Ló íz 2020, nigolú goyoʼ xidal desgrasy né gosaló pandemia COVID-19. ¿Xí buny testigos xtuny Jehová par ñacnéyibu ni cadudy ló galnagan?

 Ló íz de servicio 2020, a Comité de Coordinadores xtuny Tidxó buñ ni nap xiroʼ Galnan bidudy permís ñac gaxt 28 millón de dólares b par ñacnéni buñ ni cadudy ló desgrasy. Bidxiich reʼ biquiinni par ñacnéno buñ ló más de 200 desgrasy, xomod pandemia COVID-19, guiérodann né ro biaʼpy gueel nís gudx África, galsii ni noʼ Venezuela né láaca ro diti biquiin cosech gudx Zimbabue. Bidxiich ni bidop biquiinni par nasiʼ buñ galrro, nís, lagary ro naguaʼyibu, lairy né remeidy. Láaca biquiinni par nasiʼ buñ cós ni nasiá né par ñactzay guirá yoʼcu. Guibiʼno xi galrracné ma cuaʼ herman ni godudy ló desgrasy.

 COVID-19. Ló guidopynac Gudxlio galguitz reʼ castoʼbyni xhermanno de guirá mod. Por ngú ma noʼ más de 800 Comités de Socorro par gacné layibu. Comités reʼ cacáyibu cuidad xi galnagan cacaló herman né maca raibyibu láani Comité de Coordinadores, modreʼ labúu guicaʼ herman galrracné.

 Ló íz reʼ Comités de Socorro gocnéyibu par labúu ñap herman ni ñoo, ni ñeʼ, remeidy né stipnés cós ni caquiinyibu. Né ló tipnés lagary gocnéyibu ancianos par labúu nacaʼ xhermanno xcalrracné buñchiin.

 Buñ ni diti nac xpiin Jehová rabiʼ né radudy cuent mod racnéno saʼno. Por ejemplo, Field Simwinga, ni rasanir nisló policia lainy gudx Nakonde (Zambia), góoch xhermanno: «Noʼdo ló diʼin né lóoto portín ma gocnéto tipnés famil ni cadudy ló galsii».

 Galsii lainy gudx Angola. Xtol COVID-19, diti goyoʼ xiroʼ galrro lainy gudx Angola, né por ngú nigolú car goyoʼ guirá cós. Nigolú gosac nagan xhermanno nasiʼ galrro.

 Por ngú, gonabdo sucursal ni noʼ Brasil naxelyibu galrro ronoʼ herman de gudx Angola. Par diti naguitdo donación, herman bibiʼ pu lagary rareʼ más barat galrro, né gosiʼyibu láani por mayoreo. Bunyibu gaxt nosi 22 dólares par nasiʼyibu né naxelyibu paquet par tigaaga herman. Paquetcu góc nanaʼ midid 20 kíl, lainyni goyoʼ rros, bisaʼ né aceity. Dada nigoreʼ ma bixeldo midid 33.544 paquet, midid 654 tonelad de galrro. Guirá ndeʼ né stipnés cós ni gosiʼyibu lagarycu biquiinni par labúu nayaʼando más de 50.000 buñ.

 ¿Ximod rasac xhermanno? Alexandre, ni rabés sit de Angola, ná: «Radudi cuent ximod nigolú ronladx Jehová naʼ, diti noʼya tobi né nigolú rasaca par xcudx Jehová». Mariza, toib buñgonaʼ stoib ni ma noʼ xiin, ná: «Jehová bicadiag oración xtuni, raxquix láabu né xcudxbu».

 Diti biquiin cosech gudx Zimbabue. Ló íz de servicio 2020, diti góc guié gudx Zimbabue, bisianni xidalguixo buñ ló galsii mersi ñaityibu de galrralán. Xidalguixo herman diti gopyibu galrro.

 Goyoʼ 5 Comités de Socorro par labúu nadxin galrro ronoʼyibu. Xidalgayoʼ publicadores gocnéyibu par naguaʼtzay guirá galrrocu, bistzayibu camión né bisnabyibu xcamionyibu. c Ló íz de servicio íz 2020, góc gaxt 691.561 dólares par labúu nayaʼanno más de 22.700 buñ.

 Ló tipnés lagary ma biraa xcalrro xhermanno órni bidxin galrracnécu. Órcu xhermanno bidudy guixquix Jehová né tipnésyibu dada gosaló buny cantar canciones del Reino.

 Lainy toibtica gudx, chop hermanas ni ma nac gonaʼ viod goyeeyibu toib junt lainy gudx, ro goniʼyibu ximod nacaʼyibu xcalrracné toib organización (ONG). Per ló juntcu gosaló goniʼyibu de política, né guiropca xhermanno goloʼyibu guicyibu diti guicaʼyibu láani. Laʼga seeyibu, buñcu bixiich layibu né goniʼ scareʼ: «Ditsi guieedto witz guinabto galrro lóodo». Per chop xomalsi después, bidxin herman lagarycu né biscad galrro layibu... antes de nadxin xcalrracné ONG.

 Sacró goniʼ buñ de xcudx Jehová portín gocnébu buñ ni cadudy ló galsii lainy gudx Zimbabue. Guibiʼno ni gosaclóo Prisca, ni rabés lainy toib gudx mitien. Ná godudybu ló xiroʼ galnagan por ni diti biquiin xcosechbu, Prisca goniʼ xtiitz Dios guirá dzú miérc né dzú vierna, dada ló dzú ni ralaʼ buñ ló layoo. Buñ xcudxbu nigolú bixiich láabu né góoch láabu: «¡Xtol predicación sagaitylo xfamilo de galrralán!». Per Prisca cuapy layibu: «Jehová dipa sasian xpiin». Diti xidzú, xcudx Jehová goyné galrro ronoʼbu. Tipnés xpesinbu nigolú bidziguiaʼ né goniʼ: «Dios dipa ma bisian looy. Nainy lóodo guimbudo láabu». Nigoreʼ gatz xpesinbu racadiag reunión ló radio.

 Laʼga más cabigax xfin gudxliogoxreʼ, sacalóno más desgrasy (Mateo 24:3, 7). Raxquixpado lóoto por guirá donación ni raxelto de xidal mod ló donate.dan124.com. Nigolú saquiinni par gacnéno herman ni cadudy ló galrrioʼob.