38 YATICHÄWI
Jakañ vidat Diosar yuspärapjjañäni
Jakkasajja kusisiykir walja luräwinakwa lursna. Jan walinakan uñjaskasasa, kuna sumanakatï vidan utjki ukanakampejj kusisitaw jakasiskaksna. ¿Kunjamsa Jehová Diosarojj yuspäratas uñachtʼaysna? ¿Kuna wakiskir razonas yuspärasirïñatakejj utji?
1. ¿Kunatsa vidarojj wali valoranit uñjañasa?
Jakañ vidajja wali munasiri Jehová Diosan regalopawa ukatwa wali valoranit uñjañasa. Niyakejjay Diosajj taqe jakirinak aka oraqen lurawaychejja, jupaw ‘jakañ vida churirejja’ (Salmo 36:9). Jupaw taqe jaqenakar “jakañsa, samansa, taqe kunsa churi” (Hechos 17:25, 28). Ukhamasti jakañatak kunatï wakiski ukanakjja, Jehová Diosaw churistu. Juparakiw kusisit jakasiñatakis yanaptʼistu (Hechos 14:17 liytʼäta).
2. ¿Kunjamsa Jehová Diosarojj jakañ vida churatapat yuspärsna?
Jiwasajj mamitasan purakapankkayätan ukhatpachaw Jehová Diosajj uñtʼjjestäna. Diosan amuytʼayatäsajja, David serviripajj akham sasaw mä oracionan säna: “Janïr nayajj naskayäta ukhaw nayranakamajj nayar uñjitäna” sasa (Salmo 139:16). Jakañ vidasajja Jehová Diosatakejj wali valoraniwa (Mateo 10:29-31 liytʼäta). Maynitï yaqhar amanut jiwayaspa jan ukajj jupa pachpa jiwayasispa ukhajja, Diosajj chuymap wal usuyasi (Éxodo 20:13). a Vidas aptʼasirjam amanut kuns lursna, jan ukajj yaqhanakan vidap jan walinakat jarkʼaqañatakejj jan kuns lurksna ukhajja, Diosan chuymap ustʼaysnawa. Kunapachatï jiwas pachpa cuidasktan yaqhanakan vidaps respetkaraktan ukhajja, Diosan regalop wali valoranit uñjataswa uñachtʼaytanjja.
JUKʼAMP YATJJATAÑÄNI
Kunjamanakatsa Jehová Diosar jakañ vidasat yuspärsna uka toqetwa jichhajj yatjjatañäni.
3. Cuerpos sum cuidañasawa
Jehová Diosan munañap lurañ arsuwayapki uka cristianonakajja, Diosan munañaparjamapuniw kuns lurapjje. Jupanakajj mä sacrificior uñtataw cuerpop Diosar loqtapjje, ukatwa wali sum cuidapjjañapa. Romanos 12:1, 2 liytʼasajja aka toqetwa parltʼapjjäta:
-
¿Kunatsa cuerpos sum cuidañasa?
-
¿Kunjamanakatsa cuidassna?
4. Vidassa mayninakan vidapsa cuidañasawa
Bibliajja kunanakatï jan walinakar purtʼasiykistaspa ukanakat amuytʼasiñasatakiw ewjjtʼistu. VIDEO uñtapjjäta, ukatjja jan accidenter purtʼasiñatakejj kunanakas yanaptʼistaspa ukanakatwa amuytʼapjjäta.
Proverbios 22:3 liytʼasajja kunjamsa maynejj akanakan jan kuna accidentes utjañapatak yanaptʼaspa uka toqetwa parltʼapjjäta:
-
Utasana.
-
Trabajosana.
-
Anatkasina.
-
Auto apnaqkasa jan ukajj pasajerot sarkasa.
5. Janïr nasipki uka wawanakan vidap respetañasawa
Mamapan purakapan jilaskir jiskʼa wawajja, Jehová Diosatakejj qhawqha valoranisa uka toqetwa Davidajj parläna. Salmo 139:13-17 liytʼasajja aka toqetwa parlapjjäta:
-
¿Jehová Diosatakejj kunapachas mä jaqen vidapajj qallti, naski ukhati jan ukajj mamapajj usuriptki ukhacha?
