ADezire Yekova nagbia badungu ariahe nga ga toro susi gu nidu mbata rogo agu awaraga du mburuhe ri Baibiri na avidio. Ono rogo dungu apapara zegino, awirinarani arengbanga ka gbia Internet te. Agu akurayo naraka rogo agu aba Internet akata akata rogoyo, aguyo naraka rogo agu aba si amanganga sunge wenengai rogoyo ya watadu adunga Internet zaatu rogoyo ya.

 Wa vura duhe wo, badungu awirina awere ima rengba ka zoga gaani awaraga du rogo Internet zavura ka Internet avura dunga ya vurũ! Waigu rengbe gipai re ka manga?

 Wiri tooni sanduki gu duho nga JW Box i nakusihe tipa agu adungurati adunga nga Internet rogoyo gbe ya. Si na gu he nga ga Internet rogoho i ayambaha nga router i angbehe be ababagiahe, na agu ambakadapai nga ga kompiuta gu Basunge nga ga Kompiuta vuru Betere nakusihe, gbiati agu awaraga gbiati avidio du rogo Internet rogo jw.org. Gino gu sanduki re ima mbeda kuti adorari wa 75.

 Awirina namaa gayo aterefuni Bambu Kindo yo kuti gu sanduki nga JW Box zanga na gire na tifuoho ki zogo awaraga gbiati avidio. Zavura agu aboro du na kuru afõni beyo watadu agu afõni anyakanga ginoho ya ima rengba ka maa gayo afõni kuti ni. Ono ka dungurati adunga na Internet ya, waigu rengbe gu sanduki nga JW Box kadu na vovo awaraga rogoho? He kinaho be-basunge akedaha i ayambaha nga USB keys, nga gu i angbehe na marã wa adorari 4 tipaha nibasasa, na vovo apai rogoho nga gu du rogo jw.org nga gu i narengbe ka maa ahe na ni ku rogo JW Box yo.

 Waigu JW Box naundo awirinarani? Gu baagude nga Nathan Adruandra, naraka Kongo yo aya: “Mi aima asada tipa gbanga regbo ka zoga gu drama nga ‘Ako Yekova, . . . mi nakida kina kuti ro’ na Oni tíngidi pa Dia Roto. Ono mi aadunga na diabese te, na gupai re aima ba gberãrago tire. Awere, mi ima rengba ka zoga agi avidio re ku rogo gi terefuni, na gipai re nika undo rani nga avunguagude ani yugupai fu awirani wenengai.”

 Gu wirina naundo agu adungurati du Nigeria yo tipa i rẽke gu sanduki nga JW Box aya: “Awirina nabi JW Box wa kparakpara gamahe be Yekova. I na bakere ngbarago nga i ima rengba ka zoga awaraga na avidio rogo Aũsunge Nga ga Yugopai.”

 Rukutu wiri asanduki nga ga JW Box niima susa 1,700 i nakedihe fu awirinarani ku Afirika yo, Agu Aringara du Bebere Baime Yo, na Amerika ku Sudiyo, na i namanga mbakadapai tipa ka kekedaha kurogo dungu adungurati. Wari gu ani agbia marã ni tipa agi apai re? Agu agamahe aboro afuhe tipa gu sunge namanga rogo zegino dunduko, i nafu badungu agu agamahe re rogo donate.dan124.com. Tambuahe furoni tipa wai oni asongoda gi sunge re na gaoni agamahe.