Yaca dipa ma goyoʼ ór bunydo láani. Órni raduidydo cuent que tipnés cós ni ronydo crer diti radzaktzayni né ni rasuidy la Biblia, ratzaʼdo ni ronydo crer.

 Guirá ni ronydo crer rareʼni ló Xtiitz Dios. Né ná ma ló íz 1950 gosalódo buny imprimirdo Traducción del Nuevo Mundo de las Santas Escrituras, antes de íz reʼ gosalódo bisuidytzaydo ni ná la Biblia né biquiindo stipnés biblias ni noʼ. Nigoreʼ guisuidydo xí crenys gopdo antes ni nadxin ñapdo Traducción del Nuevo Mundo. Nigoreʼ más stip looy gon pal ni goʼol lo reʼ radzakni né ni rasuidy la Biblia.

1.   Ni ronydo crer: Dios diti nac toib trinidad. Ló número de july íz 1982 revista xtuny Zion’s Watch Tower (ni ló dixtil nac La Atalaya) goniʼni: «Buñ ni roʼol revista ni rabeʼdo nanyibu que ná ronydo crer lóo Jehová Dios, lóo Jesús né espíritu santo, diti racacuentdo galrrasuidy ni ná que Jehová, Jesús né espíritu santo nacyibu tzón dios ló toibsi buñ, portín galrrasuidy reʼ diti sieedni ló la Biblia».

     Ni rasuidy la Biblia: «Jehová Dios xtunyno, Jehová toibsi láabu» (Deuteronomio 6:4, Reina-Valera [RV], 1865). «Noʼ toibsi Dios ni nac Bixiosno, ni nac xpixuan guirá cós, né lóono nacno de láabu, né toib señor Jesucristo.» (1 Corintios 8:6, RV, 1865; ortografía actualizada.) Jesús láacabu goniʼbu: «Padre nacbu lagol lóoya» (Juan 14:28, Torres Amat, 1823).

2.   Ni ronydo crer: buñ mal diti cadudy ló galrrioʼob por tipzó ló infierno. Revista Zion’s Watch Tower beʼo juny de íz 1882 bitnéni tema ni laa «El salario del pecado es la muerte». Tema ni bisetlaa revista reʼ sieedni ló Romanos 6:23 ro náni scareʼ: «¡Nigolú nayadit nac diitzreʼ! Xidal buñ raluladx que la Biblia nacni Xtiitz Dios per ná scú diti raluladxyibu ni ná texto reʼ né láaca nadip rac xtiitzyibu que la Biblia rasuidy que buñ raguiix xcalkié órni rabany por tipzó ló infierno».

     Ni ná la Biblia: «Alma ni rony galkié alma cuca saity.» (Ezequiel 18 4, 20, RV,1865). Castig ni guicaʼ guirá xí enemig Dios diti nacni que tzeeyibu ló guii xalagary ngú nacni «galrranitló» por tipzó xomod ná Nácar-Colunga de 1944 ló 2 Tesalonicenses 1:9.

3.   Ni ronydo crer: Gobierno xtuny Dios diti napno láani lainy galnabany. Revista Zion’s Watch Tower beʼo diciembre íz 1881 bisetlani de Gobierno xtuny Dios: «Órni Gobierno reʼ ma gonyni dxiin, sanitlóni guirá gobierno xtuny buñ ni noʼ ló Gudxlio».

     Ni ná la Biblia: «Né ló xtzú guirá gobiernos cú, Dios ni noʼ guibá sagoʼ toib Gobierno, ni dipa sanitló, né Gobierno reʼca diti sadudyni ladxña stoib gudx: xalagary ngú sonynoyni né sanitlóni guirá gobiernos reʼ: né láacani sony mandaryni por tipzó.» (Daniel 2:44, Scío de San Miguel, 1850; ortografía actualizada).

 Yaca; lóodo ni nacdo testigos xtuny Jehová raquiindo xidal clas biblias par guisuidydo buñ ni ronydo crer. Nigolú láani que láaca órni raibydo buñ guisuidydo layibu scásiʼ láaca raibydo layibu que labúu guiduidydo toib Traducción del Nuevo Mundo layibu. Per pal noʼ buñ ni ná guisuidy né stipnés biblias rasagueldo guiquimbu gadzé biblias.