluʼ diidxaʼ riníʼcabe raqué

[Imagen ne cuadru ni zeeda lu yaza 6]

Xi runi caadxi de cani rié para guni ganarcaʼ ni iquiiñecaʼ

• Rúnicabe dxiiñaʼ chupa chonna beeu lu ti iza ndaaniʼ xquídxicabe

• Ruquíxecabe lídxicabe, cuartu o negocio stícabe

• Rúnicabe dxiiñaʼ pur Internet

[Ca imagen ni zeeda lu yaza 4 ne 5]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)