Anuannzɛ dan nga be flɛ i kɛ ONU, i su kpɛnngbɛn’m be wla sran’m be fanngan kɛ maan be bo yo kun, be ɲin yi be wiengu yɛ be nian asiɛ’n su ninnge’m be lika kpa. ?Ngue ti yɛ be fɛli i sɔ ajalɛ’n niɔn? Be flɛ bian kun kɛ Maɛɛ Nasɛɛ. Ɔ tɛli kosan sɔ’n su. Ɔ seli kɛ: “Nzue’n tɔman kɛ laa’n sa kun yɛ wia’n bo dan. Sran’m be kun be wiengu, be bu be wiengu lufle yɛ be kun alɛ. Asa ekun’n, alɛ nin sa wie ti’n, sran’m be tu be nvle nun be kɔ nvle uflɛ nun. Kakawlonga sa mun nin tukpacɛ nga be sa ndɛndɛ’n, b’a sɔn. E wun ninnge sɔ mun asiɛ’n wunmuan’n su.”

Sran wie’m be waan ɔ fata kɛ asiɛ sufuɛ’m be kwla- kwla be ɲan famiɛn kunngba. I liɛ’n, mɛn’n nun tɔ́ fɔun. Sran sɔ’m be nun wie yɛle fluwa sifuɛ kun mɔ be flɛ i kɛ Dante (1265-1321) ɔ nin kun ekun mɔ be flɛ i kɛ Alibɛɛ Ansitainin. Bian nga be flɛ i kɛ Dante’n, ɔ seli kɛ mɛn siefuɛ’m be timan be wun aniɛn ti’n, sran’m be su diman fɔundi le. Ndɛ kunngba’n yɛ Zezi Klisi kannin-ɔn. Ɔ seli kɛ: “Famiɛn diwlɛ kwlaa nga i nunfuɛ’m be bubu be wun nun’n, ɔ kaman lɛ.”—Liki 11:17.

Kɛ Amlɛnkɛn’m be sonja’m be fali bɔnbu dandan nɲɔn be nunnunnin Zapɔn lɔ klɔ nɲɔn’n, bian nga be flɛ i kɛ Alibɛɛ Ansitainin’n ɔ klɛli nvlenvle’m be anuannzɛ nga be flɛ i kɛ ONU i fluwa. Ɔ klɛli i kɛ: “Ɔ fata kɛ be yo like kwlaa nga be kwla yo’n naan asiɛ wunmuan sufuɛ’m be ɲan famiɛn kunngba. I liɛ’n, fɔundi trán asiɛ’n su.”

?E kwla lafi su kɛ famiɛn sɔ’n ɔ nin be nga bé wá úkɛ i naan be di junman’n, be su buman sran’m be lufle? ?Be su mianmianman sran mun? ?Bé kwlá dí be junman’n i kpa sakpa? ?Nán afɛ kunngba’n yɛ é wún i-ɔ? Be flɛ fluwa sifuɛ kun kɛ Lɔɔdu Aktɔnun. Ɔ seli kɛ: “Kwlalɛ’n kwla saci be. Kwlalɛ’n ng’ɔ tratra su’n, ɔ saci sran tɛtɛ kpa.”

Sɛ asiɛ’n sufuɛ’m be kunndɛ kɛ bé dí alaje’n, ɔ fata kɛ be ngba’n be bo yo kun. ?Sanngɛ ngue yɛ bé yó naan i sɔ liɛ’n w’a yo ye-ɔ? ?Be bo kwla yo kun sakpa? Biblu’n se kɛ i sɔ’n kwla yo ye naan cɛn wie lele’n sran’m be bo yó kun sakpa. Sanngɛ nán famiɛn kun mɔ klɔ sran mɔ fɔ o be nun’n, bé síe i asiɛ wunmuan su’n yɛ ɔ́ kwlá yó i sɔ liɛ’n niɔn. Biblu’n se kɛ Ɲanmiɛn wá mán asiɛ’n sufuɛ’m be famiɛn kun, naan famiɛn sɔ’n yɛ ɔ́ dí junman sɔ’n niɔn. Famiɛn sɔ’n ɔ nin be nga bé wá úkɛ i’n, bé wá yí i nglo kɛ Ɲanmiɛn kunngba cɛ yɛ ɔ le atin sie sran mun-ɔn.—Liki 4:43.

Zezi kannin Ɲanmiɛn i Famiɛn dilɛ’n i ndɛ. Cɛn kun’n, ɔ seli i sɔnnzɔnfuɛ’m be kɛ, kɛ bé srɛ́ Ɲanmiɛn’n maan be se kɛ: “Maan ɔ Famiɛn dilɛ’n i blɛ’n ju. Maan be yo ɔ klun sa’n asiɛ’n su wa.” ( Matie 6:9, 10) Sran nga Ɲanmiɛn sieli i Famiɛn’n, ɔ́ wá yó maan sran’m bé yó Ɲanmiɛn i klun sa’n asiɛ’n su wa. Nán klɔ sran mɔ be bu be ngunmin be wun akunndan’n, be klun sa liɛ’n yɛ bé yó i asiɛ’n su-ɔ.

