1. Кинчектерин алынып турган улуска Иегова нени айдат?

 ИЕГОВА јӱк ле Јайаачы, Јасак Береечи ле Јаргычы эмес, ол анайда ок килеҥкей, теҥеридеги Адабыс (Сар. 100:3; Иса. 33:22). Качан бис кинчек эделе, акту јӱрегистеҥ јастырганысты алынып турзаас, Иегова кинчегисти таштап та јат, таштаарга кӱӱнзеп те јат (Сар. 86:5). Иегова судурчы Исайя ажыра бисти сӱӱп, мындый сӧстӧр айдат: «Слердиҥ кинчектеригер јарык кызыл бӧстий болзо, олор ак кардый болуп калар» (Иса. 1:18).

2. Улусла амыр-энчӱ јадарга не болужар?

² Бис ончобыс толо кеминде эмезистеҥ улам сӧстӧрисле, керектерисле улусты тӱҥей ле ачындырып ийедис (Иак. 3:2). Андый да болзо, бис улусла амыр-энчӱ јадар аргалу. Је јаҥыс, олордыҥ јаманын таштап турар керек (Укаа 17:9; 19:11; Матф. 18:21, 22). Бисти кем-кем ачындырып ийген болзо, бис оныҥ јаманын таштап саларыс деп Иегова кӱӱнзейт (Кол. 3:13). Бисте улустыҥ јаманын таштабайтан шылтак јок, нениҥ учун дезе Иегова бистиҥ бойыстыҥ да коркышту кӧп кинчектеристи таштап јат (Иса. 55:7).

3. Бу јӧрмӧлдӧҥ нени билип аларыс?

³ Бу јӧрмӧлдӧҥ бис толо кеминде эмес улус, толо кеминде Кудайдаҥ неге ӱренер аргалу деп ле улустыҥ јастыраларын канай таштаар керек деп, билип аларыс. Анайда ок мындый сурактардыҥ карууларын билип аларыс: Кандый кинчектерди аксагалдарга айдар керек? Иегова бисти нениҥ учун улустыҥ јаманын таштазын деп ӱредет? Улустыҥ кинчегинеҥ улам шыралаган ака-эјелердиҥ учуралынаҥ неге ӱренип аларыс?

4. а) Иегованыҥ ишчизи уур кинчек эдип ийген болзо, нени эдер учурлу? б) Аксагалдарга кандый јаҥ берилген?

⁴ Кемди-кемди уур кинчек эткен деп, билип ийген болзоос, бис оны аксагалдарга айдар учурлу. Андый уур кинчектерге кандый керектер кирип турганы 1 Коринфтегилерге 6:9, 10-до бичилген. Уур кинчек ол — Кудайдыҥ јасагын бусканы. Оныҥ учун кинчек эткен кижи бойыныҥ кинчегин Иеговага куучындаар учурлу. Оноҥ ол јуунныҥ аксагалдарына баштанып јат (Сар. 32:5; Иак. 5:14). Мындый айалгада аксагалдар нени эдет? Кижиниҥ кинчегин Христостыҥ тайылгазына тӧзӧлӧнип таштайтан јаҥ јӱк ле Иеговада бар *. Је ол кинчек эткен кижи јуунда артар ба, јок по деп, Агару Бичиктиҥ болужыла шӱӱп сананатан јаҥды аксагалдарга берген (1 Кор. 5:12). Оныҥ учун аксагалдар мындый сурактарды сананар учурлу: Кижи кинчекти биле тура эткен бе? Кинчегин јажырып турган ба? Кинчек эдип турганы удаап калган ба? Эҥ јаан учурлу сурак: кижи кинчегин акту јӱрегинеҥ алынып турган деп, недеҥ кӧрӱнет? Анайда ок Иегова оныҥ кинчегин таштап салган деп, недеҥ-недеҥ кӧрӱнип турган ба? (Ап. ижи 3:19).

5. Кинчек эткен кижиле аксагалдар нениҥ учун јолыгат?

