Elisa, ti testigu stiʼ Jehová, cudii estudiu ra lidxi ti gunaa. Málasi yendá ti guendaxheelaʼ raqué. Gúcasini ti sacerdote ne xheelaʼ. Gunna Elisa cadi tan xadxí guti xiiñiʼ guendaxheelaʼ riʼ.

 Ora caguixhedxí Elisa ladxidóʼcabe, bizulú biinaʼ sacerdote riʼ ne xheelaʼ. Óraque cadxiichi sacerdote que guníʼ: «¡Qué guirá guneʼ cré xiñee cutiidiʼ Dios naa prueba riʼ! ¿Xiñee zinebe tobi lucha xiiñeʼ pue? Maʼ ziniaʼ 28 iza de cayuneʼ ni nabe ne cayuneʼ cosa galán pur xcaadxi, ne zacá gudíxebe naa la? ¿Xiñee bidii Dios lugar gatiʼ xiiñeʼ pue?».

 Bisiene Elisa laacabe cadi Dios napa donda guti xiiñicabe. Laaca bisiénebe laacaʼ xiñee guti Jesús pur laanu, zusibani Dios ca binni ni maʼ guti ne xiñee cudii Dios lugar guizaaca cosa malu. Para gudxi guendaxheelaʼ que Elisa ngue peʼ nga respuesta ni canábacaʼ Dios.

 Gudiʼdiʼ si ti semana, bibiguetaʼ sacerdote que ne xheelaʼ ra lidxi gunaa ni cayuundané Elisa. Cayuundané peʼ Elisa gunaa riʼ libru Xipeʼ ndiʼ cusiidiʼ Biblia lu tema ni láʼ «Ziuu dxi guiasa ca binni ni nadxiinu ni maʼ guti». Guyuu guendaxheelaʼ riʼ lu estudiu que ne guyuuláʼdxicaʼ guiziidicaʼ jma.

 Gudiʼdiʼ si ti tiempu, guyé guendaxheelaʼ riʼ asamblea especial stiʼ ca testigu stiʼ Jehová ni guca ndaaniʼ guidxi Tiflis (Georgia) ne guizáʼ bidxagayaacaʼ ora bíʼyacaʼ pabiáʼ nadxiisaa ca hermanu ne nuucaʼ tobi si. Xadxí gucaláʼdxicabe ñuni ca binni ni rié ra yuʼduʼ stícabe ni bíʼyacabe lu asamblea riʼ, peru qué ñanda diʼ ñúnicabe ni.