Música nacni toib galrrascad sacróyen ni radudy Jehová lóono. Ronyni que gonyno pensary ló cós tzaay, ragoʼ nakitni lóono né rioʼ gan xcalnabanyno. Scá rasacno órni racadiagno música ni rabeʼ xcudx Jehová, xomod ni rareʼ ló JW Broadcasting®. Né ni máspa, racnéni lóono guibigaxno ronoʼ Jehová.

 Ma bireʼ más de 70 canción desde íz 2014, toibtica de láani bireʼ ló más de 500 diitz. Pentzi ranabdiitzlo looyca: «¿Ximod ractzay guirá canción reʼ? ¿Né chú rony láani?».

 Comité de Enseñanza xtuny Tidxó buñ ni nap xiroʼ Galnan, rabiʼ ximod rony dxiin Equipo de Música de Servicios de Audio né Video. Equipo reʼ rony canción ni rareʼ ló JW Broadcasting né stipnés canción. Ló Equipo de Música noʼ 13 herman, layibu rabiʼyibu ximod rac organizar dxiincu, ximod ractzay letra né música ni sitnéni, láaca racaayibu cuidad stipnés dxiinien ni rac. Comité de Enseñanza ma goniʼ que labúu guiquiinyibu herman ni diti noʼ Betel par gacnéyibu ló dxiinreʼ. Ladyibu noʼ herman ni rasaʼ letra, música né ni rony cantar láani. Guirá herman reʼ nacyibu buñdxo portín diti rioladxyibu gonyxiroʼ buñ layibu por dxiin ni ronyibu.

 ¿Ximod ractzay guirá canción reʼ? Primer, Comité de Enseñanza raniʼ de xi tema xtuny la Biblia guiniʼ canción ni guireʼ né xi nainy layibu guisac buñ ni guicadiag cancioncu. Órcu Equipo de Música raniʼ chú gonytzaay música né chú guicaʼ letras xtuny cancioncu. De ngú rac grabarni, né Comité de Enseñanza racadiag láani né raniʼ xi más cayac falt loni. Por último, Equipo de Música ronytzaay láani stoib né rac grabarni. Guirá canción reʼ rac grabarni gadzéga lagary, xomod lainy stipnés sucursales o stipnés yoʼ.

 Par gactzay letra ni sitnéni né gac grabarni, herman raquiin estaciones de audio digital, programas ro labúu guicaʼyibu música né bibliotecas de audio. Per láaca raquiinyibu instrumentos musicales, mezcladoras de sonido, amplificadores, altavoces né micrófonos. Toib micrófono labúu guisacni midid 100 né 1.000 dólares o más. Ló íz 2020 góc gatz 116.000 dólares ló equipo xtuny grabación.

 ¿Xí ronyno par diti tampa gac gatz bidxiich loguiaʼni? Xalagary tzoʼ xidal herman lainy Betel ni rony dxiin ló Equipo de Música, ranabyibu xcalrracné herman ni noʼ fuer. Láaca diti raquiinyibu xidal herman ni goʼol cancioncu, layibu rony editaryibu láani né modreʼ rien que xidal buñ cayoʼol láani.

 ¡Herman rioladx guicadiag guirá canción reʼ! Por ejemplo, Tara ni rabés Alemania, ná scareʼ: «Órni nigolú noʼya ló galrrasaʼ guirá canción reʼ nigolú racnéni naʼ. Órni racadiaga láani ló xtiidza, rasaca suusi naguʼuch Jehová naʼ». Dimitri, ni rabés Kazajistán ná: «Nigolú rioladxi guicadiaga guirá canción reʼ portín diti rioʼya ló galrrasaʼ de xi raniʼni, naana que guiráni sieedni ló la Biblia. Né ni máspa canciones reʼ racnéni naʼ guidzaʼga más Jehová».

 Delia, ni rabés gudx Sudáfrica raniʼ ximod racné guirá canciones reʼ láabu. Láabu nábu: «Rasialdóni xcalnabani. Órni racalóya galnagan né noʼya nabann, guirá ór noʼ toib canción ni racné naʼ xorpani. Rioʼ ór nosi racadiaga músicacu né nimaca rasaca sacró».

 Xidalyibu rioladx guirá canciones reʼ. Lerato, ni rabés gudx Sudáfrica ná: «Canciones xomod Mápa mer né La vida de verdad racnéni naʼ gony pensary órni guiás xinaʼya lad gueʼet. Guirá ór ni racadiaga láani roni pensary que ma cabigax xinaʼya ronoʼya par cuʼuchbu naʼ».

 Noʼ toib canción ni gocné toib mbioxhlas ni rabés gudx Sri Lanka. Láabu nábu: «Xomextriya goniʼbu mal de naʼ nisló guirá xcompañera porni naca testigo xtuny Jehová. Nigolú bidzubi né dada diti bidzela xi naniya. Órni bidxina lidxi, xinaʼya góoch naʼ nacadiaga canción ni laa, Fuerte tú serás. Canción reʼ bisienni naʼ que nigolú rasac guisudi xquiichi par gaana ximod guicabi. Stoib dzúcu goninéya xomextriya. Né nigoreʼ ma bicadiagbu naʼ, láabu gochbu naʼ que órcu biembu xi láani roni crer. Nigolú radudi guixquix xcudx Jehová por ni rabeʼyibu canciones sacróyen».

 ¿Pu rabeʼyibu bidxiich par gactzay guirá canciones reʼ? Rareʼni ló donaciones ni radudyto par obra mundial, ni raxelto de xidal mod ló donate.dan124.com. Raxquixpado lóoto por ni radudyto ni napto.