⁵ Аксагалдар кинчек эткен кижиле нениҥ учун јолыгып јат? Нениҥ учун дезе аксагалдарга јӧп чыгарар керек, а ол јӧп теҥеридеги Кудайдыҥ јӧбиле тӱҥей болор учурлу. Оныҥ учун аксагалдар мӱргӱп, Агару Бичиктеҥ принциптерди ле јакаруларды јазап туруп шиҥдеп јат (Матф. 18:18). Анайып, олор Кудайдыҥ јуунын корулайт. Кинчек эткен кижи кинчегин бойына алынбай турза, аксагалдар јууннаҥ ол кижини чыгарып салат. Анайып, ол Кудайдыҥ баалу койлорына каршузын јетирип болбос (1 Кор. 5:6, 7, 11—13; Тит. 3:10, 11). Кезик учуралдарда кинчек эткен кижиге аксагалдар кинчегин бойына алынарга болужып берет. Оноҥ, Кудай ол кижиниҥ јастыразын ӧткӱрип салат (Лука 5:32). Ол тушта аксагалдар ол учун мӱргӱп, Кудайдаҥ бу кижиниҥ кӧгӱс јанын тыҥыдып берзин деп сурагылап јат (Иак. 5:15).

6. Јууннаҥ чыгардырып салган кижиниҥ јаманын Иегова таштаар ба? Јартап беригер.

⁶ Темдектезе, кинчек эткен кижиле аксагалдар јолыгарда, ол кижи кинчегин алынбаган болзын, бу тушта оны јууннаҥ чыгарып салат. Ол кижи ороонныҥ јасагын бускан болзо, аксагалдар оны корулабай јат. Нениҥ учун дезе, Иегова ороонныҥ јаҥдарына «јаманды эдип јӱрген» кажы ла кижини, ол кижи кинчегин алынза да, алынбаза да кату каруузына тургуссын деп јарадып салган (Рим. 13:4). Је кийнинде андый кижи санаа алынып, акту-јӱрегинеҥ јастыразын алынып тӱзединзе, Иегова сӱӱнип, оныҥ кинчегин таштап салар (Лука 15:17—24). Кандый да уур кинчек эдилген болзо, Иегова оныҥ кинчегин ӧткӱрип койор (2 Лет. 33:9, 12, 13; 1 Тим. 1:15).

7. Биске удура кинчек эткен кижиниҥ јаманын таштап салганы нени темдектейт?

⁷ Биске Иегованыҥ ордына кижиниҥ кинчегин таштайтан ба, јок по деп, шӱӱп сананатан јаҥ берилбегени кандый јакшы! Је бисте тӱҥей ле бир арга бар. Кандый? Кижи бистеҥ «јаманым ташта» деп сурабаган да болзо, бис оныҥ јаманын таштап салар аргалу. Бу дезе ол кижиге ичисте база ачу тутпай турганысты ла ого  чугулданбай турганысты кӧргӱзет. Је бу јеҥил неме эмес, анчада ла кижи бистиҥ јӱрегисти тереҥ шыркалаган болзо, кӧп ӧй лӧ ийде-кӱч керек болот. 1994 јылдыҥ, сыгын айыныҥ 15-чи кӱниниҥ «Каруулчы шибеезинде» мындый сӧстӧр бичилген: «Кижиниҥ јаманын таштаганы — оныҥ кинчегин јарадып турганын кӧргӱспей јат. Христиан кижи кемниҥ-кемниҥ кинчегин таштаганы дегени, ол дезе бу керекти Иегова кӧрзин деп артыргызып салганын темдектейт. Нениҥ учун дезе Иегова Кудай бастыра јер-телекейдиҥ ӱстинде эҥ ле чындык Јаргычы. Бойыныҥ ӧйинде ол справедливостьты орныктырып салар». Айдарда, Иегова бисти улустыҥ кинчегин таштап, ӱзе оныҥ колына берип салзын деп, нениҥ учун кӱӱнзеп турган?

8. Иегованыҥ буурзагы учун быйанысты канай кӧргӱзерис?

