Хилас нәдир?
Мүгәддәс Јазыларын ҹавабы
Мүгәддәс Китаб јазычылары «хилас» вә «гуртулуш» сөзләрини бәзән инсанын тәһлүкәдән вә ја фәлакәтдән гуртулмасы мәнасында истифадә едирдиләр (Чыхыш 14:13, 14; Һәвариләрин ишләри 27:20). Лакин чох вахт бу сөзләр ҝүнаһдан хилас олмаға аид ишләнир (Мәтта 1:21). Өлүм ҝүнаһын әвәзи олдуғу үчүн ҝүнаһдан гуртулмуш кәсләрин әбәди јашамаг үмиди вар (Јәһја 3:16, 17) *.
Хилас олмаг неҹә мүмкүндүр?
Хилас олмаг үчүн Иса Мәсиһә иман ҝәтирмәк вә иман етдијини онун әмрләринә табе олмагла ҝөстәрмәк лазымдыр (Һәвариләрин ишләри 4:10, 12; Ромалылара 10:9, 10; Ибраниләрә 5:9).
Мүгәддәс Китабда дејилир ки, иманын өлмәдијини сүбут етмәк үчүн итаәткарлығы әмәлдә ҝөстәрмәк ҝәрәкдир (Јагуб 2:24, 26). Лакин бу о демәк дејил ки, хиласы газанмаг мүмкүндүр. Хилас Аллаһын лүтфдән доған әнамыдыр (Ефеслиләрә 2:8, 9).
Инсан хиласдан мәһрум ола биләр?
Бәли. Неҹә ки, боғулмаг үзрә олан инсан хилас олундугдан сонра суја һоппана вә ја дүшә биләр, еләҹә дә ҝүнаһдан азад олмуш инсан да иманыны горумаса, хиласдан мәһрум ола биләр. Бу сәбәбдән, Мүгәддәс Китаб хиласы газанмыш мәсиһиләри «иман уғрунда ҹидди мүбаризә апармаға» сәсләјир (Јәһуда 3). Бу һәмчинин онлар үчүн бир хәбәрдарлыгдыр ки, «горху вә еһтирамла хиласа јетишмәјә» чалышсынлар (Филиппилиләрә 2:12).
Хиласкар Аллаһдыр, јохса Иса Мәсиһ?
Мүгәддәс Китабда Аллаһ хиласын мәнбәји, јәни «Хиласкар» кими таныныр (1 Ишмуил 10:19; Әшија 43:11; Титуса 2:10; Јәһуда 25). Бундан әлавә, Аллаһ гәдим Исраил халгыны хилас етмәк үчүн мүхтәлиф инсанлардан истифадә етмишди. Мүгәддәс Китабда бу адамлар да «хиласкар» адланыр (Нәһәмја 9:27; Һакимләр 3:9, 15; 2 Падшаһлар 13:5) *. Үстәлик, Аллаһ ҝүнаһдан гуртулушу Иса Мәсиһин фидјә гурбанлығы васитәсилә тәмин етдији үчүн Мүгәддәс Китабда Иса Мәсиһ дә «Хиласкар» адланыр (Һәвариләрин ишләри 5:31; Титуса 1:4) *.
Һамы хилас олаҹаг?
Хејр. Бәзи инсанлар хилас олмајаҹаг (2 Салоникилиләрә 1:9). Бир дәфә Иса Мәсиһдән сорушмушдулар: «Аз адам хилас олаҹаг?» Онда Иса Мәсиһ ҹаваб вермишди: «Дар гапыдан ҝирмәк үчүн вар ҝүҹүнүзлә чалышын, чүнки чохлары бу гапыдан ҝирмәјә чалышаҹаг, лакин баҹармајаҹаг» (Лука 13:23, 24).
Инсанларын хиласы барәдә јанлыш фикирләр
Сәһв. Биринҹи Коринфлиләрә 15:22 ајәсиндәки «Мәсиһин сајәсиндә... һамы һәјата говушаҹаг» сөзләри ҝөстәрир ки, бүтүн инсанлар хилас олаҹаг.
Доғру. Бу ајәнин контекстиндә сөһбәт дирилмәдән ҝедир (1 Коринфлиләрә 15:12, 13, 20, 21, 35). «Мәсиһин сајәсиндә... һамы һәјата говушаҹаг» ифадәси садәҹә о демәкдир ки, дирилән һәр кәс бу хејир-дуаны Иса Мәсиһ сајәсиндә алмыш олур (Јәһја 11:25).
Сәһв. Титус 2:11 ајәсиндәки Аллаһ «бүтүн инсанлара хилас [ҝәтирир]» сөзләри ҝөстәрир ки, һамы хилас олаҹаг (Мүгәддәс Китаб, 2009).
Доғру. Бу ајәдә «бүтүн» кими тәрҹүмә олунан јунан сөзү һәмчинин «һәр ҹүр» мәнасыны верир *. Титус 2:11 ајәсинин дәгиг ачыгламасы одур ки, Аллаһ хиласы «һәр халга, һәр тајфаја, һәр үммәтә вә һәр дилә мәнсуб [адамлар]» да дахил олмагла, һәр ҹүр инсана верәҹәк (Вәһј 7:9, 10).
Сәһв. Икинҹи Бутрус 3:9 ајәсиндәки Аллаһ «һеч кәсин мәһв олмасыны истәмир» сөзләри ҝөстәрир ки, бүтүн инсанлар хилас олаҹаг.
Доғру. Аллаһ инсанларын хилас олмасыны истәјир, амма О, һеч кәси хиласы гәбул етмәјә мәҹбур етмир. Онун һөкм ҝүнүнә аллаһсызларын мәһви дә дахилдир (2 Бутрус 3:7).
^ абз. 3 Мүгәддәс Китаб ҝөстәрир ки, хилас олмуш инсанын ҝүнаһ вә өлүмдән әсил хиласы һәлә гаршыдадыр (Ефеслиләрә 2:5; Ромалылара 13:11).
^ абз. 10 Ситат ҝәтирилмиш ајәләрин бәзи тәрҹүмәләриндә «хиласкар» сөзүнүн әвәзинә «галиб», «гуртарыҹы», «гәһрәман», «өндәр», һәтта «кимсә» сөзләри истифадә едилир. Лакин Мүгәддәс Китабын орижинал ибрани мәтниндә истифадә олунан ејни сөз һәм инсан хиласкарлара, һәм дә Јеһова Аллаһа аид ишләнир (Зәбур 7:10).
^ абз. 10 Иса ады ибрани дилиндә «Јеһошуа» кими сәсләнир вә «Јеһова хиласдыр» демәкдир.
^ абз. 17 «Вајнын Әһди-Әтиг вә Әһди-Ҹәдидин сөзләринә даир изаһлы лүғәти»нә бахын. Мәтта 5:11 ајәсиндә ејни јунан сөзү истифадә олунур. Бу ајәдә Иса Мәсиһ инсанларын онун давамчылары һаггында «һәр ҹүр» пис сөзләр сөјләјәҹәјини дејир.
You May Also Like
МҮГӘДДӘС КИТАБА АИД СУАЛЛАРА ҸАВАБ
Иса Мәсиһин һәјатыны гурбан вермәси «чохлары уғрунда» неҹә фидјә олду?
Фидјә ҝүнаһын әвәзини неҹә өдәјир?
МҮГӘДДӘС КИТАБА АИД СУАЛЛАРА ҸАВАБ
Мүгәддәс Китаб өјрәдирми ки, «бир дәфә хилас олан һәмишәлик хилас олур»?
Иса суала мәсәллә ҹаваб верди.