Yehova alaile Yakobo ukuti ali no kumucingilila nga filya fine acingilile Abrahamu na Isaki. Yakobo atendeke ukwikala mu cifulo ico baleita ukuti Harani, umu mwine emo aupiile, akwata na bana abengi, kabili alinonkele ifyuma ifingi sana.

Pa numa Yehova aebele Yakobo ati: ‘Bwelela ku calo cobe.’ E ico Yakobo no lupwa lwakwe balimine ubulendo ubutali. Ilyo baleya mu nshila kwali abantu bamo abaishile kuli Yakobo no kumweba abati: ‘Munonko Esau aleisa, kabili ali na baume 400!’ Yakobo alyumfwile umwenso, alemona kwati Esau alefwaya ukumwipaya no kwipaya ulupwa lwakwe. E ico alipepele kuli Yehova ati: ‘Mpokololeni kuli munyinane.’ Ubushiku bwakonkelepo, Yakobo atumine ubupe kuli Esau, amupeele impaanga ishingi, imbushi, ing’ombe, ingamila e lyo ne mpunda.

Ilyo Yakobo ali eka ubushiku, amwene malaika! Uyu malaika atendeke ukulwishanya na Yakobo. Balitwalilile ukulwishanya mpaka bwaca. Nangu ca kuti Yakobo balimucenene kuli malaika, talekele ukulwishanya nankwe. Malaika alandile ati: ‘Leka ndeya.’ Lelo Yakobo amwebele ati: ‘Nshakuleke, mpaka umpaale.’

Malaika asukile apaala Yakobo. Ifi malaika amupaalile fyalengele Yakobo aishiba ukuti Yehova ali no kumucingilila kuli Esau.

Muli bulya bwine bushiku ulucelo, Yakobo amwene Esau aleisa  na baume 400 ninshi bali apatali. Yakobo ashile ulupwa lwakwe ku numa e lyo aya kuli Esau no kumukontamina imiku 7. Lyena Esau alibutukiile Yakobo no kumukumbatila. Aba bampundu balililile kabili balitendeke ukumfwana. Bushe ulemona ukuti Yehova aumfwile shani pa fyo Yakobo acitile pa kuti atendeke ukumfwana na munyina?

Pa numa Esau alibwelele uko aleikala, Yakobo na o alitwalilile no bulendo bwakwe. Abana abaume bonse abo Yakobo akwete bali 12. Amashina yabo ni aya, Rubene, Simeone, Lebi, Yuda, Dani, Naftali, Gadi, Ashere, Isakari, Sebuluni, Yosefe na Benjamini. Yehova alibomfeshe Yosefe umwana wa kwa Yakobo ukupususha abantu bakwe. Bushe walishiba ifyo acitile pa kubapususha? Natumone.