KANGIA mo nga vunguagude, ya mo pai amangingo ro wa agi apai fura ani tipaha kuari re? Ho mo agbia tiro ni na ngbatungapai wa gure, ya mo mo naabaka bangiro na pa wai si aida mo rugu wiro? Ya mo gbegberẽpai du ngaha ka ruga awiro?

Rogo Ziazia Kekeapai, gu fugo nga “rugute,” si nga mbusa te. Rugute nga yugupai na rugapai. Pai ho nakodaha na mangapai gbegberẽ te.—Asanza 4:1, 2.

Ani rengbe ka ringbisa gu rugute nga ga avungu agude kuti rũhe. Basopobino nasopa gako bino, ki mbakadihe na ki rũ ahe na kini ngerefuoho.Wa agi ahe re nikaa sona, ní nakombiraha tipa ka undo ho si sonowenengai. Basopobino ima ino gupai nga gu kura rukutu apai kinaho si aida ni nimangihe wa ka agu ahe re zu funi wenengai. Wakina gure a, avunguagude nangerafuo awiriyo ngba dungu agene. Ono ti kura aregbo, si naida i fu rugute afu fu awiriyo, na gu rugute rewakina kombirahe tipa ka ruga gu gbegberẽ apai du ngbadu awiriyo yombuyo kindi rukutu na ki undo yo i sono ngba ruru gene. Ono tie, si naaida i kombirahe ngba wene gene, mbiko pa ahe ima rengba ka gberã ti regbo kombiraha.Wakina gure a, si aidanga avunguagude fu rugute fu awiriyo gbagaragbagara te.

Yekova Mbori ima maa wene kpiapai fu avunguagude rogo gi bangiriba re. Gu rugute ko afuhe fu agu airisiko du auru kpotosende na wene sangbanaha ti ni, na si nasayo i ‘kpinyemu gako rugapai.’ (Asanza 12:1) I ‘naká kuti rugute nyanyaki’ ka i ‘ambungaha si merẽ ya’ (Asanza 4:13) Mo rengbe ka undo wiro u degeturu kuti gamo rugute ni wirikamo agu apai biata du tipa ga Mbori arugute nga: (1) Si rogo nyemuse yo, (2) si afunga rii ome te, na (3) si kina kubani sa.

Nyemuse du nasa Mbori ko fu arugute furani. Ziazia Kekeapai naya: ‘Yekova naruga gu ni ko nakpinyemuni, wakina bagude na gu wirini ngba tini.’ (Asanza 3:12) Kurigure, Yekova “du adu na nunga aboro na undahe ti ko, du ni bayee ko tipa zinga.” (Gate 34:6) Mbiko gipai re, Yekova amanganga pai ngba gbegberẽ gene te. Na ko apenga gbegberẽ afugo na kini bisirapa aboro dedede nga agu apai naimisa boro ‘wa ka kina baso rũhe’ te.—Asanza 12:18.

Nirengo, avunguagude arengbanga kawirika ga Mbori kpiapai nga ga zatise nzunzu te. Ti kura aregbo, si ima rengba ka kpakara furoni oni hipai, ono ho du oni ni rogo kpakarapai, si naida oni tingidi gupai dedede nga, fu mbusa fu gude na iimi ngbaduroni rengbe ka sa roni oni mangi furu gbegberẽ na si ki kusi kurapai kia. Kurigure, gu mbusa i afuhe fu gude na zinga, rugute ngaha te. Si gbua nga zanga zatise ti zinga.

Ono ho oni afu rugute ni rogo nyemuse zanga zinga, si ima rengba ka kusawene sangbaha.Oni bingo wai aGeorge na Nicole ani nifura tipa yo kuari amangipai.

George aya: “Ho Jordan ayego ni, mi na diare adu na bakere zinga, ono ani zeresi ngbadurani ka degaturani fuko. Wa duhe nga regbo aima susa, ani adiberã ka fura tipa gupai rewiso. Ani amangi kparakpee sa na ani ki ndu ka piko. Ho rago agiri ni, ani asaki gipai re rogo pazereda na si ki zi ngbadu wirani yo. Ko aima ida ka ndu kuti gaani andiko na ki idi gupai nga ko angia ingahe. Ani na ngbarago ka ino gupai nga, ho aboro amangapai ni kuti pai na zinga, si nakusa gu kurapai kia. Ho ani anidegeturani ni mbata, apai anindu wenengai.”