Be flɛ Ɲanmiɛn i Famiɛn dilɛ’n i ekun kɛ “ɲanmiɛn su lɔ Famiɛn dilɛ’n.” (Matie 5:3) I sɔ’n kle kɛ ɲan- miɛn su lɔ yɛ Famiɛn bia’n ɔ o-ɔ, nán asiɛ’n su wa-ɔ. Sanngɛ famiɛn’n ɔ́ síe asiɛ’n sufuɛ mun. Ɔ su seman sran’m be kɛ be tua lapo annzɛ be mɛn i like uflɛ. Be ng’ɔ́ wá síe be’n, bé wá dí alaje dan. Nanwlɛ, i sɔ’n ti kpa dan.

Kɛ awa kun o sa’n, ɔ le i su famiɛn yɛ ɔ le be nga be uka famiɛn’n. I wafa kunngba’n yɛle Ɲanmiɛn i Famiɛn dilɛ’n. I su famiɛn’n yɛle Zezi Klisi. Ɲanmiɛn yɛ ɔ sieli i famiɛn-ɔn. Kɛ Biblu’n kán Zezi i ndɛ’n ɔ se kɛ:

• “B’a wu ba kun b’a man ye, [...] Nyanmiɛn fali sielɛ’n wlɛli i sa nun. [...] Ɔ́ yó mán i sielɛ’n ɔ́ trɛ́, yɛ ɔ maan fɔundi’n trán lɛ tititi.”—Ezai 9:5, 6.

•   “Be fali kwlalɛ’n be mɛnnin, be mɛnmɛnnin i, yɛ be fali famiɛn diwlɛ’n be wlɛli i sa nun. Nvle-nvle’n kwlaa nin mɛnmɛn’n kwlaa be nunfuɛ mun bɔ be kan aniɛn wafa-wafa’n kwlaa’n, be suli i. I kwlalɛ sɔ’n ɔ́ trán lɛ tititi, [...] yɛ i sielɛ’n su nunnunman le.”—Daniɛl 7:14.

• “Mɛn’n nun famiɛn diwlɛ’m b’a yo e Min’n nin i Klisi’n be Famiɛn diwlɛ. Yɛ Ɲanmiɛn dí famiɛn tititi.”—Sa Nglo Yilɛ 11:15.

Ɔ ka kan’n, ndɛ nga Zezi seli i sɔnnzɔnfuɛ’m be kɛ, kɛ bé srɛ́ Ɲanmiɛn’n be kan’n, ɔ́ kpɛ́n su. Yɛle kɛ asiɛ’n sufuɛ’m be kwlaa bé yó Ɲanmiɛn i klun sa’n. Blɛ sɔ’n nun’n, sran’m bé wá nían asiɛ’n i lika. Ɔ maan, ɔ́ wá káci lika klanman kpa yɛ i su tranlɛ’n yó fɛ.

Kɛ ɔ ko yo naan i sɔ’n w’a yo ye’n, sran nga Ɲan- miɛn sieli i Famiɛn’n ɔ́ wá klé be ng’ɔ́ wá síe be’n, be like naan be nanti mmla kunngba’n su. Ɔ maan, sran’m be su bubuman be wun nun kun, yɛ bé tí be wun aniɛn. Ezai ndɛ tre 11 i mma 9 se kɛ: “Be su yo-man sa tɛ. [...] Be su saci-man like fi. [...] Kɛ jenvie’n i nzue’n ɔ kata i bo lɔ’n su’n ju’n, i kunngba nin-ɔn, asiɛ’n wunmuan’n su sran’m bé sí Anannganman lelele.”

Blɛ sɔ’n nun’n, like nga anuannzɛ nga be flɛ i kɛ ONU kunndɛ kɛ sran’m be yo mɔ b’a kwlá yoman’n, ɔ́ kpɛ́n su. Yɛle kɛ sran’m be bo yó kun kpɛkun bé dí aklunjuɛ. Jue Mun ndɛ tre 37 i mma 11 se kɛ: “[Sran’m] bé wún jɔ́ be kpa fɔuun.” Kɛ afuɛ’m bé sín’n, sran’m be su boman sran kunlɛ’n, nin asiɛ’n i sacilɛ’n, nin yalɛ dilɛ’n, be su be diman jɔlɛ kun. ?Cɛn benin yɛ i sɔ’n kpɛ́n su-ɔ? ?Cɛn benin yɛ sran nga Ɲanmiɛn sieli i Famiɛn’n, ɔ́ wá dí i sɔ junman’n niɔn? ?Wafa sɛ yɛ ɔ́ dí junman sɔ’n niɔn? ?Ngue yɛ amun kwla yo naan Ɲanmiɛn w’a sie amun wie-ɔ? É wá tɛ́ kosan sɔ’m be su, ndɛ akpasua nga i sin liɛ’n nun.