«XIÑEE naapiaʼ nga guizaacaʼ ndiʼ pue. Xiñee bidii Dios lugar guizaacaʼ ndiʼ pue.» Sicaríʼ gunabadiidxaʼ ti hombrehuiiniʼ napa 24 iza de guidxi Brasil ni láʼ Sidnei, despué de gupa ti accidente ndaaniʼ ti tobogán ne maʼ qué ñanda nizá.

Ora guiaanané binni ti yuubaʼ pur ti accidente, ti guendahuará, gatiʼ ti binni ni nadxii, gaca ti desgracia, o guerra la? riníʼ ique maʼ bidxiideche Dios laa. Peru maca huaníʼ ique binni zacá. Dxi gudiʼdiʼ Job lu stale desgracia bigaaniʼ donda ique Dios, neca cadi laa napa donda. Gúdxibe Dios: «Cucaaʼ riʼdxeʼ lii gacaneluʼ naa, peru qué ricábiluʼ. Ruzuhuaaʼ, peru ruyadxisiouʼ naa. Yanna maʼ bidxiidécheluʼ naa. Ne guiráʼ stipa napa naluʼ cayuninaluʼ naa» (Job 30:20, 21).

Qué lica ñanna Job xiñee cayacaná ne tu cayuniná laa. Galán nga laanu maʼ nánnanu ni, purtiʼ Biblia rusiidiʼ laanu xiñee cazaaca cani ne xi gúninu ora guidxaagalunu cani.

Sicaríʼ ruzeeteʼ Biblia de Jiobá Dios: «Ca dxiiñaʼ stibe biaʼsi cani, purtiʼ guiráʼ neza stibe jneza cani. Dios ni runi ni riníʼ, ne qué runi ni malu; Dios ni runi ni jneza ne qué ruchee» (Deuteronomio 32:4). Nga runi, pa nácabe ti «Dios ni runi ni jneza ne qué ruchee» cadi jneza guiníʼ íquenu laabe nga ruyúbibe gacananu o riquiiñebe desgracia para guni castigarbe o gusiidibe laanu.

Lugar de guiníʼ íquenu zacá, guidúʼyanu xi rusiidiʼ Biblia: «Ora chuʼ ni uquiinde laanu uchéʼ nu la? cadi zácaxa nu Dios cuquiinde laanu, purti qué zanda uquiinde ni nadxaba Dios, ne qué ruquiinde Dios irutiʼ» (Santiago 1:13). Biblia ruzeeteʼ dxi bizáʼ Dios binni, qué ñaadxaʼ laacaʼ gastiʼ, bidiibe laacaʼ ti lugar sicarú ra cuézacaʼ, ti dxiiñaʼ galán, ne guiráʼ ni caquiiñecaʼ para guibánicaʼ nayecheʼ. Gudxi Dios laacabe: «Lagapa xiiñitu ne lagaca stale, laguchá guidxilayú riʼ ne laguni dxiiñaʼ luni». Qué gapa Adán ne Eva razón para guiniʼcaʼ qué lica ñacané Dios laacaʼ (Génesis 1:28).

Yanna riʼ, maʼ cadi nabani binni casi gudixhe ique Dios. Rihuinni dxíchica nabé huadiʼdiʼ binni lu stale yuubaʼ. Nga runi, biaʼsi nga ni ruzeeteʼ Biblia: «Nuu né [guiráʼ ni bizáʼ Dios] ti yuuba roʼ, casi ti gunaa ora chi xhana, ruuna dede ricaalaʼdxiʼ» (Romanos 8:22). Xiñee cadi nabáninu modo gudixhe Dios yaʼ.

Para gánnanu xiñee, naquiiñeʼ gánnanu xi guca dede dxi bizulú bibani binni lu Guidxilayú. Gúcani dxi bicaalú ti ángel Dios. Ángel ni beeda gaca Binidxabaʼ bicaa Adán ne Eva chuʼcaʼ ladu stiʼ. Ra gudócabe «cuananaxhi stiʼ yaga stiʼ guendananna ni jneza ne ni cadi jneza» bisihuínnicabe laasícabe zanda gánnacabe xii nga ni jneza ne ni cadi jneza. Gudxi Binidxabaʼ Eva qué zati pa qué guzuubaʼ stiidxaʼ Dios, ne ni guniʼbe riʼ bisaanabe Dios casi tobi ni rusiguii. Laaca guníʼ Binidxabaʼ cadi cudii Dios lugar binni cuí ne ganna xii nga ni jneza ne ni cadi jneza (Génesis 2:17; 3:1-6). Casi ñaca niníʼ Binidxabaʼ jma galán zabani binni pa guixeleʼ de Dios. Pur guiráʼ ni guníʼ Binidxabaʼ bicaani binni guinabadiidxaʼ: Ñee Dios nga ni jma jneza guni mandar laanu la?