Nicole aya: “Mi adu na bakere zinga ka bi wai gu wire nga kumbagude aimisi dawiriko. Kuba gupai nga mi zingi nibasa, mi aya fuko ko rimi ku dimo kpuko yombiko ngbadure aimi ni kerehe ka gene adunga mi mangi ruru diaberã ya. Kusa, ho ngbadure azere ni, mi asaki gupai fuko nga zuu angbanga te na ki yugu wai fuko ko aimisi dawiriko. Gipai re aima undo ko. Ko ahõ mbupai be dawiriko na ki dungu ri.”

Nirengo, ka oni fu rugute ngbawene gene, ka si vura du nga si na mbusa rogoho, si naida oni mangihe rogo nyemuse yo.

Yekova naafu rugute dedede “rogo ruru ringbisahe.” (Yeremaya 30:11; 46:28) Ko naberãpa agu  apai du tipa aboro dunduko, kodihe na agu aboro abingo ho ya.Wai rengbe avunguagude ka manga gipai? Stephen ani nifura tipa ko ti tonatonaha aya: “Wa vura duhe nga ngbadurani aimi ni kerehe ka ani arengbanga ka rugatirani na pa gupai Natalie aatikango tongo ti ni ya, ani abihe nga ri kindi nga gude na ri ata nyakanga te.”

Kumbaku Nicole nga Robert aasadi a ka berãpa agu apai naadu tipa awiriyo.Ho awiriyo naamanga Gbegberẽ pai ni, ko naasana tiko dedede nga: ‘Ya mo bambata regbo du gipai remangi, watadu si nikaa manga amanga kindi? Ya mo gu gude re na mbugowatadu kpoto ru wenengai te? Yamo gupai mangi re nayugu gupai nga u ima rengba ka manga gu kura gbegberẽpai?’

Si naida avunguagude ini gupai a nga agude nga rukutu sosono aboro te. Gu mokedi nangia Pauro aima ino gipai ho ko aya ni wẽ: “Wa dumi ni kumba, mi mbu agu apai nga ga agude.” (1 Akorindo 13:11) Robert aya: “Pa tingida mi agu apaimi anaamangaha mi du ni gude, ninaaundo re mi du na ruru bipai na kini za tire ti zinga.”

Si ni nyanyakipa pai oni ini agu apai oni aidaha be awironi, na si aidanga ani abia yo na gbegberẽpai te. Pa berã oni pa agu apai rẽ ome awironi na ni na kura apai, rengbe ka sa roni oni fu gu rugute afunga rii omeyo ya.

Maraki 3:6 naya: “Mi nga Yekova mi asa nga pa re wa sa te.” Ga Mbori amoyambu nakido kuti agi afugoko re na gi inohe re du nabanda yo. Agude naida a na gu bandahe naye be gu rugute du kina kubani sa. Kangia oni naafu arugute fu gude kia ho oni azinga ni na kini fuhe a kia ho du oni ni na ngbarago, si ima rengbe ka tudo ri awironi yo na ki fu gberãrago fuyo.

Oni tingidi gupai nga Yesu aya: “Fugoroni du ni kina, ‘Ii, ii;’ na ‘Oó, oó.’ ” Avunguagude rengbe arengba ka mangapai kuti agi afugo re. (Matayo 5:37) Oni berẽ wenengai mbata fu oni pe gupai oni arengbanga ka mangaha ya. Ka si du nga oni za wironi nga ka ni mangi gupai du ni irairaha, oni nika fu mbusa funi, oni fuhe afu ka ni mangihe.

Ho du wene fugodagbase ni dagba avunguagude, si nasayo i fu rugute kina kubani sa. Robert aya: “Ka awire sa re mi idipa gupai fuyo diare aima káha fuyo, ho mi ainoho ni, mi nada kina kuti gu diaberã diare amangihe.” Kangia avunguagude agianga tiyo riipa wai ka mangapai te, si adu ni wenepai ka i sakihe kina dagbayo angianga ku bangiri agude ya na i ki dakuti bangisapai sa.

Ka oni wiriki Yekova rogo fu gu rugute du na nyemuse, gu afunga rii ome ya, na gu du kina kubani sa, oni duadu na gu kido nga gu ome oni amangaha nika undo awironi aundo. Gaoni wene arugute rengbe arengba ka undo awironi i sono ni wene aboro.Awa ZiaziaKekeapai apehe nga: “Oni sónosi gude rogo gu pai ka ni ndu ngba ha, ho ni ka gbinza ni ka ni agú ari nga ngba ha ya.”—Asanza 22:6.