⁸ Бис улустыҥ кинчегин таштап турзаас, Иегованыҥ килеҥкейине јаан быйанысты кӧргӱзедис. Бу керегинде Иисус укаа сӧс куучындаган. Ол Кудайды каанга тӱҥдештирген. Бу каан кулыныҥ андый јаан тӧлӱзин бӧктӧп койгон. А бу кул нӧкӧрин бир де килебей, оныҥ бир кичинек тӧлӱзин алымдаган (Матф. 18:23—35). Иисус бисти неге ӱредерге сананган? Бис Иегованыҥ сӱреен јаан килеҥкейине быйанду болзоос, ӧскӧ улустыҥ кинчегин ӧткӱрерге албаданадыс (Сар. 103:9). Канча да јыл кайра бир «Каруулчы шибееде» бичилгениле болзо, бис канча да кире улустыҥ кинчегин таштап турзаас, је Иегованыҥ биске буурзап, Иисус ажыра канча кире кинчегисти таштап турганына бир де јетпес.

9. Иегова кандый улусты килеп јат? (Матфей 6:14, 15).

⁹ Улустыҥ јаманын таштазаас, Иегова бистиҥ де јаманысты таштаар. Иегова килеҥкей улусты килеп јат (Матф. 5:7; Иак. 2:13). Бу шӱӱлтени Иисус канай мӱргӱӱр керек деп јартап турарда айткан. (Матфей 6:14, 15 кычырыгар.) Бу ла шӱӱлтени Иегова алдындагы ӧйдӧ Иовло куучындажып турарда база айткан. Иов дезе Кудайга чындык кижи болгон. Је ого Элифаз, Билдад, Цофар коркышту ачу сӧстӧр айтканына ачынган. Андый да болзо Иегова Иовты олор учун мӱргӱзин деген. Иов дезе Кудайдыҥ сӧзин угуп, олор учун мӱргӱген. Анайып Иегова оны кайрал јок артыргыспады (Иов 42:8—10).

10. Кемге-кемге ачынып јӱргени кандый каршу јетирет? (Эфестегилерге 4:31, 32).

¹⁰ Ачынганысты ичиске тӱӱп алзаас, бойыска ла каршулу. Ачыныш јӱректе таш болуп, туруп калат. А Иегова бисти не де уурлатпазын деп кӱӱнзейт. (Эфестегилерге 4:31, 32 кычырыгар.) Агару Бичикте мындый сӧстӧр бар: «Чугулданба, калјуурба» (Сар. 37:8). Бу сӧстӧрди бӱдӱрзеес, сӱреен ойгор болор нениҥ учун дезе ачыныш эди-каныска, эмоциональный да јаныска јаан каршузын јетирет (Укаа 14:30). Кижиге ачынып турзаас, бисти ачындырган кижини корондоорго коронды бойыс ичип алганыска тӱҥей. Айдарда, кижиниҥ јаманын таштап салзаас, биске бойыска ла јакшы болот (Укаа 11:17). Јӱрегисте амыр боло береле, Иеговага иштейтен буудак јоголо берет.

11. Агару Бичик ӧч алары керегинде биске нени айдат? (Римдегилерге 12:19—21).

¹¹ Ӧч алатан јаҥ јаҥыс ла Иегова Кудайда бар. Иегова бисти ачындырган улустаҥ ӧч аларга јаратпаган. (Римдегилерге 12:19—21 кычырыгар, ЈТ.) Толо кемдӱ эмезистеҥ улам, бис кезик немени  Иегова чылап кӧрӱп болбой јадыс (Евр. 4:13). Кезикте бистиҥ сезимдерис кӧзисти туй бӧктӧп салат. Оныҥ учун Иегова Иаков ажыра мындый сӧстӧр айткан: «Кижиниҥ чугулы Кудайдыҥ чындыгына келишпей јат» (Иак. 1:20, ЈТ). Иегова качан да тууразында артып калбас, ол бойыныҥ ӧйинде справедливостьты орныктырып салар деп, бир де алаҥзыбай јадыс.