Laaca guníʼ Binidxabaʼ runi binni ni na Dios purtiʼ ricaa xiixa. Sicaríʼ gúdxibe Dios ora guniʼbe de Job: «Ñee cadi naguuluʼ ti leʼ ni rapa laabe, ni rapa lídxibe, ne ti leʼ ni rapa guiráʼ stibe la? Huaguuluʼ ndaayaʼ dxiiñaʼ rúnibe [...]. Peru bisaana de gúniluʼ zacá ne bisigaanáʼ, gudaʼnaʼ guiráʼ ni nápabe, ne zuuyaʼ dxíchiluʼ zaguudibe lii nezaluluʼ» (Job 1:10, 11). Nécapeʼ de Job nga cayeeteʼ raríʼ, peru casi ñaca niníʼ Binidxabaʼ guiráʼ binni runi ni na Dios purtiʼ ricaacaʼ xiixa.

Ximodo zanda gaca chaahuiʼ ni biʼniʼ Binidxabaʼ ca yaʼ. Cumu nabé nuu xpiaaniʼ Dios la? bíʼnibe  ti cosa ni rusihuinni qué zudxiidéchebe laanu (Romanos 11:33). Bidiibe lugar guni mandar binni lu Guidxilayú ti tiempu ti guihuinni pa jma jneza zúnicabe ni.

Triste guininu ni, peru pur modo nabani binni ndaaniʼ Guidxilayú yanna riʼ rusihuinni qué ganna binni guni mandar. Ca gobiernu nuu yanna qué ganda gacanecaʼ chuʼ guendariuudxi, guibani binni nayecheʼ, sínuque cunitilucaʼ guidxilayú riʼ. Ne laapecabe cayúnicabe stale cosa ni cunitilú Guidxilayú. Nga runi, biaʼsi nga ni riníʼ Biblia: «Cadi lu náʼ diʼ binni nuu neza stiʼ» (Jeremías 10:23). Pa ñaca Dios ñuni mandar lu Guidxilayú riʼ la? ñuu guendariuudxi, nibani binni nayecheʼ ne ñápacaʼ guiráʼ ni niquiiñecaʼ; ngapeʼ nga ni gudixhe íquebe para laanu (Isaías 45:18).

Xi chiguni Dios para gaca nga yaʼ. Bietenalaʼdxiʼ oración bisiidiʼ Jesús ca discípulo stiʼ ora guníʼ: «Biseendaʼ Reinu stiluʼ. Biʼniʼ ni naluʼ ndaaniʼ guidxilayú cásica raca ni guibáʼ» (Mateo 6:10, TNM). Ora guedandá dxi guni mandar Reinu stiʼ Dios, zabeeni guiráʼ cosa ni runiná laanu (Daniel 2:44). Guirutiʼ zietenalaʼdxiʼ pa guyuu guendahuará, guendaguti ne maʼ qué ziuu binni pobre. Dios maʼ guníʼ: «Zulabe binni pobre ni canabaʼ gacanécabe laa» (Salmo 72:12-14). Biblia laaca ruzeeteʼ: «Guirutiʼ tu cueza racá zaníʼ: “Huaraʼyaʼ”» (Isaías 33:24). Xi zuni Dios pur guirá binni ni maʼ guti yaʼ. Biblia na: «Zadxiña dxi guna diaga irá cani nuu ndaani baʼ stidxi [Jesús], ne zaree caʼ» (Juan 5:28, 29). ¡Nabé sicarú ni chiguni Dios!

Diecisiete iza de gupa Sidnei, hombre ni bizéʼtenu ra bizulú tema riʼ, accidente que guníʼ: «Qué ñuu dxi nugaaneʼ donda Dios pur accidente que, peru nacubi guca ni guníʼ iqueʼ bidxiideche Dios naa. Nuu biaje riuaaʼ triste ne ruunaʼ ora guníʼ iqueʼ qué rizayaʼ. Peru pur cani ruundaʼ lu Biblia rudieeʼ cuenta cadi ti castigu diʼ stiʼ Dios ni gucaʼ que. Stiidxaʼ Dios rusiene: “Guiranu rizaacanu cosa ni cadi caníʼ íquenu ne ora cadi cabézanu cani”. Ora guinieniáʼ Jiobá ne guundaʼ xiixa versículo stiʼ Biblia riguidxi fe stinneʼ ne riguuni gana naa» (Eclesiastés 9:11; Salmo 145:18; 2 Corintios 4:8, 9, 16).

Ora guiníʼ íquenu xiñee rudii Dios lugar gacananu ne gánnanu maʼ cadi candaa zareecani, racanécani laanu gápanu confianza Dios. Zanda guni crenu zacanebe «cani uyubi laabe». Cani gapa fe Dios ne Xiiñiʼ zanda guni crecaʼ qué ziuu dxi gudxiideche Dios laacaʼ (Hebreos 11:6; Romanos 10:11).