ISAMBILILO 01
Bushe Baibolo Kuti Yamwafwa Shani?
Bonse twalikwata amepusho pa co twabela pano calo, pa co tuculila, pa co tufwila, na pa fyo ifintu fikaba ku ntanshi. Na kabili tulafwaisha ukwishiba ifya kucita pa kupwisha amafya yamo pamo nga, ukusanga indalama sha kushitamo ifyo tukabila nelyo ukwishiba ifyo twingacita pa kuti tube ne nsansa mu lupwa. Abantu abengi basanga ukuti Baibolo tayasuka fye amepusho ayacindama, lelo ilalanda na pa fingabafwa mu mikalile. Bushe mulemona ukutila Baibolo kuti ya-afwa abantu?
1. Mepusho nshi yamo ayo Baibolo yasuka?
Baibolo ilasuka amepusho yacindama pamo nga: Bushe ifya mweo fyaishilebako shani? Cinshi twabela pano calo? Mulandu nshi abantu baculila? Cinshi cicitika umuntu nga afwa? Nga ca kuti bonse tulafwaya umutende, cinshi inkondo shafulila mu calo? Bushe isonde likaba shani ku ntanshi? Baibolo itukoselesha ukufwaya amasuko kuli aya mepusho, kabili abantu abengi nga nshi balitemwa amasuko basanga mu Baibolo.
2. Bushe Baibolo kuti yatwafwa shani ukuba ne nsansa?
Mu Baibolo mwaliba ifintu ifisuma ifingi ifingatwafwa. Ku ca kumwenako, ilalanda pa fyo aba mu ndupwa bengacita pa kuti babe ne nsansa sha cine cine. Ilatweba ifyo twingacita nga natusakamikwa, e lyo ne fyo twingacita pa kuti tutemwe incito tubomba. Ilyo tukalalanshanya ifili muli cino citabo, mukamona ifyo Baibolo isambilisha pali ifi twalandapo e lyo na pa fintu na fimbi. Kuti mwashininkisha ukuti “Amalembo yonse [fyonse ifyaba mu Baibolo]” kuti yamwafwa.—2 Timote 3:16.
Ulu ulupapulo talupyene pali Baibolo. Lelo kuti lwamwafwa ukusambilila pa fyaba mu Baibolo. Kanshi tulemukoselesha ukulabelenga amalembo yonse ayali muli aya masambililo, kabili muleyalinganya ku fyo mulesambilila.
SAMBILILENI NA FIMBI
Moneni ifyo Baibolo ya-afwa abantu, ifyo twingacita pa kuti tutemwe ukulabelenga Baibolo, e lyo no mulandu cacindamina ukukwata aba kutwafwa ukumfwikisha ifyaba mu Baibolo.
3. Baibolo kuti yatutungulula
Baibolo yaba kwati ni toci. Nga filya fine toci yafwa umuntu ilyo ale-enda ubushiku, Baibolo nayo kuti yatwafwa ukusala bwino ifya kucita, kabili kuti yatweba ne fikacitika ku ntanshi.
Belengeni Amalumbo 119:105, lyena lanshanyeni amepusho yakonkapo:
-
Bushe uwalembele aya amalumbo alemona shani Baibolo?
-
Bushe imwe mumona shani Baibolo?
4. Baibolo kuti ya-asuka amepusho twakwata
Umwanakashi umo asangile ukuti mu Baibolo mwaliba amasuko ku mepusho ayacindama ayo aletontonkanyapo pa myaka iingi. Tambeni VIDIO, lyena lanshanyeni amepusho yakonkapo.
-
Mepusho nshi ayo umwanakashi aciba muli vidio akwete?
-
Bushe ukusambilila Baibolo kwa-afwile shani uyu mwanakashi?
Baibolo ilatukoselesha ukulaipusha amepusho. Belengeni Mateo 7:7, lyena lanshanyeni icipusho cakonkapo:
-
Mepusho nshi mwakwata ayo nalimo Baibolo ingasuka?
5. Kuti muleipakisha ukubelenga Baibolo
Abengi balaipakisha ukubelenga Baibolo kabili ifyo babelenga filabafwa. Tambeni VIDIO, lyena lanshanyeni amepusho yakonkapo.
-
Bushe abacaice abali muli iyi vidio bamona shani ukubelenga?
-
Nangu ca kuti tabatemwa ukubelenga, cinshi calenga batemwe ukubelenga Baibolo?
Baibolo itila ifyebo fyabamo kuti fyatusansamusha kabili kuti fyalenga twaba ne subilo. Belengeni Abena Roma 15:4, lyena lanshanyeni ici cipusho:
-
Bushe mwatemwa ukwishiba ukuti ifyaba mu Baibolo kuti fyatusansamusha kabili kuti fyalenga twaba ne subilo?
6. Abantu bambi kuti batwafwa ukumfwikisha ifyaba mu Baibolo
Nangu ca kuti abantu abengi balabelenga Baibolo, basanga ukuti ukulanshanya ifyaba mu Baibolo na bantu bambi kulabafwa. Belengeni Imilimo 8:26-31, lyena lanshanyeni ici cipusho:
-
Cinshi cingalenga twaumfwikisha ifyaba mu Baibolo?—Moneni icikomo 30 na 31.
Umwaume umo umwina Etiopia alekabila uwa kumwafwa pa kuti omfwikishe ifyo alebelenga mu Malembo. Na muno nshiku mwine, abengi basanga ukuti ukulanshanya Baibolo na bantu bambi kulabafwa
ABANTU BAMO BATILA: “Ukusambilila Baibolo kuipoosela fye inshita.”
-
Inga imwe muletipo shani? Kabili mulandu nshi mwalandila ifyo?
IFYO MUSAMBILILE
Mu Baibolo mwaliba ifingatwafwa mu mikalile yesu, mwaliba amasuko ku mepusho yacindama, mwaliba ne fingasansamusha abantu kabili ifingalenga baba ne subilo.
Ukupitulukamo
-
Finshi fyaba mu Baibolo ifingatwafwa?
-
Mepusho nshi yamo ayo Baibolo yasuka?
-
Finshi mwingatemwa ukusambilila mu Baibolo?
ISHIBILENIPO NA FIMBI
Moneni ifyo Baibolo ingatwafwa muno nshiku.
“Ifyebo Fyaba Muli Baibolo Filatwafwa Sana” (Ulupungu lwa kwa Kalinda Na. 1 2018)
Moneni ifyo Baibolo ya-afwile umwaume umo uwaletontonkanya pa kuyipaya ukutula ku bwaice.
Moneni ifyaba mu Baibolo ifingalenga aba mu ndupwa baba ne nsansa.
Moneni ifyo Baibolo ilungika ifyo abengi baishiba pa uteka cino calo, ifishili fya cine.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
