Lainy Latinoamérica rabés xidalguixo buñ, ladyibu noʼ xidal millón ni rabés lainy ranchen ni raniʼ stoib diitz né napyibu tipnés costumbres. Xidal de xhermanno rabés lainy guirá ranchencu. Par labúu gacnéno layibu ganyibu ni ná la Biblia, testigos xtuny Jehová rony traducirno né rakiʼsno publicaciones ló más de 130 diitz ni raniʼ buñ lainy Latinoamérica. a Per xidal herman, ná rioladxyibu mod nac xcudxyibu, racalóyibu galnan portín nacyibu xpiin Jehová né diti ronyibu costumbres ni diti radzak né la Biblia. ¿Ximod caquiinno donación par gacnéno layibu?

 Lainy toib gudx huichol ni riaʼan niis Jalisco (México), herman diti gosaguel ñony tipnés costumbres ni diti radzak né la Biblia. b Ndeʼ nigolú bitzuitzni tipnés buñ xcudxyibu, por ngú 4 de diciembre íz 2017, tipnés buñ ni cadzuitzgoluʼ cualóyibu Testigos né stipnés buñ ni goyoʼ né layibu. Guirá buñreʼ bilaʼk layibu de xcudx, binitló xcósyibu né goniʼyibu que sagaityibu nitisi ni nabiguet.

 Testigos xtuny Jehová ni rabés gaxca de gudxcu godabioyibu herman. ¿Per ximod labúu nabiguetyibu lidxyibu? Toibtica xhermanno ni laa Agustín, ná: «Diti gopdo bidxiich par naguiixdo toib abogado nili gondo ximod ñacné buñchiin lóodo».

 Guirá hermanien reʼ goyoʼ ló xiroʼ riesga por ngú sucursal de Centroamérica nimaca gocné layibu. Primer, gonabyibu buñchiin de gudxcu nabiʼ xi cós mal góc lagarycu. Después, Comité de Coordinadores xtuny Tidxó buñ ni nap xiroʼ Galnan bidudy permís sucursal par ñony dxiin né Departamento de Asuntos Legales ni noʼ central mundial né nalísyibu toib demand par ñacnéyibu herman huichol. Bidxin midid, galnagan reʼ bidxinni nisló Suprema Corte de Justicia de la Nación, ndeʼ nac tribunal ni nap más galmandary lainy gudx México.

 Tipnés abogados de xidal gudxrop bitudy toib discurs ro golexayibu que xomodca stipnés buñ non gap respet mod nac guirá buñ ni raniʼ stoib diitz, guirá buñreʼ láaca non gapyibu respet né guidudyibu lagary buñ xcudxyibu guieen Dios mod rioladxyibu. Guirá clas buñ nap de derech gony ni ná.

 8 de july íz 2020, Suprema Corte de Justicia bireʼ xfavor testigos xtuny Jehová né buny mandaryibu que guirá buñcu nadudy lagary herman nabiguet lidx. Agustín, ni bisetlano nagaa, ná: «Nigolú rabaladxdo né raxquixdo herman por ni gocnéyibu lóodo. Chonan ximod narecaado pal diti ñacnéto lóodo».

 Lainy Ecuador, moda ngúca gosaclóo herman ni rabés lainy San Juan de Ilumán, toib gudxyen ni riaʼan niis valle de Otavalo, lagarycu rabés xidal buñ ni raniʼ stoib diitz. Ló íz 2014, nír gonabyibu permís de ngú gosaló bisaʼyibu Salón del Reino, per toib xobal bikíil 100 buñ ni buny lafuers herman par ma diti nasaʼyibu toib Salón lagarycu. Láaca buny mandaryibu herman ma diti ñony xireunión.

 Departamentos de Asuntos Legales ni noʼ lainy sucursal de Ecuador né central mundial toibsi bunyibu dxiin par buny defenderyibu congregación. Bidxinni ronoʼ buñchiin, né buñchiin góoch guirá biinreʼ nadudy lagary herman nasaʼ Salón né ma diti natzaldaʼyibu herman. Par ma diti nasacloyibu ndeʼ stoib, abogados xtuny herman gonabyibu buñchiin nabexa galnagan reʼ: ¿guirá ranchen ro raniʼ buñ stoib diitz láaca non gapyibu permís guienyibu Dios mod nainy layibu la?

 16 de july íz 2020, Corte Constitucional ni noʼ Ecuador, ni nap más galmandary lainy gudxcu, golexa galnagancu. Ni gosanir nislóni gocyibu abogados de gudx Ecuador. Ladyibu láaca goyoʼ sa stap herman de stipnés gudxrop ni láaca nac abogados. Xtol COVID-19, reunión reʼ gocni lainy xidal gudxrop por videoconferencia. Ndeʼ primerdiguieʼ buelt ni toib tribunal radudy lagary abogados ni nap testigos xtuny Jehová gony láani scareʼ. c Guirá abogados reʼ gochyibu buñchiin de stipnés gudxrop que ná toib buñ nac buñ ranchen né raniʼ stoib diitz, láaca napyibu derech gonyibu ni nainy layibu.

 Dada por nagais herman de valle de Otavalo cabésyibu xi guiniʼ Corte Constitucional né radudyibu guixquix por galrracné ni cuaʼyibu. César, toib anciano ni noʼ lainy congregación Ilumán Quichua, ná: «Nosi Jehová racnégoluʼ goxeʼyensi buñ».

 Guirá abogados ni gosanir né gocné herman, nacyibu testigos xtuny Jehová né diti biaxyibu ni tiplaʼ bidxiich. Per par labúu nadxinyibu nisló buñchiin, nasuidyibu xquiichyibu né ñony defenderyibu herman la, gonabni tiemp né bidxiich. Abogados ni napno né stipnés herman bunyibu gaxt más 380 ór par nabexayibu galnagan ni goyoʼ México né sa 240 ór par ñac traducir guiichcu. Láaca midid 40 abogados biquiin xidalgayoʼ ór loguiaʼ galnagan ni goyoʼ Ecuador. ¿Ximod biax guirá gaxt reʼ? Labúu gocni por guirá donación ni raxelto de xidal mod ló donate.dan124.com. Raxquixpado lóoto portín radudyto ni napto.