Nayra tiemponakanjja, niya taqeninwa amparampi apnaqañ molinonakajj mä arunjja, qhonañ qalanakajj utjäna, ukampiw qhonapjjerïna. Sapüruw warminakajj jan ukajj uywatanakajj granonak utapan qhonapjjerïna. Qhonañ qalanakan rojjoqetapas sapüruw istʼasirïna (Éxodo 11:5; Jeremías 25:10).

Kuna yänakatï nayra Egipto markan jikjjatasiwayki, ukaw kunjamänsa uk amuyayistu. Grano apjjatañäkis ukajja, thurut qalltas mä jukʼa sillpʼarjam tukuyat qalänwa, qhonjki ukasti, wiskhall jiskʼa qalarakïnwa. Qhonirejja, jachʼa qaläkis ukaruw granonak apjjati, ukatjja qonqortʼasisaw jiskʼa wiskhall qala paypach amparapampi katjjarusin alayat aynacharu, aynachat alayaru onjjtayas qhonji. Mä qellqatarjamajja, uka jiskʼa qalajj paya jan ukajj pusi kilonakanïnwa. Ukampitï maynejj khitirus jawqʼatataspajja, jiwayaspawa (Jueces 9:50-54).

Qhonañ qalajja, familiatakejj wali yanaptʼapunïnwa. Ukatwa Biblian uka toqet akham sispachäna: ‘Jan khititsa maytʼasipjjamti, amparampi apnaqañ molino, mä arunjja, qhonañ qala ni qalat lurat peqañsa, ukasti kipka jakañapsa maytʼasipkasma ukhamawa’ sasa (Deuteronomio 24:6).

Biblianjja, Jesucristojj ‘Awkip jakʼan qontʼatäski’ sasaw qhanañchi (Juan 1:18). Uka arunakampejja, kunjamsa Jesusajj Awkipampi apasi ukwa uñachtʼayi. Nayra tiemponjja, manqʼasiñatakejj jakʼa puranwa qontʼasipjjerïna, ukatakiw uka aru apnaqapjjerïna.

Jesusajj aka oraqenkäna uka tiemponjja, judionakajj mä jiskʼa mesar muytataw manqʼapjjerïna. Invitadonakajja, manqʼañatakejj mesa jakʼjjar kichat qontʼasipjjerïna, chʼeqa mujllipampisti mä chʼijmar uñtasitaruw tijmtʼasipjjerïna. Ukhamatwa kupi amparapampejj kuns luraspäna. Mä qellqatajj akham siwa: “Ukham qontʼasisinjja, maynin pʼeqepajj chʼeqa toqer qontʼatäki ukan pecho jakʼapankänwa” sasa. Ukatwa maynejj maynin ‘jakʼapankiwa’ sasin sissna.

Familia pʼeqtʼir jakʼaru jan ukajj invitirin jakʼapar qontʼasiñajj wali askit uñjatänwa. Jesusajj arkirinakapampi qhep qhepa kuti manqʼapkäna ukhajja, Jesús jakʼarojj apóstol Juanaw qontʼasïna, jupajj ‘wali munat discipulopänwa’. Jupasti Jesusar jisktʼañatakejj ‘thiyaparuw qontʼasïna’ sasaw Bibliajj qhanañchi (Juan 13:23-25; 21:20).