AGU APAI NANDU NA GUPAI DU TI KPOTOHO | YA MO MBORI NABERÃPA RO?
Mbori Naida Kadu na Wene Pagume Namo
“A nga boro sa ka ye kono du mi ni gbua te, kina Buba nakedi re ka gbe ni.”
NDU GUPAI KURA ABORO ATIKÖ ATIKÖ TI NI: Dungu agu aboro idi kuti Mbori nabi tiyo nga i ima turo tiko. Christina du Irelanda yo ninaandu ku kanisa yo na aposo dũ aya: “Mi anaabi ko ni gu Mbori nakusi ahe dunduko. Ono mi aainongo ko te. Uru ho sa mi abi tire nga mi mbedi na ko te.”
GUPAI FUGO MBORI AYUGOHO: Ho ani abi tirani ni nga ani ima inga, Yekova ambunga undo rani te. Yesu ayugu gu kpiapai nayugo wai Mbori aberãpa rani ki ya: “Ka boro du na akandoro be ni 100, si ngia gu ru sa ki ingi, ni ki nihe agu ra du 99, ki nindu ku dagba abaagangara yo, ka gbata gu ru naingi te?” Ginipai ani awirikaha behe? Si nayugo gupai nga, gu ‘Barani du ngbangbaturũ yo, ko aidanga gu ni kpi sa dagba gi rukutu yo re te.’
“Gi rukutu yo re” ni basasa dunduko nanyaki payo bangiri Mbori. Wai Mbori agbata gu kandoro ‘ingi’? Ringbisihe kuti gu veresi ke yo ho ti tonatona gi kekeapai re, Yekova na gbe aboro koyo du ko ni.
Gini aboro areme nandu fuo aboro ku kpuyo yo na bangiri agene tipa ka fura nayo tipa gu pangbanga du rogo Ziazia Kekeapai?
Mo bingo wai Mbori amangipai tipa ka gbe agu aboro du na wene ngbaduyo yo koyo du ko ni. Rogo bambata kama agarã, Mbori akedi gu bawiriki nangia Firipo ko ndu ka gbia gu banyaki nangia boro Etiopia na ki sakirogo gu sangbanebi gu banyaki re aagedaha rogo Ziazia Kekeapai. (Amokedi 8:26-39) Kusa, Mbori aya fu gu mokedi nangia Petero ko ndu fuo gu baira abanzengere nangia Korunerio naima digo nikpari fu Mbori na kini mangi ome tipa ka irisoko. (Amokedi 10:1-48) Mbori anungusi gu mokedi nangia Pauro na abakureako ku pavuru gu di naadu pati gu gbata nga Firipoi. I agbia dee yo nangia Rudia ‘nanaairiso Mbori’ na ‘Mbori ki za kpotori yo, ri di agu apai i agumba kugume.’
Rogo agi abangiriaba re ni basasa, Yekova aima manga ome tipa gupai nga agu aboro naagbata ko, momu du kinaho fuyo tipa ka inoko. Gini aboro areme nandu fuo aboro ku kpuyo yo na bangiri agene tipa ka fura nayo tipa gu pangbanga du rogo Ziazia Kekeapai? Ka mo sana dungu aboro, i nika ya foro wẽ “aDezire Yekova.” Mo sananga tiro nga, ‘Ya mo si rengbe kadu nga Mbori namangasunge nayo tipa wa ka ko du na wene pagume nami?’ Ani nazungodi ro mo kpari fu Mbori ko undo ro mo du na wene pagume na ko tipa ka mbeda na ko. *
^ genewaraga 8 Ka mo aida ka ino kura apai tipa gipai re, mo bi gu vidio nga Why Study the Bible? rogo gaani bangiriba nga ga Internet nga www.dan124.com/zne
Gere Ima Rengba a ka Ngba Tiro
AGU APAI DU TIPA RANI
Gupai Si Aida Mo Wiriki Ziazia Kekeapai Ti Ni
Ziazia Kekeapai nakaragapai fu dungu amirioni aboro rogo zegino kuti gu nyanyaki asanahe nabipa raka. Ya mo asanahe ngbaro mo aida gaha akaragapai?
