«Ma buni prueby ñoola la Biblia, per nigolú xiroʼni» (Briana, 15 íz).

 ¿Modcuca rasaclo la? Pal scú nacni, artículo reʼ sacnéni looy.

•  ¿Xigony rasac goʼol buñ la Biblia?

•  Tipnés mod par labúu goʼolo la Biblia

•  Ni raniʼ stipnés mbioxhlas

 ¿Ronylo crer que órni buñ roʼol la Biblia raxacladx la? Wal rasac buñ scú. Sigory ronylo pensary que la Biblia nacni toib libro ni nap más de tipmil páginas né letras mitien né diti sitnéni dibuj. ¡Diti nacni xomod televisión né videos!

 Per bibiʼ láani modreʼ: pal nadzelo toib cajien ni ma xidzú de goloʼ noʼ né lainyni noʼ toib cós ni rasacgoluʼ, ¿nigolú nachiinni looy naxalcalo láani ja?

 ¿Nanlo la? La Biblia nacni xomod caj ni notzay cós ni rasacgoluʼ lainy. Loni sadzelo xidal cós ni rasacgoluʼ, né sacnéni looy par:

•   Gonylo xinésni.

•   Guidzaklo bixioslo né xinaʼlo sacró.

•   Guidzelo ximigdxinlo.

•   Diti tzoʼlo ló galrrasaʼ.

 ¿Ximod labúu gacné lóono toib libro ni ma xidzú noʼ? Labúu sacnéni lóono portín «guirá Escrituras sieedni de Dios» (2 Timoteo 3:​16). Ndeʼ radudy diitz que guirá consej ni sieed ló la Biblia sieedni de Dios, ni bisaʼ guirá cós ni noʼ.

 Toib mod ni labúu gonylo láani, salólo de Génesis a Apocalipsis. Ndeʼ sacné looy par guidudylo cuent xi rasetlaa la Biblia. Labúu gonylo láani de xidal mod. Guisuidyno chop ejemplos:

•    Labúu goʼolo 66 libros ni sitnéni, de Génesis a Apocalipsis.

•    Labúu goʼolo la Biblia xomodpa gocni dzúna dzú.

 Ni labúu gonylo: Ló midid 4A de follet ni laa Ni gacné lóono guientzaayno xtiitz Dios, cú sadzelo toib lista de guirá ni buny Jesús órni goyoʼ ló Gudxlio.

 Ni rarop mod ni labúu gonylo ngú, guiyopylo toib historia ni rasetlaa galnagan ni cacalólo. Por ejemplo:

•   ¿Ñoladxlo ñaplo ximigdxinlo ni labúu ñaplo confianz ló la? Pal scú láani, bíil historia xtuny Jonatán né David (1 Samuel, capítulos 18 a 20). De ngú buny ni ná, «¿Xí labúu gonylo par guidzelo ximigdxinlo?» par labúu guienlo xi rasuidy historia reʼ looy.

•   ¿Ñoladxlo ñaplo más fuers par labúu nacalólo guirá tentación la? Labúu goʼolo historia xtuny José par labúu ganlo xi láani bunybu órni cualóbu tentación (Génesis, capítulo 39). De ngú buny ni ná, «¿Xí labúu gonylo par guicalólo guirá tentación?» né ni ná «Buñ bigotz dool láabu» ni sacné looy.

•   ¿Nainy looy ganlo ximod labúu gacné oración looy la? Bíil xi láani gosaclóo Nehemías (Nehemías, capítulo 2). De ngú buny ni ná «Jehová cuapy oración xtunybu» ni sacné looy.

 Ni labúu gonylo: Órni ni nainy looy goʼolo la Biblia, biyopy toib lagary ro yadi ruid par labúu guienlo ni cayoʼolo.

 Ni rion mod, guiyopylo toib historia o toib salmo, goʼolo né de ngú gonylo pensary ximod labúu gacnéni looy. Órni ma bilox bíilo láani, gonabdiitz ndeʼ looy:

•    ¿Xigony bicaʼ Jehová diitzreʼ ló la Biblia?

•    ¿Xí rasuidy ndeʼ naʼ mod rony Jehová, né mod ronybu guirá cós?

•    ¿Ximod labúu gacné naʼ ni suusi bilox bíila?

 Ni labúu gonylo: Goloʼ guiclo gonylo ndeʼ. Labúu guicaʼlo pu dzú salólo goʼolo la Biblia, labúu guiquiinlo «Programa par goʼol buñ la Biblia», né sadzelo láani ló página xtunydo.