Oó. Baibiri apenga gupai nga marã nga gbegberẽ he te, na si apenga gupai a nga marã nga tara gbegberẽ apai dunduko te. Gu fugo i naapehe ape gbe nga, “marã nga tarã ngbatunga gbegberẽapai dũ” si nga gu iraira saka rogo Baibiri yo navundo ri aboro yo. Gupai Baibiri agumbaha nzunzu nga ‘nyemu marã nga tarã ngbatunga gbegberẽapai dũ.’​—1 Timoteo 6:10.

•  Ginipai Baibiri apehe tipa marã?

•  Tipagine du Baibiri azahe ti ni tipa kpinyemu marã?

•  Waigu rengbe ani ka gbia undo ti gu rugute Baibiri afuhe tipa kpinyemu marã?

•  Agu averesi nga ga Baibiri nga gu nafura tipa marã

 Baibiri ima ida kuti gupai nga, ho i amangasunge ni na marã ni tatamana, si ima rengba ka du na undo ti ni, na zavura kini ‘banda boro.’ (Batungusipai 7:12) Kurii gure, Baibiri natambua agu aboro nga agu nayugo gu sino nga ga gamahe fu kura aboro nga gu naima rengba ka koda rukutu agamahe.​—Asanza 11:25.

 Ti kina gu bangisa regbo re, Baibiri ima zahe ti gupai nga ga sa marã si du ni banguapai rogo raka yo. Si nape gupai nga: “Ka oni dú nga ni akanga fu nyemu marã ya; agu ahe du be roni si ki rengbe bangironi.” (AEbere 13:5) Gupai ani awirikaha ane nga, si naida ani moi marã rogo gaha bangiriba angianga kaa dofuo aũkumuko ya. Kuba gure, si naida ani rengbe be kina agu ahe ani aidaha nzunzu, wa gu nga, riahe, roko, gbiati bambu.​—1 Timoteo 6:8.

 Aboro ngbaduse watadu gbangbati agbianga nyenye unga te. (AEfeso 5:5) Gu kura ndupai nga, gbangbati nga papara iriso kpiahe. (AKorosaio 3:5) Gu kura ndupai berewe nga, ho aboro gbangbati nikaa manga ome ni tipa ka gbia guhe nga gu i aidaha, gbangbati asanga yo i pekefuo wene bangua arugute te. Asanza 28:20 naya: “gu ni naipisa tini ka du ni irakumuko azanga nga mbusa te” watadu azanganga gbia fudifudiapai te. I ima rengba a ka du ni asadiasadi yo tipa ka manga gbegberẽ apai, wa gu nga, ka gumba ziree ti rimo boro, ka dĩ marã be boro rogo biriki, ka zio boro ngbaome tipa i ye ka tumo marã ka kusa ni, watadu ka imo boro.

 Ka si vura du nga, kpinyemu marã asanga boro ni niimangi gbegberẽ apai te, si ima rengba ka du na gu kura gbegberẽ asangbanaha ti ni. Baibiri nape gupai nga, “agu yo nakpi nyemu ka kumuko i atiwa ku rogo asada na gbina na dungu mumungo gbegberẽ nyemuahe.”​—1 Timoteo 6:9.

 Ka ani ambunga pa manga agu apai du ni wenehe gbiati agu apai nga ga toro tipa gupai nga ga marã ya, ani nika du ni iriiri rani na ki gbia ga Mbori inopai gbiati undohe. Agu aboro naida nzunzu ka sa ngbarago ti Mbori, ko nakido yo nga: “Mi ahe nga unda ro wa sa te, mi ambú nga ro a wa sa te.” (AEbere 13:5, 6) Ko nakido rani a nga, “Gu boro namanga ruruapai, ni agbia dungu amaku agbia.”​—Asanza 28:20, NW.