Ubucushi bukalamba bukaleta amacushi ayashatala ayabako. Baibolo itila, ubucushi bukalamba bukesa mu “nshiku sha kulekelesha” nelyo “Inshita ya ku mpela” (2 Timote 3:1; Daniele 12:4) Ubucushi bukalamba bukaba bucushi “ubushatala abubako ukutula pa ntendekelo ya ba pano calo ukufika nomba, kabili tabwakatale abubako na kabili.”—Marko 13:19; Daniele 12:1; Mateo 24:21, 22.

Ifikalacitika mu bucushi bukalamba

•   Ukonaula imipepele ya bufi. Imipepele ya bufi ikonaulwa mukupumikisha. (Ukusokolola 17:1, 5; 18:9, 10, 21) Ilyo amabuteko ayo akabungwe ka United Nations kemininako yakonaula imipepele ya bufi, yakafikilisha ukufwaya kwa kwa Lesa.—Ukusokolola 17:3, 15-18. *

•   Ukusansa ukupepa kwa cine. Ifyalo ifikabombela pamo, ifyo balandapo mu cimonwa ca kwa Esekiele ukuti “Goge wa mu calo ca Magoge,” fikafwaya ukulofya ababa mu kupepa kwa cine. Na lyo line, Yehova akacingilila ababomfi bakwe.—Esekiele 38:1, 2, 9-12, 18-23.

•   Ukupingula abekala pe sonde. Yesu akapingula abantu bonse kabili “akapaatukanya abantu, filya kacema apaatukanya impaanga ku mbushi.” (Mateo 25:31-33) Akapingula abantu ukulingana ne fyo balecita ku kwafwa ‘bamunyina’ ba kwa Yesu, abakateka pamo nankwe ku muulu.—Mateo 25:34-46.

•   Ukulonganika abakateka mu Bufumu. Abacishinka abo basala ukuteka na Yesu bakapwisha umulimo wabo uwa pa sonde kabili bakabushiwa ukuya ku muulu.—Mateo 24:31; 1 Abena Korinti 15:50-53; 1 Abena Tesalonika 4:15-17.

•   Armageddon. Iyi “nkondo ya bushiku bukalamba ubwa kwa Lesa Wa Maka Yonse” itwa no kuti “Ubushiku bwa kwa Yehova.” (Ukusokolola 16:14, 16; Esaya 13:9; 2 Petro 3:12) Abo Yesu akapingula ukuti babifi bakonaulwa. (Sefania 1:18; 2 Abena Tesalonika 1:6-10) Iciswango ica mitwe cinelubali ico Baibolo yalandapo icimininako amabuteko mwi sonde lyonse na co cikonaulwa.—Ukusokolola 19:19-21.

Ifikalacitika pa numa ya bucushi bukalamba

•   Ukukaka Satana ne fibanda. Malaika mukalamba akapoosa Satana ne fibanda mu “cilindi icabula impela,” icipilibula ukuti bakaba kwati na bafwa. (Ukusokolola 20:1-3) Ilyo Satana bakamupoosa mu cilindi ca bula impela cikaba kwati bamukaka. Takakwate amaka ya kucita icili conse.—Ukusokolola 20:7.

•   Ukutendeka kwa myaka ikana limo. Ubufumu ba kwa Lesa bukatendeka ukuteka pa myaka ikana limo, kabili bukacitila abantu ifintu ifisuma. (Ukusokolola 5:9, 10; 20:4, 6) “Ibumba ilikalamba” ilishingapendwa ‘likafuma mu bucushi bukalamba,’ no kumonako ilyo Ubufumu bukatendeka ukuteka pa myaka ikana limo.—Ukusokolola 7:9, 14; Amalumbo 37:9-11.