“Ani ka gbiatirani barambeda na gberãngo mbiko wai rago asakatihe. Kikindigi agbata nika du rogo ime. Kere faarago. Kere abavugumo. Kere zingo ime rogo zegino dũ. Kurukuru ahe na anya nika kpiko dunduko. Anga paturẽ nga gipai re watadu durugopai te. Si nga gupai aboro birĩ-inohe apehe furani nga si nika manga ka abazogo aarianga gu gene i amangasunge ngbaha na agu ahe nafu we ya.”—Fugo António Guterres, nga bangere kurii gu riigbu nga ga United Nations [Yu-en], nibipa gu tingidapai nangia ga gu riigbu nga Intergovernmental Panel on Climate Change nakuru rogo Zerekpe 4, 2022.

 “Aboro birĩ-inohe nafu zahe nga barambeda, agu aba i abanda anya rogo dunduko du bangehe nga 423 vuru Amerika [United States], paha nika gberã, gbe, bambiko bakere faarago. Gu gbegberẽ apai nga gu rengbe ka manga wakina gu ani agedapaha rogo Baibiri yo: we na ime akangbii, zaragazaraga kputakputa ndurõo, hiko abaime na kere faarago.”—“Flooding Chaos in Yellowstone, a Sign of Crises to Come,” The New York Times, Banzinga 15, 2022.

 Ya mo i rengbe ka mbakada gu kpakaraapai nga ga kpotosende? Ka si du wo, da nika mbakadaha? Ani wisigingo gupai nzunzu Baibiri ayugoho.

 Baibiri nayugo gupai nga Mbori nika ‘gbarasa agu yo nagbarasa kpotosende.’ (Yugoti 11:18) Gi veresi nga ga Baibiri re nayugo apai biata furani:

1.  1. Gu mangaapai nga ga aboro nika gbarasa kpotosende ni kerehe.

2.  2. Pa gbarasa kpotosende nika digo adigo.

3.  3. Mbori, angianga aboro ya, nika mbakada gu kpakaraapai nga ga kpotosende.

 Baibiri nagumba gupai nga “kpotosende nye anye kindi.” (Batungusipai 1:4) Si nika nyeanye kindi aboro niraki auruhe.

•   “Ruru aboro adía kumbo ringara, ki nye anye kindi.”—Atambuahe 37:29.

 Gaani kpotosende nika karagatihe akaraga wenengai kubaha.

•   “Ngbakungba na gu rago ugu auga adú na ngbarago, ngbi ngume angi ki mbumba na mbumbuda ahe; si ambúmba kpaima.”—Yesaya 35:1.