Ifipendo fyaba mu Baibolo limo fipilibula filya fine fye fyalembwa, lelo limo fiba fye fishibilo. Icilelandwapo e cilanga nga ca kuti icipendo cishibilo fye. Moneni amanambala yamo ayaba mu Baibolo ayaba fishibilo fye:

•   1 Imininako ukwikatana. Ku ca kumwenako, Yesu apepele kuli Lesa ukuti “bonse babe umo, ifyo imwe Tata mwaba muli ine, na ine naba muli imwe.”​—Yohane 17:21; Mateo 19:6.

•   2 Pa cilye ca milandu inte shibili shalepeela ubushinino pa kulanga ukuti umulandu balelandapo wa cine. (Amalango 17:6) Na pa kulanga ukuti icimonwa ca cine kabili cikacitika balecibwekeshapo imiku ibili. Ku ca kumwenako, ilyo Yosefe alondolwele umwalolele iciloto calotele Farao wa ku Egupti, atile: “Apo iciloto cabwekeshiwepo imiku ibili kuli Farao, cilolele mu kuti ici cintu nacipampamikwa na Lesa wa cine.” (Ukutendeka 41:32) Mu busesemo, “insengo shibili” kuti shaimininako ubufumu ubwa bakateka babili nga fintu kasesema Daniele bamwebele pa bufumu bwa Madai na Persia.​—Daniele 8:​20, 21; Ukusokolola 13:11.

•   3 Nga filya fine inte shitatu shalingile ukupeela ubunte pa kuti icine cishibikwe, ukubwekeshapo imiku itatu kulanga ukuti icilelandwapo ca cine.​—Esekiele 21:27; Imilimo 10:​9-​16; Ukusokolola 4:8; 8:​13.

•   4 Iyi inambala kuti yalanga ukuti icilelandwapo cintu conse fye nga filya amashiwi ya kuti “amakoona yane aye sonde” yapilibula.​—Ukusokolola 7:1; 21:16; Esaya 11:12.

•   6 Apo pali ici icipendo pabulila cimo pa kukumanisha icipendo ca 7 iciimininako ukupwililika, ninshi 6 kuti yaimininako ifintu ifishapwililika, ifyo Lesa ashatemwa kabili kuti yabomfiwa na pa kulanda pa fikumine abalwani ba kwa Lesa.​—1 Imilandu 20:6; Daniele 3:1; Ukusokolola 13:18.

•   7 Ilingi 7 imininako ifintu ifyapwililika. Ku ca kumwenako, Lesa aebele abena Israele ukushinguluka umusumba wa Yeriko pa nshiku 7 ishakonkana, e lyo pa bushiku bwalenga 7 abebele ukushinguluka imiku 7. (Yoshua 6:15) Muli Baibolo mwaliba ifya kumwenako na fimbi umo balanda pa namba ya 7. (Ubwina Lebi 4:6; 25:8; 26:18; Amalumbo 119:164; Ukusokolola 1:20; 13:1; 17:10) Ilyo Yesu aebele Petro ukulaelela bamunyina, atile, “Nshilekweba nati, imiku 7, lelo imiku 77.” Filya Yesu ashapeelele fye pa kulanda ati imiku 7, lelo atila imiku 77, capilibwile ukuti Petro alingile ukutwalilila fye ukwelela.​—Mateo 18:​21, 22.

•   10 Ipilibula ifintu fyonse pamo.​—Ukufuma 34:28; Luka 19:13; Ukusokolola 2:10.

•   12 Ilingi ipilibula ukupwililika kwa fintu ifyakuma ukufwaya kwa kwa Lesa. Ku ca kumwenako, mu cimonwa ca fya mu muulu ico umutumwa Yohane amwene, mwali no musumba uwakwete “amabwe aya mufula 12, na pali aya mabwe pali amashina 12 aya batumwa.” (Ukusokolola 21:14; Ukutendeka 49:28) Kabili ukufusha iyi mpendwa, nako kuti kwapilibula icintu cimo cine.​—Ukusokolola 4:4; 7:​4-8.

•   40 Ilingi iyi nambala baibomfya pa kulanda pa bupingushi bwa kwa Lesa nelyo pa nshita asalapwile abantu.​—Ukutendeka 7:4; Esekiele 29:​11, 12.

Ukwishiba ifintu ukubomfya ifipendo

 Ukwishiba ifipendo fya mu Baibolo ifimininako fimo, kwalipusana no kubomfya ifipendo ku kubuka. Ku ca kumwenako, amabumba ya baYuda baliceceta sana ifyalembwa mu malembo ya ciHebere ukubomfya inshila ya kubukila ku fipendo. Uku nako kubuka uko Lesa apata.​—Amalango 18:​10-12.