15 YATICHÄWI
¿Khitis Jesusajja?
Jesusajja nayra tiempon jakawayapki uka wali uñtʼat jaqenakat maynïriwa. Walja jaqenakaw Jesusan sutip yatipjje, ukampis jukʼanikiw jupar sum uñtʼapjje. Waljanirakiw Jesusat kunaymaninak amuyapjje, ukampis ¿kunsa Bibliajj Jesusat yatichpacha?
1. ¿Khitis Jesusajja?
Jesusajja alajjpachan jakiri wali chʼamani mä angelawa. Jehová Diosajj juparuw taqe kunat sipansa nayraqat luräna. Ukatwa “taqpach luratanakatjja juparakiw nayrïrejja” sasin Bibliajj qhanañchi (Colosenses 1:15). Jesusarojj Jehová Dios pachpaw lurawayi, ukatwa Jesusajj Diosan ‘mä sapa Yoqapawa’ sasin Bibliajj qhanañchi (Juan 3:16). Jesusajj Jehová Dios Awkipamp chikaw trabajiwayi, jupaw taqe kun lurañatak yanaptʼawayi (Proverbios 8:30 liytʼäta). Jichhakamas jupanakajj wali sum apasipjje. Jesusajj ‘Aru’ satarakiwa, mä arunjja jupajj Diosat jan jitheqtiri yatiyiripawa, jupaw Awkipan instruccionanakapsa yatiyäwinakapsa yatiyi (Juan 1:14).
2. ¿Kunatsa Jesusajj aka oraqer jutäna?
Jehová Diosajja mä 2.000 maranak nayraw mä milagro lurawayi, Jesusan vidap espíritu santop toqew María sat mä virgen tawaqon purakapar uchäna, ukhamatwa Jesusajj mä jaqjam nasïna (Lucas 1:34, 35 liytʼäta). Jehová Diosaw Jesusarojj Cristöñapataki, jan ukajj Mesiasäñapatak aka oraqer khitanïna, ukhamat jaqenakar salvañapataki. a Mesiasat parlir taqe profecianakajj Jesusjjaruw phoqasïna. Ukhamatwa jaqenakajj ‘Cristötapa, jakkir Diosan Yoqapätap’ amuyapjjäna (Mateo 16:16).
3. ¿Jesusajj kawkinkaskisa?
Jesusajj jiwjjäna ukhajja, Jehová Diosaw juparojj mä angeljam jaktayäna, ukatsti Jesusajj alajjpacharuw kuttʼjjäna. Ukanjja “Diosajj jukʼamp jilankki uka puesto churäna” (Filipenses 2:9). Jichhasti Jesusajj wali chʼamani mä angeläjjewa, Jehová Diosakiw jupat sipansa jukʼamp chʼamanejja.
JUKʼAMP YATJJATAÑÄNI
Jesusajj khitisa, kunatsa jupar uñtʼañajj wali wakiskirejja ukanakatwa jichhajj yatjjatañäni.
4. Jesusajj janiw Taqe Chʼamani Diosäkiti
Jesusajj alajjpachan wali chʼamani angeläkchisa, Jehová Dios Awkiparojj istʼapuniwa sasaw Bibliajj qhanañchi. ¿Kunatsa ukham sistanjja? Jesusampi Taqe Chʼamani Jehová Diosampejj kunansa mayjäpjje uka toqet Bibliajj kamsisa uk amuyañatakejja, VIDEO uñtapjjäta.
Jesusampi Jehová Diosampejj kunansa mayjäpjje uk amuyañatakejja, akjjar jutki uka textonakaw yanaptʼistani. Sapa texto liytʼasajja aka toqetwa parltʼapjjäta:
Lucas 1:30-32 liytʼapjjäta.
-
Angelan arsutaparjamajja, ¿kunansa Jesusampi ‘Jachʼa Jehová Diosampejj’ mayjäpjje?
Mateo 3:16, 17 liytʼapjjäta.
-
Jesusajj bautisaskäna ukhajja, ¿alajjpachat istʼaskäna uka arojj kamsänsa?
-
¿Khitis uka arunak arsüna?
Juan 14:28 liytʼapjjäta.
