Cɛn kun’n, Kanada lɔ suklu ba wie’m be ɔli be ɲin su yiyilɛ lika kun. Kpɛkun gbanflɛn wie’m be miannin be wiengu yasua wie’m be lele be nin be lali kekle nun. Kusu nn, suklu ba sɔ’m be si fluwa kpa. Kɛ sa sɔ’n juli’n, bian kun mɔ be flɛ i kɛ Leɔnaadi Sitɛnin’n, ɔ klɛli i zronali kun nun kɛ: “Nán kɛ gbanflɛn annzɛ talua kun si ngwlɛlɛ annzɛ ɔ si fluwa dan, annzɛ kusu i si nin i nin be le sika’n, i ti yɛ ɔ́ fá ajalɛ kpa-ɔ.”

Sitɛnin seli ekun kɛ: “Like ng’ɔ fata kɛ ɔ yo siɛ nin niɛn’m be cinnjin’n, yɛle kɛ be uka be mma mun naan be si sa ng’ɔ ti kpa’n, nin ng’ɔ ti tɛ’n be ngbaciɛ’n. Sanngɛ nɛ́n i sɔ yɛ siɛ nin niɛn sunman be yo-ɔ. Like ng’ɔ ti be cinnjin’n, yɛle kɛ be mma’m be di suklu dan naan be ɲan sika kpanngban.”

Ɔ ti su kɛ suklu dilɛ’n ti cinnjin. Sanngɛ like nga be kle sran mun suklu lɔ’n, ɔ kwlá ukaman be naan b’a wla be nzuɛn tɛtɛ’m be ase. ?Sɛ ɔ ti sɔ’n niɔn, like benin yɛ sɛ be fa kle sran kun’n, ɔ́ úkɛ i naan i nzuɛn’n w’a yo kpa-ɔ?

Kɛ e nian niannun nun’n, sɛ wla wie annzɛ fiɛnwie o e wun’n e kwla wun i. I wafa kunngba’n, yɛle Ɲanmiɛn Ndɛ’n. Kɛ e kanngan nun’n, e wun e nzuɛn annzɛ e ayeliɛ ng’ɔ ti tɛ’n, i wlɛ weiin. (Zaki 1:23-25) Asa ekun’n, Biblu’n uka e maan e wla e nzuɛn tɛtɛ’m be ase. Kpɛkun e yi nzuɛn kpakpa’m be nglo. I sɔ’n yo maan e nin sran mun e tran klanman yɛ e bo yo kun. Nzuɛn sɔ’m be nun wie mun yɛle sran ye yolɛ, klun ufue yolɛ, awlɛn tralɛ, wɛtɛɛ yolɛ, yɛ Ɲanmiɛn nin sran klolɛ’n. Ɲanmiɛn nin sran klolɛ’n yo maan “sran’m be afiɛn sɛ kpa.” (Kolɔsufuɛ Mun 3:14) ?Ngue ti yɛ Ɲanmiɛn nin sran klolɛ’n ti i liɛ ngunmin-ɔn? Maan e fa e ɲin e sie i ndɛ nga Biblu’n kɛn i nzuɛn sɔ’n su’n, i su.

• “Sran ng’ɔ klo sran’n, ɔ trɛ i awlɛn, kpɛkun ɔ yo sran ye. Sran ng’ɔ klo sran’n, i ɲin bloman sran like su, ɔ dimɛn i nuan, ɔ tumɛn i wun, i nzuɛn’n ti kpa, ɔ bumɛn i ngunmin i wun akunndan, ɔ faman ya ndɛndɛ. Sran ng’ɔ klo sran’n, ɔ faman sa siemɛn i klun. Sran ng’ɔ klo sran’n, sa tɛ yolɛ’n yomɛn i fɛ, sanngɛ nanwlɛ dilɛ’n yɛ ɔ yo i fɛ-ɔ. ‘Sran ng’ɔ klo sran’n, sa kwlaa sɔn i nun, [...] ɔ trɛ i awlɛn sa kwlaa nun. ”—1 Korɛntifuɛ Mun 13:4-8.

• “Sran ng’ɔ klo sran’n, ɔ yomɛn i wiengu tɛ.”—Rɔmunfuɛ Mun 13:10.

• “Like ng’ɔ ti cinnjin trɛ i kwlaa’n, yɛle kɛ an klo amun wiengu tankaan kpa. Afin sran ng’ɔ klo i wiengu’n, ɔ sisimɛn i bo naan w’a yaci sa tɛ kpanngban nga i wiengu yo i’n w’a cɛ i.”—1 Piɛr 4:8.

Kɛ e nin sran kun m’ɔ klo e kpa’n e o’n, e wla gua ase, e klun titiman e, yɛ e wun kpaja e. Afin e si kɛ sran sɔ’n, i ɲinfu ɔ su yoman e abɔlɛ. Like ng’ɔ ti kpa’n yɛ ɔ́ kúnndɛ kɛ ɔ́ yó mán e-ɔ.

Kɛ sran kun klo Ɲanmiɛn nin sran’n, ɔ miɛn i ɲin yo ninnge wie mun naan be ng’ɔ klo be’n, be klun w’a jɔ. I wie yɛle bian kun liɛ’n. I suandunman’n yɛle Zɔzu. Kɛ i wa bla’n wuli ba kun’n, ɔ kunndɛli kɛ ɔ́ trɛ́n i anunman’n i wun. Sanngɛ ɔ nɔn siklɛti dan. I sɔ’n ti’n, i sia’n seli i kɛ nán maan ɔ nɔn siklɛti i wa’n i wun koko. Kɛ ɔ́ yó sɔ’n, nn Zɔzu nɔn siklɛti w’a di afuɛ 50. Sanngɛ klolɛ m’ɔ klo i anunman’n  ti’n, ɔ yacili siklɛti nɔnlɛ. Ndɛ sɔ’n kle kɛ sran klolɛ’n yo maan sran kun kwla yo like nga w’a sunnzunman kɛ ɔ́ yó’n.

Ɔ fata kɛ e suan sran klolɛ’n. I lɛ nun’n, siɛ nin niɛn’m be kle be mma’m be ajalɛ naan be nian su. Yɛle kɛ be man be aliɛ, yɛ be nian be su kpa. Kɛ be tɔ tukpacɛ annzɛ like yaya wie yo be’n, be yo be ayre. Siɛ nin niɛn nga be ti kpa’n, be nin be mma’m be koko yalɛ, be kle be like, yɛ be tu be fɔ. Fɔ tulɛ sɔ’n i wie yɛle kɛ be kle be like naan be wun sa ng’ɔ ti kpa’n nin ng’ɔ ti tɛ’n, be ngbaciɛ’n. Asa ekun’n, be bɔbɔ be ayeliɛ nun’n, be yi i nglo kɛ be klo sran.

Sanngɛ siɛ nin niɛn wie’m be nianman be mma’m be lika kpa. ?I sɔ’n ti’n, é sé kɛ ba sɔ’m be su yoman sran kpa le? Cɛcɛ. Afin sran kaklaka wie mun mɔ be kaan nun be si nin be nin’m b’a nianman be lika kpa’n, be nun sunman be miannin be ɲin be kacili be nzuɛn’n. Ɔ maan, be yoli sran kpa yɛ sran’m be lafi be su. Ndɛ akpasua nga i sin liɛ’n nun’n, é wá kán be nun wie’m be ndɛ. Sran’m be buli i kɛ sran sɔ’m be su kaciman be nzuɛn’n le. Sanngɛ be kacili yɛ be yoli sran kpa.