Iciswango ca mitwe 7 ico Baibolo yalandapo pa Ukusokolola 13:1 cimininako imitekele yonse iya pano calo.

•   Calikwata ubufumu, amaka, ne cipuna ca bufumu, kanshi cimininako utubungwe twa mitekele ya calo.​—Ukusokolola 13:2.

•   Cilateka pa “mitundu yonse na pa bantu bonse na pa ba ndimi shonse na pa ba nko shonse,” kanshi tacimininako ubuteko ubwa mu calo cimo fye.​—Ukusokolola 13:7.

•   Imimonekele ya ciko yalipalana ne mimonekele ya fiswango 4 ifyalandwapo mu kusesema kwaba pali Daniele 7:​2-8. Cimoneka kwati ni mbwili, cakwata amakasa ya bere, akanwa ka nkalamo, ne nsengo 10. Ifiswango fya mu kusesema kwa kwa Daniele bafilondolola ukuti shamfumu 4, nelyo amabufumu ayakakwatisha amaka. (Daniele 7:​17, 23) Kanshi iciswango ca mu Ukusokolola icipandwa 13 cimininako utubungwe tonse utwa mitekele ya calo.

•   Ici ciswango ‘cifuma muli bemba,’ e kutila mu bantu aba cimfulumfulu abateka mu mabuteko.​—Ukusokolola 13:1; Esaya 17:​12, 13.

•   Baibolo itila inambala, nelyo ishina lya ciswango, 666, ni “nambala ya muntu.” (Ukusokolola 13:17, 18) Aya mashiwi yalanga ukuti iciswango ico Baibolo yalandapo mu Ukusokolola icipandwa 13 kabungwe ka bantunse, te ka mipashi nelyo ifibanda.

 Nangu ca kuti limo ifyalo filafilwa ukumfwana, ilingi line filekatana pa kuti fitwalilile ukuteka ukucila ukunakila Ubufumu bwa kwa Lesa. (Amalumbo 2:2) Na kabili fikomana akapi pa kuti fikalwe na bamalaika ba kwa Lesa abakatungululwa na Yesu Kristu pa Armagedone, lelo pali iyi nkondo, ifi fyalo fyonse fikonaulwa.​—Ukusokolola 16:​14, 16; 19:19, 20.

“Insengo 10 ne mitwe 7”

 Mu Baibolo, amanambala yamo yemininako ifintu fimo. Ku ca kumwenako, 10 na 7 manambala ayemininako ifyakumanina. Icitwafwa ukwishiba ico “insengo 10 ne mitwe 7” ifyo Baibolo yalandapo mu Ukusokolola icipandwa 13 fimininako, “icimpashanya ca ciswango” icalandwapo mwi buuku limo line ilya Ukusokolola, ne ci, ciswango icakashika icakwata imitwe 7 ne nsengo 10. (Ukusokolola 13:​1, 14, 15; 17:3) Baibolo itila imitwe 7 iya ici ciswango cakashika imininako “imfumu 7,” nelyo amabuteko.​—Ukusokolola 17:​9, 10.

 Ne mitwe 7 iya ciswango ico Baibolo yalandapo pa Ukusokolola 13:1 imininako amabuteko 7: amabuteko nelyo ifyalo ifyakwatisha sana amaka ifiteka pe sonde kabili ificusha abantu ba kwa Lesa, ne fi fyalo ni Egypt, Assyria, Babylon, Medo-Persia, Greece, Rome, na Anglo-America. Apo insengo 10 shimininako ifyalo fyonse, ifikalamba ne finono, ninshi ifisote fya bufumu, nelyo ifilongwe, ifyaba ku lusengo lumo lumo filanga ukuti ifi fyalo fiteka pa nshita imo ine ne calo icakwatisha amaka pali ino nshita.