Rindá ca videu ni ridúʼyanu lu ca asamblea regional ndaaniʼ ladxidoʼno ne racanécani laanu guiene chaahuinu Biblia. Lu asamblea regional de 2020 ni láʼ «¡Siempre lachuu nayecheʼ!» gudiʼdiʼ 114 videu, ne 43 de laacani nácacani discursu ni bidii ca ni nuu lu Grupu ni Zániru ne ca hermanu ni racané laacaʼ. ¿Ñee huaníʼ íqueluʼ pabiáʼ dxiiñaʼ ne bueltu riquiiñeʼ para gaca ca videu riʼ la?

 Biaʼ 900 hermanu ni nuu lu guidubi Guidxilayú, biquiiñecaʼ tiempu sticaʼ ne ni nánnacaʼ para gunda guca asamblea riʼ. Ne biquiiñecaʼ biaʼ 100,000 hora lu chupa iza para guca dxiiñaʼ riʼ. De lu ca hora ca, biquiiñeʼ 70,000 hora para guca ti drama de 76 minutu ni láʼ Nehemías: Guendanayecheʼ ni zeeda de Jehová nga ni rudii stipa laanu.

 Biquiiñeʼ stale bueltu para cadi gaca ca voluntariu ca gastiʼ, gápacaʼ equipu ne herramienta ni caquiiñecaʼ ne ca lugar iquiiñecaʼ para gaca proyectu riʼ.

 Sicaríʼ guníʼ Jared Gossman, ni runi dxiiñaʼ lu Servicios de Audio y Video: «Racalaʼdxiʼ Comité de Enseñanza stiʼ Grupu ni Zániru guihuinni gadxé gadxé cultura ne lugar lu ca videu stinu. Ti zacá guihuinni nácanu ti familia de hermanu ne hermana ni nuu lu guidubi Guidxilayú. Para gunda guca proyectu ni zahuinni lu guidubi Guidxilayú riʼ, biʼniʼ 24 equipu de 11 guidxi dxiiñaʼ juntu. Biquiiñeʼ stale bueltu ne tiempu para gatachaahuiʼ guiráʼ dxiiñaʼ ni guca que».

 Para gaca stale de ca videu stinu riquiiñeʼ equipu ne escenariu especial. Guzéʼtenu ti ejemplu, para gunda guca grabar drama Nehemías: Guendanayecheʼ ni zeeda de Jehová nga ni rudii stipa laanu, bizáʼcabe guiráʼ ni chiguiquiiñecabe ndaaniʼ estudiu Mount Ebo, ni riaana gaxha de Patterson (Nueva York). Para iquiiñeʼ ca donación ca jneza ne para gaca escenariu ca casi tiempu dxiqué, bizáʼ ca hermanu caadxi pieza nasisi para iquiiñeʼ ca ni casi muru stiʼ Jerusalén. Cada pieza nasoo xhoopaʼ metru, de yaga cani ne bichéndacabe ni ti material nasisi ne bitieecabe ni para guluiʼni guié. Randa runiibicabe ca pieza riʼ para guzáʼcabe xcaadxi escenariu ne zacá cadi guzáʼcabe stale pieza. Neca zacá guca gastu 100,000 dólar para guca ca escenariu riʼ. a

 Ra gánnanu modo raca ca dxiiñaʼ riʼ ne pabiáʼ riniti lúcani, rucaani laanu gusisácanu asamblea regional stiʼ iza riʼ. Nánnanu zacané guiráʼ dxiiñaʼ riʼ gusisaca binni Jehová lu guidubi Guidxilayú. Xquixe peʼ laatu pur ca donación ni rúnitu para obra mundial lu donate.dan124.com ne xcaadxi modo.