Mbori aya fu Adamu wẽ, “ni gu rago ka mo ri zuzuhe mo akpí akpi ni rengo.” (Bambata Pai 2:17) Ka si adu nga Mbori akusi Adamu ko gbinza na ki kpi ka ko apenga agu afugo re fuko te. Adamu aima ino gupai nga ka ko aringa zuzu gi ngua re ya ko akpingo te.

Anga gu ngua re nangia gu ngua Adamu anaarihe tipa kaa raka te​—dungu zuzu angua naadu rogo gu ati re. (Bambata Pai 2:9) Ka gu bambata arogotise re aaringa gu rindi ngua re ya, ka si ayugupa gayo giasangba koyo du gu Boro ni naafu unga fuyo. Ka si ayugu gupai a nga i nabi Mbori nga ko du na rengo tipa sia gupai du ni wenehe na gbegberẽhe tipa gayo raka.

Tipa ka rugatirani na ndu gupai Adamu na Eva akpi ti ni, si naida ani wisigi gu sakapai nagbarasipa gaani raka. Satana Bakitingbanga amangisunge na wo tipa ka pe ziree. Gu pangbanga nga ga Baibiri naya: “Were ga wo birĩ nasusi gu nga ga anya nvuo dunduko nga agu ra Yekova Mbori amangi ra. U ki ya fu de, ‘Ati Mbori aya, ‘Ka oni rí nga agu angua du ati yo dunduko ya’?”​—Bambata Pai 3:1.

Eva ki karagapai nga: “Gu zuzu angua du ati yo ka ani ri he ari; ono zuzu gu ngua du bebere ati yo, Mbori aya, ‘Ka oni rí nga zuzuhe ya, ka oni zádi nga ha wa sa ya, oni ka kpi.’” Fuo gure wo ki ya furi: “Oni akpí nga wa sa te. Bambiko Mbori ini ya ni gu rago ka oni ri zuzuhe bangironi azá aza, oni ki du wa kina Mbori, niini wenepai na gbegberẽpai.” Rogo gi gene re, Satana agumba gupai nga Yekova nga iraziree ko naká na wenepai be bambata avungurani.​—Bambata Pai 3:2-5.

Eva aima ida kuti gupai ri agihe. Ri angana gu ngua re. Si ki du ni bawenehe gbe! Ri ki kati zuzu he na ki tona ka rihe. Fuani, Baibiri naya: “Ri ki fu he fu kumbari nadu na ri, ko ki ri he a.”​—Bambata Pai 3:6.

Nairiwo wai rago agberẽ ti Mbori ka bi gupai nga agu awiriko ko akpinyemu yo ima diaberã tipa ka basa ko! Ginipai ko amangihe? Yekova aya fu Adamu: ‘Mo ka káraga tiro ku sende yo, bambiko mi adi ro kina rogo ho; mbiko mo nga kina nvutu, kina ku nvutu yo mo ka karaga tiro ku ho ni.’ (Bambata Pai 3:17-19) Mbiko gipai re, “garã Adama adu dunduko 930; ko ki kpi.” (Bambata Pai 5:5) Adamu aaganga ku ngbangbaturũ yo te watadu ka sa tiko ni toro a te. Mbata fu Yekova mbakadi ko rogo nvutu sende ko aadunga ti ni te. Sidu, ho ko akpi ni, ko azanga ungako na kpotoko ki satihe ni nvutu. Ka ko adu nga ti ni berewe ya. Nairiwo gu kerepai re!

AAdamu na Eva azanga gu kpotoyo naadunga na ingapai ya gbiati gu maabangirise nangia ka raka nyeanye kindi, mbiko i abasasangba rogo wia yo. Apai aʹaria tihe tipa kpotoyo; i ada nga aboro ingapai. Ono gi gayo ingapai nangia ga basasangba re aamanganga kina yo sa te. I aima fuhe a fu atita yo. ARomo 5:12 naya: “Gbegberẽpai akuru ku zegino mbiko boro sa [Adamu], kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.”

Baibiri nafura tipa ingapai na kpio nga si nga “gu ũdadahe gbaragi yo ho ku ri arikaaboro dunduko.” (Yesaya 25:7) Gere nayugo gupai nga gene ho tipa ka ora be ingapai na kpio te. Nirengo, “aboro nakpi akpi dunduko rogo Adama yo.” (1 AKorindo 15:22) Gu sanahe nakura wa gu gu mokedi nangia Pauro asanaha nga: “Da ka batasi re ti gi boro kpio re?” Ya mo boro ho?​—ARomo 7:24.