Guirá beʼo rabésno programas né videos ni rareʼ ló canal JW Broadcasting. Per xidal xhermanno ni noʼ ló gudx África diti labúu rabiʼ láani ló Internet. ¿Xigony?

 Portín diti tampa noʼ Internet lagarycu. Né pal noʼni guisien radxinni né nigolú car rareʼni. Por ejemplo, toib superintendente de circuit ni noʼ Madagascar bilitbu toib programa xtuny JW Broadcasting lainy toib ciber né godixbu 16 dólares. a Nili tixomal labúu rony buñ gan bidxiichcu.

 Ná cacalóyibu de clas galnagan reʼ, xidalguixo buñ de África labúu racadiagyibu programas ni rareʼ ló JW Broadcasting ná diti napyibu Internet. ¿Ximod rac guirá ndeʼ?

 De goló íz 2017, buñ ni rabés gudx África subsahariana labúu rabiʼyibu JW Broadcasting ló toib canal xtuny televisión por satélite. Canal reʼ rarecaani guirá ór né guirá dzú ló 16 diitz.

 Par labúu gacni scú, testigos xtuny Jehová raguiixyibu toib canal xtuny televisión por satélite. Señal xtuny satélite reʼ radxinni ló 35 gudxrop ni noʼ África subsahariana, né guirá beʼo riax más de 12.000 dólares. Rioʼ ór raguiixyibu stidxo par labúu guitudyibu stipnés programas. Xidal mil buñ labúu rabiʼ samblia de tzón govitz né láaca labúu racadiagyibu stipnés discurs ni ragoʼ toib representante ni riee riguen sucursal.

 Xidal buñ ná nacyibu Testigos o yaca, labúu rabiʼyibu canal reʼ ló televisión. Per noʼ xidal herman nili rigaʼlni layibu siʼyibu ni guiquiinyibu par labúu guibiʼyibu programas reʼ. Por ngú, 3.670 Salón ma nap antenas ni ragobioo señal xtuny satélite. Modreʼ herman labúu rabiʼyibu JW Broadcasting lainy Salón. Par labúu gapyibu láani, rasacni midid 70 dólares pal Salóncu ma napni toib televisión o proyector. Per pal diti nacni scú, labúu guireʼni midid 530 dólares.

 Guirá herman nigolú noʼyibu nakit por láani. Toib anciano de Camerún ná: «Par naʼ né xfamila nacni xomod maná ni godó israelitas ló yoovich». Odebode, toib hermano ni rabés Nigeria, ná: «Radopdo guirádo par labúu guibiʼdo láani tzón buelt ló tixomal. Guiráca ximbioxa rioladxyibu guidxin dzúcu. Né láaca stipnés ór ranabyibu lóodo guibiʼyibu láani». Rose, ni láaca rabés gudx Nigeria, ná: «¡Nigolú rabaladxi! Nírcu pór notísy bibiʼya, per nigoreʼ más rioladxi guibiʼya canal JW. Órni bibiʼya notísy nigolú naguel biaʼpyni naʼ né biaʼpy presión xtuni. Per ló canal JW rarecaa pór cós sacró né láaca rasialdóni xcalnabani... Ndeʼ nac canal ni más rioladxi. Nacni toib galrrascad xtuny Jehová».

 Toib superintendente de circuit ni noʼ Mozambique nábu que ló circuit xtunybu, Salón ma napni señal xtuny satélite par labúu guibiʼyibu canal JW. Herman radxin lainy Salón tib ór antes o más par labúu guibiʼyibu JW Broadcasting antes de saló reunión.

 Ló samblia internacional ni góc íz 2019 gudx Johannesburgo (Sudáfrica), biquiin canal xtuny satelite reʼ par godudy guirá discurs ni bitudy Tidxó buñ ni nap xiroʼ Galnan, ló sa gaʼ lagary. Sphumelele, ni rony dxiin ló Departamento Local de Broadcasting lainy sucursal ni noʼ Sudáfrica, ná: «Nírcu bitudydo discurs por Internet. Par labúu ñonydo láani, biquiindo Internet ni diti naroc ló né láaca biquiindo datos. Nigoreʼ ni ratudydo láani por satélite ma más barat rarecaani né ma diti raroc lóni».

 Por donación xtunyto, herman ni noʼ África labúu rabiʼyibu JW Broadcasting por satélite. Raxquixpado lóoto. Guirá dxiinreʼ labúu racni por bidxiich ni radudyto par obra mundial. Xidal donación de clas reʼ radxinni ló donate.dan124.com.