12. Иегова справедливый Кудай деп недеҥ кӧрӱнет?

¹² Улустыҥ јаманын таштаганысла Иегованы справедливый Кудай деп алаҥзыбай турганысты кӧргӱзедис. Јаргыны нениҥ учун Иеговага артыргызып турар керек? Нениҥ учун дезе кинчектеҥ улам эдилген каршуны ол удабас ӱзе јоголтып салар. Јаҥы телекейде Иегова бистиҥ бастыра психологический шыркаларысты эмдеп койор. Оныҥ сӧзинде мындый сӧстӧр бар: «Озогызы санаага да, јӱрекке де келбес» (Иса. 65:17). Је улуска ачынбайтан, чугулданбайтан арга чыннаҥ ла бар ба, анчада ла качан кижиниҥ јӱрегине тереҥ шыркалар эдилген болзо? Эйе, бар. Бу керегинде кезик учуралдар кӧрӱп ийектер.

13, 14. Энтониниҥ учуралы биске кандый тем болуп јат?

¹³ Бистиҥ кӧп ака-эјелер олорго удура јаман эткен улустыҥ кинчегин таштап койдылар. Иегова олорды канайып кайралдаган?

¹⁴ Эмди Энтони * деп аканыҥ учуралын кӧрӱп ийектер. Ол Филиппиныда јадып турган. Бир катап Энтониниҥ акаларыныҥ бирӱзин, Хосе деп атту кижи ӧлтӱрип койгон. Мынаҥ улам Хосени тӱрмелеп салгандар. Је оноҥ ол канча да ӧйдӧҥ тӱрменеҥ чыгып келген. Байа Энтони Хосени бедиреп, ӧчин аларга, ӧлтӱрерге сананган. Ол оны ӧлтӱрерге пистолет те садып алган. Энтони коркышту кату казыр кижи болгон. Је ол Иегованыҥ Керечилериле танышкан. Оноҥ Энтони Агару Бичикти ӱренип тура, кылыгын, јӱрӱмин солып, ичинде јуулып калган чугулын јоголтоор керек деп оҥдоп ийген. Јада тура, Энтони сууга чӧҥӱрилип, јуунда аксагал болуп калган. Кӧрӧр болзо, Хосе деп кижи база сууга чӧҥӱрилип,  Иегованыҥ Керечизи болуп калтыр. Мыны угала Энтони оной тыҥ кайкаган! Оныҥ кийнинде эки ака јолыгыжала, куучактажып ийген. Оноҥ Энтони Хосеге мынайып айткан: «Мен сеге эмди бир де ачынбай турум. Ӱзе эткен јаманыҥды таштап койгом». Мынайып, Энтониниҥ јӱрегине јаан сӱӱнчи келген. Андый суунчи Иегованыҥ берген јаан кайралы!

15, 16. Питер ле Сьюниҥ учуралынаҥ бис неге ӱренедис?

¹⁵ Эмди Питер ле Сью эш-нӧкӧрлӧрдиҥ учуралын кӧрӱп ийектер. 1985 јылда олор јуунныҥ туштажузында болордо, Каандыктыҥ Туразында коркышту тыҥ бомба јарылган. Мынаҥ улам Сью эје јаан шыркалар алган *. Кӧзи ле кулагы јазап иштебей барган, а јытты чек албай барган. Питер ака ла Сью эје бойынаҥ сурагылап туратан: «Мындый јаман кинчекти кем этти не?» Је канча да јылдаҥ бомба салган кижи табыла берерде, оны бастыра јӱрӱмине тӱрмеге отургызып салгандар. Бу ака-эјеге: «Слер ол кижиниҥ кинчегин таштаганаар ба?» — деп сурак берилерде, олор мындый каруу берген: «Иегова бисти улуска ачу тутпазын деп кӱӱнзейт. Нениҥ учун дезе мынаҥ улам бистиҥ эди-каныска ла психический јаныска јаан каршу јетирилет. Оныҥ учун ол ло ӧйдӧҥ ала бис Иеговага мӱргӱп, ол кижиге јаман сананбаска, оноҥ ло ары амыр јӱрерге болуш сураганыс».

