Pa qué racaláʼdxiluʼ guireeluʼ gana ora maʼ cayuundaluʼ Biblia la? caquiiñeʼ gúniluʼ xiixa. Guidúʼyanu caadxi cosa ni zanda gúniluʼ ti chuuláʼdxiluʼ gúʼndaluʼ Biblia.

Gulí ti traducción nacubi ne ni zanda gápaluʼ confianza. Pa lu Biblia ni cayuundaluʼ riete diidxaʼ nagana, huaxiéʼ ziéneluʼ ni cayuundaluʼ. Nga runi, biyubi ti Biblia ni guiéneluʼ ni cá luni ne chindá ca diidxaʼ stini ndaaniʼ ladxidoʼloʼ. Laaca naquiiñeʼ gaca ni ti traducción biaʼsi ne ni zanda gápaluʼ confianza. *

Zanda iquiiñeluʼ ca tecnología jma nacubi ni nuu. Tiempu riʼ, laaca zanda gápaluʼ ti Biblia lu formatu electrónicu. Zanda gúʼndaluʼ ni lu Internet o guni descargarluʼ ni lu ti computadora, tableta o teléfono. Lu caadxi versión stiʼ Biblia zanda gúʼyaluʼ ximodo guca traducir ti versículo lu stale traducción stiʼ Biblia o zanda guchaagaluʼ ni cayuundaluʼ né ni zeeda lu sti traducción. Ne pa qué racaláʼdxiluʼ gúʼndaluʼ Biblia la? zanda gucaadíagaluʼ audio stini. Stale binni riuulaʼdxiʼ gucaadiaga audio stiʼ Biblia ora zecaʼ ra dxiiñaʼ, ora caguiibicaʼ lari ne ora cayúnicaʼ xcaadxi cosa. ¿Guná de ca cosa riʼ ñuuláʼdxiluʼ ñúniluʼ? ¿Xiñee qué gúniluʼ ca ni bizéʼtenu riʼ yaʼ?

Biyubi jma información. Nuu caadxi cosa ni zanda gúniluʼ para chuuláʼdxiluʼ gúʼndaluʼ Biblia. Guzéʼtenu ti ejemplu, zanda gúʼyaluʼ ca mapa ra zeeda ca lugar ni riete lu Biblia ne guiníʼ íqueluʼ ni bizaaca racá. Laaca zanda gúʼyaluʼ xcaadxi artículo ni zeeda lu revista riʼ ne ni zeeda lu sección ni láʼ «Ca ni rusiidiʼ Biblia» ni nuu lu sitiu jw.org. Últimu riʼ zacané ni lii guiéneluʼ ca relatu ni zeeda lu Biblia.

Biyubi modo gúʼndaluʼ Biblia. Pa rireeluʼ gana gúʼndaluʼ Biblia de ra ruzulú ni hasta riluxe ni la? zanda gúniluʼ xiixa ti chuuláʼdxiluʼ gúʼndaluʼ ni. Para gánnaluʼ jma de ti personaje ni riete lu Biblia, zanda gúʼndaluʼ ni pur personaje. Recuadru ni láʼ « Biziidiʼ jma de Biblia ra gunibiaʼluʼ ca personaje ni riete luni» zanda gacané ni lii pa racaláʼdxiluʼ gánnaluʼ jma de ti personaje. Laaca zanda gúʼndaluʼ ni pur tema ne pur orden cronológico. ¿Xiñee qué gúniluʼ ca ni bizéʼtenu riʼ yaʼ?