-
¿Khitis jukʼamp jilïrisa jukʼamp autoridadanisa, mä awkiti jan ukajj yoqapacha?
-
Jesusajj Jehová Diosarojj ‘Awki’ sasaw säna, ¿ukham sasajj kamsañsa Jesusajj munaskäna?
Juan 12:49 liytʼapjjäta.
-
¿Awkijampi nayampejj pachpakïpjjtwa sasat Jesusajj amuypachäna? ¿Jumajj kunsa uka toqet amuyta?
5. Kunanakas Jesusan Mesiasätap uñachtʼayi
Mesiasajj khitïnsa, mä arun khitirus Diosajj taqe jaqenakar salvañapatak ajllïna uk jaqenakan amuyapjjañapatakejja, Biblian walja profecianakaw uka toqet utji. Jesusajj aka oraqenkkäna ukhajj kuna profecianakas jupjjar phoqasïna uk yatiñatakejja, VIDEO uñtapjjäta.
Biblian qellqat profecianak liytʼasajja, aka toqetwa parltʼapjjäta:
Mesiasajj kawkinsa nasiñapäna uk yatiñatakejja Miqueas 5:2 liytʼapjjäta. b
-
¿Jesusajj naskäna ukhajj uka profeciajj phoqasïnti? (Mateo 2:1).
Mesiasajj kunjamsa jiwañapäna uk yatiñatakejja Salmo 34:20; Zacarías 12:10 liytʼapjjäta.
-
¿Uka profecianakajj phoqasïnti? (Juan 19:33-37).
-
Uka profecianakan phoqasiñapatakejja, ¿Jesusajj amanutti munañaparjam kuns mayjtʼaypachäna?
-
¿Kunsa taqe ukanakajj Jesusat yatichistu?
6. Jesusar sum uñtʼañajj yanaptʼistuwa
Jesusat yatjjatañasa, kun lurañapatakis Diosajj aka oraqer khitaniwayi uka toqet yatjjatañasa, kunja wakiskirisa uk Bibliaw qhanstayi. Juan 14:6; 17:3 liytʼasajja aka toqetwa parltʼapjjäta:
-
¿Kunatsa Jesusar uñtʼañajj wali wakiskirejja?
Diosan amigopäñasatakejj Jesusaw thakejja, jupaw Jehová Diosat kunatï cheqäki uk yatichäna, Jesús taypirakiw wiñay jakañ katoqsna.
YAQHEPANAKAJJ AKHAM SAPJJEWA: “Jehová Diosan Testigonakapajj janiw Jesucristor creyipkiti” sasa.
-
¿Ukham sapjjeristam ukhajj kamsasmasa?
¿KUNSA YATEQAWAYTAN?
Jesusajj wali chʼamani angelawa, Diosan Yoqapawa, jutañapäkäna uka Mesiasarakiwa.
Amtañataki
-
Jesusaw ‘taqpach luratanakat nayrïrejja’ sasajj ¿kunatsa Bibliajj qhanañchi?
-
¿Kunsa Jesusajj aka oraqer janïr jutkasajj luräna?
-
¿Kunjamatsa Jesusajj Mesiasätap yattanjja?
JUKʼAMP YATJJATAÑAMATAKI
Jesusaw Mesiasäna sañatakejj kuna razonanakas utjaraki ukanak yatjjatam.
“¿Prueban las profecías de la Biblia que Jesús fue el Mesías?” (Artículo de jw.org)
¿Kunjamtï jaqenakajj wawanïpki ukhamarakti Diosajj Jesusar utjayäna? Kunsa Bibliajj uka toqet yatichi uk yatjjatam.
“¿Por qué se le llama a Jesús el Hijo de Dios?” (Artículo de jw.org)
Trinidad yatichäwejj janiw Bibliarjamäkiti sasin kunatsa sistan uk yatjjatam.
Jesusat kunsa Bibliajj yatichi uk yatjjatañajja, kunjamsa mä warmir yanaptʼäna uk yatjjatam.
“Una judía explica por qué se replanteó sus creencias” (¡Despertad!, mayo de 2013)
a Jaqenakajj kunatsa salvatäpjjañapa, kunjamsa Jesusajj salvistu ukanakjja 26, 27 yatichäwinakanwa yatjjatañäni.
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