¹⁶ Бу экӱге ол кижиниҥ јаманын таштаарга јеҥил болгон бо? Јок. Олор мынайып куучындайт: «Кезикте Сьюзиниҥ ол учуралдаҥ табылган оорулары ойто ло тыҥып келет. Андый ӧйдӧ бис экӱниҥ ачуугыс кайнай берет. Је андый да болзо, андый јаман санааларды башка тутпаска албаданып јадыс. Анайып, јаман сезимдер тӱрген јоголып калат. Бис экӱ сананып јадыс, ол бомба салган кижи кийнинде качан-бирде бистиҥ ака болуп калза, тыҥ сӱӱнер эдис деп. Агару Бичиктиҥ принциптери чыннаҥ ла јайым берип турган деп оҥдоп алганыс. Андый јайымныҥ тузазын бис јетире оҥдобой до турган  болорыс. Анайда ок улустыҥ эткен каршуузын Иегова Кудайыс удабас јоголтып салар».

17. Мираныҥ учуралынаҥ бис неге ӱренип аларыс?

¹⁷ Је эмди Мира эјениҥ учуралын кӧрӱп ийектер. Ол Агару Бичикти ӱренип баштаарда, ӧбӧӧндӱ ле эки кичинек балалу болгон. Оныҥ ӧбӧӧни Кудайды чек керексибеген. Байагы ӧбӧӧни ӧскӧ кижиле коноло, билезин таштап, јӱре берген. Мира мынайып куучындайт: «Менде јуук улузына таштаткан улуста болуп турган сезимдер болгон: ачыныш, бойымды бурулаш, кородош. Јӱрегиме андый ачу болгон. Мынаҥ улам Иеговала да, улусла да колбуларым ӱрелип баштаган. Ачуум чек ӧтпӧй турган болгон». Је Мира јакшы јанындӧӧн сананып баштаган. Келер ӧйдӧ Кудай кандый амыр-энчӱ, токыналу, јараш јӱрӱм экелер деп сананып турарда, јӱрегине токынал келген. Оноҥ Мира айдат: «Балдарымныҥ адазы Кудайдыҥ Керечизи болуп калза, јакшы болор эди. Эмди мениҥ ачуум ӧдӱп калган». Мира эмди јӱрӱмге јакшызынып јӱрет. Эки уулын Иегованыҥ Керечизи эдип ӧскӱрип алган. Эмди олор ончозы билелериле кожо Кудайга иштеп, сӱӱнчилӱ јӱрӱп јат.

18. Бис Иегованы Улу Јаргычы деп, нениҥ учун бӱдӱп јадыс?

¹⁸ Јаргылайтан јаҥды Иегова биске бербегени кандый јакшы! Бу јаҥды Улу Јаргычы бойына артыргыскан. Бу уур јӱкти карын биске бербеген (Рим. 14:10—12). Иегова кандый бир јаргы чыгарып јатса, бойыныҥ бийик нормаларыла јаантайын башкарынар деп алаҥзыбайдыс (Баш. 18:25; 1 Каан. 8:32). Иегова качан да справедливый эмес јаргы этпес!

19. Эҥ јакшы Јаргычы, Иегова, келер ӧйдӧ биске нени эдер?

¹⁹ Иегованыҥ удабас кинчектиҥ каршузын јоголтып саларын энчикпей сакып јадыбыс. Бистиҥ эди-каныстыҥ ла эмоциональный ооруларысты ол ӱзе эмдеп салар. Олор бистиҥ санаагыска да качан да келбес (Сар. 72:12—14; Ачыл. 21:3, 4). Је Иегова биске бӱгӱнги де кӱнде болужып турганын тыҥ баалап јадыс. Бис улустыҥ јаманын оныҥ темиле, оныҥ болужыла таштап турган эмейис.