Ilyo papitile imyeshi ibili ukutula apo abena Israele bafumiine mu Egupti, balifikile pa Lupili lwa Sinai, kabili balipangile umwa kwikala. Yehova aebele Mose ukuti aye pa lupili kabili ilyo ali pa lupili amwebele ati: ‘Nalipuswishe abena Israele. Nga ca kuti bakulang’umfwila kabili bakulakonka amafunde yandi, bakaba abantu bandi abaibeela.’ Mose alifumine pa lupili kabili aileeba abena Israele ifyo Yehova amwebele. Finshi abena Israele balandilepo? Balandile ati: ‘Twakulacita fyonse ifyo Yehova atweba ukucita.’

Na kabili Mose aliile pa lupili. Ilyo afikile pa lupili, Yehova amwebele ati: ‘Mu bushiku bwalenga shitatu, nkalanda na iwe. Webe abantu ukuti tabafwile ukunina Ulupili lwa Sinai.’ Mose alifumine pa lupili no kuyaeba abena Israele ukuipekanya ukukutika ifyo Yehova ali no kubeba.

Pa bushiku bwalenga shitatu, abena Israele balimwene inkuba ne kumbi ilyafiita sana pa lupili. Na kabili balyumfwile ukulila kwa nkuba no kulila kwa ntandala. Lyena Yehova aishile pa lupili mu mulilo. Abena Israele balyumfwile umwenso kabili baletutuma fye. Ulupili lwalisunkene sana kabili lwalefumya icushi. Iciunda ca ntandala calekulilako fye. Lyena Lesa alandile ati: ‘Nine Yehova. Mwilapepa balesa bambi.’

Mose alibwelele pa lupili, kabili Yehova alimupeele amafunde ayo abantu bali no kulakonka pa ku mupepa na muli fyonse ifyo bali no kulacita. Mose alilembele aya amafunde kabili abelengeele abena Israele. Abena Israele balaile abati: ‘Fyonse ifyo Yehova atweba twakulacita.’ Abena Israele balilaile Lesa. Bushe bali no kulacita ifyo balaile?