Jehová Diosajj nayra Israel markar leyinak churkäna ukanakajja, usur warminakarusa purakapankkäna uka jiskʼa wawanakarus jarkʼaqänwa. Éxodo 21:22, 23 liytʼasajja aka toqetwa parltʼapjjäta:
-
Janïr naski uka jiskʼa wawar jan munkasin jiwayañajja, ¿Jehová Diosatakejj kunjamakïnsa?
-
Ukhamajj janïr naskipan amanut jiwayapki ukhajja, ¿kunjamakis Jehová Diosajj jikjjataspacha? b
-
¿Kuntï Jehová Diosajj amuyki ukajj jumatakejj kunjamakisa?
Jakañ vidar wali valoranit uñjki uka warmisa, ‘janiw kamachtʼirjamäktsa, abortañakiw walikëjjaspa’ sasajj amuyarakispawa. Isaías 41:10 liytʼasajja aka toqetwa parltʼapjjäta:
-
Mä warmirutï abortañapatak obligañ munapjjani ukhajja, ¿khitirus yanaptʼa mayispa? ¿Kunatsa?
YAQHEPANAKAJJ AKHAM SAPJJEWA: “Usuriptki uka warmiw abortañsa jan ukajj jan abortañsa amtjjañapa” sasa.
-
Usurïki uka warmisa purakapankki uka jiskʼa wawan vidapas Jehová Diosatakejj wali valoraniwa sasin amuyañatakejja, ¿kunas jumarojj yanaptʼtamjja?
¿KUNSA YATEQAWAYTAN?
Jakañ vidajj Jehová Diosan regalopawa. Ukatwa Bibliajj jiwasan vidassa yaqhanakan vidapsa respetañasawa, munasiñasawa, jarkʼaqañasarakiwa sasin yatichistu.
Amtañataki
-
¿Jehová Diosajj jaqen vidaparojj wali valoranitwa uñji sasajj kunatsa sasma?
-
Maynejj amanut jupa pachpa jiwayaski jan ukajj yaqhar jiwayki ukhajja, ¿kunjamsa Jehová Diosajj jikjjataspacha?
-
¿Kunatsa jumajj Diosarojj jakañ vidat yuspärta?
JUKʼAMP YATJJATAÑAMATAKI
Jiwasar jakañ vida churatapatjja, ¿kunjamatsa Jehová Diosar yuspäratas uñachtʼaysna?
¿Abortawayki uka warmirojj Jehová Diosajj perdonaspati?
Jakañ vidatsa anatañ toqenakatsa kunsa Diosajj amuyi uk yatjjatam.
“¿Se justifica la participación en los deportes de riesgo?” (¡Despertad!, 8 de octubre de 2000)
Mä jaqetï jupa pachpa jiwayasiñ pienschi ukhajja, Biblian kawkïr ewjjtʼanakapas yanaptʼaspa uk yatjjatam.
“¿Puede ayudarme la Biblia si ya no quiero vivir y he pensado en suicidarme?” (Artículo de jw.org)
a Khitinakatï chuyma pʼakintatäpki ukanakat Jehová Diosajj wal llakisi (Salmo 34:18). Kuna jan walinakan uñjasisas maynejj jupa pachpa jiwayasiñ munaspa uk sum amuyi, jupanakar yanaptʼañsa munarakiwa. Kunjamsa Biblian ewjjtʼanakapajj yanaptʼistaspa uk yatiñatakejja, “¿Puede ayudarme la Biblia si ya no quiero vivir y he pensado en suicidarme?” sat qellqatwa Internetan liytʼäta, ukajja “Jukʼamp yatjjatañamataki” sat cheqanwa uñstaraki.
b Jehová Diosar janïr uñtʼkasin abortawayapki ukanakajja, ‘kunatpuns ukham lurpachätjja’ sasin janiw chuym wal pisayasipjjañapäkiti. Jehová Diosajj jupanakarojj perdonaspawa. Uka toqet jukʼamp yatjjatañatakejja, “¿Qué dice la Biblia sobre el aborto?” sat qellqatwa Internetan liytʼäta, aka libronjja “Jukʼamp yatjjatañamataki” sat cheqanwa uñstaraki.
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
