ISAMBILILO 38
Muletasha pa Bumi Lesa Amupeela
Tulaipakisha ifintu ifingi pa mulandu wa kuti Lesa alitupeela ubumi. Na lintu tuli na mafya, kulaba fimo ifyo twingaipakisha. Kuti twalanga shani ukuti tulatasha pa bumi Lesa atupeela? Kabili mulandu nshi uwacindama sana uo tulingile ukulatashisha?
1. Mulandu nshi tulingile ukulatashisha pa bumi Lesa atupeela?
Tufwile ukulatasha pa bumi, pantu bupe ubo Shifwe uwatutemwa Yehova atupeela. E “ntulo ya mweo,” pantu e wabumbile ifya mweo fyonse. (Amalumbo 36:9) “E upeela abantu bonse umweo no mupu na fyonse.” (Imilimo 17:25, 28) Yehova alatupeela ifyo tukabila pa kuti tutwalilile ukuba aba mweo. Tapelela fye pa kutupeela ifilenga twatwalilila ukuba no mweo, lelo alibikako ne filenga tutemwe ukwikala pe sonde.—Belengeni Imilimo 14:17.
2. Kuti twalanga shani Yehova ukuti tulatasha pa bumi ubo atupeela?
Yehova atendeke ukumubikako amano ukutula fye ilyo mwali mwi fumo. Mwi pepo Davidi apepele ilyalembwa mu Baibolo, atile: “Ilyo fye nalepangwa amenso yenu yalimwene.” (Amalumbo 139:16) Yehova amona ukuti ubumi bwenu bwalicindama nga nshi. (Belengeni Mateo 10:29-31.) Kanshi alomfwa sana ububi nga ca kuti umuntu ku mufulo fye aipaya umuntu munankwe nelyo ayipaya. a (Ukufuma 20:13) Na kabili Yehova alomfwa sana ububi nga ca kuti ku mufulo fye twacita ifingalenga twaba mu busanso nelyo abantu bambi baba mu busanso. Nga tulesakamana bwino ubumi bwesu kabili tulecindika no bumi bwa bantu bambi, ninshi tulelanga ukuti tulatasha pa bumi ubo Lesa atupeela.
SAMBILILENI NA FIMBI
Moneni inshila shimo isho mwingalangilamo ukuti mulatasha pa bumi ubo Lesa amupeela.
3. Mulesakamana bwino ubumi bwenu
Abena Kristu abaipeela kuli Yehova balamubombela ubumi bwabo bonse. Caba kwati balipeela imibili yabo nge lambo kuli ena. Belengeni Abena Roma 12:1, 2, lyena lanshanyeni aya mepusho:
-
Cinshi cifwile ukumulenga mwalafwaisha ukulasakamana bwino ubumi bwenu?
-
Finshi fimo ifyo mwingacita pa kuti mulesakamana bwino ubumi bwenu?
4. Mwilacita ifingalenga umuntu acenekwa nelyo afwa
Baibolo itukoselesha ukuti tatulingile ukulacita ifingabika ubumi bwesu mu kapoosa mweo. Tambeni VIDIO pa kuti mumone fimo ifyo tulingile ukucita pa kuti tulecingilila ubumi bwesu.
Belengeni Amapinda 22:3, lyena lanshanyeni ifyo mwingacita pa kuti mucingilile ubumi bwenu no bumi bwa bantu bambi . . .
-
ilyo muli pa ng’anda.
-
ilyo muli ku ncito.
-
ilyo muleangala.
-
ilyo muli muli motoka nangu ilyo mule-ensha motoka.
5. Mulecindika ubumi bwa mwana uushilafyalwa
Davidi alondolwele ukuti Yehova alabika sana amano kuli fyonse ificitika ilyo umwana alekula mwi fumo lya kwa nyina. Belengeni Amalumbo 139:13-17, lyena lanshanyeni ici cipusho:
-
Ni lilali Yehova atendeka ukumona ukuti ubumi bwa muntu bwalicindama? Bushe ni lintu umwanakashi aimita nelyo ni lilya umwana afyalwa?
Yehova alipeele abena Israele amafunde ayalecingilila abanakashi abali pa bukulu na bana babo abashilafyalwa. Belengeni Ukufuma 21:22, 23, lyena lanshanyeni aya mepusho:
-
Bushe Yehova alemona shani umuntu uwaipaya umwana uushilafyalwa mu kukanaishiba?
-
Bushe kuti aumfwa shani nga ca kuti umuntu ku mufulo fye aipaya umwana uushilafyalwa? b
-
Bushe muletontonkanya ukuti ifi Lesa amona ubumi fyaliba fye bwino?
No mwanakashi uwaishiba ukuti ubumi bwalicindama, inshita shimo kuti atendeka ukulatontonkanya ukuti afwile fye ukuponya ifumo. Belengeni Esaya 41:10, lyena lanshanyeni aya mepusho:
-
Nga ca kuti umwanakashi balemupatikisha ukuponya ifumo, ni kuli nani afwile ukulomba ubwafwilisho? Kabili cinshi alingile ukucitila ifi?
ABANTU BAMO BATILA: “Umwanakashi alikwata insambu sha kuponya ifumo, kabili lifumo lyakwe.”
-
Cinshi calenga mushininkishe ukuti Yehova alicindika ubumi bwa mwanakashi uuli pa bukulu e lyo no bwa mwana uuli mwi fumo lyakwe?
IFYO MUSAMBILILE
Baibolo itusambilisha ukuti tufwile ukutemwa, ukucindika, no kulacingilila ubumi ubo Yehova atupeela. E kutila ubumi bwesu e lyo no bwa bantu bambi.
Ukupitulukamo
-
Cinshi Yehova amwena ukuti ubumi bwalicindama?
-
Bushe Yehova omfwa shani nga ca kuti umuntu aipaya umuntu munankwe ku mufulo fye?
-
Finshi mwatemwapo sana pali ifi Lesa atupeela ubumi?
ISHIBILENIPO NA FIMBI
Kuti twatasha shani Yehova pa bumi ubo atupeela?
Moneni nga ca kuti Lesa kuti aeleela umwanakashi uwaponeshepo ifumo.
“Finshi Baibolo Ilanda pa Kuponya Ifumo?” (Icipande ca pa jw.org)
Moneni ifyo ukwishiba ifyo Lesa amona ubumi kwingatwafwa ukulasala ifyangalo ifishingabika ubumi bwesu mu kapoosa mweo.
“Bushe Mufwile Ukuibika mu Kapoosa Mweo ka ‘Mangalo ya Busanso’?” (Loleni!, October, 2000)
Moneni ifyo Baibolo ingafwa umuntu uuletontonkanya pa kuipaya.
“Bushe Baibolo Kuti Yamwafwa nga Mulefwaya Ukuyipaya?” (Icipande ca pa jw.org)
a Yehova alibika sana amano ku baba ne mitima ya bulanda. (Amalumbo 34:18) Aleshiba icilenga umuntu alaumfwa sana ububi ica kuti alafwaya no kuipaya, kabili alafwaya ukumwafwa. Pa kuti mumone ifyo Lesa engafwa umuntu ukuleka ukutontonkanya pa kuipaya, belengeni icipande cileti “Bushe Baibolo Kuti Yamwafwa nga Mulefwaya Ukuyipaya?” icili apaleti “Ishibilenipo na Fimbi” muli lino line isambililo.
b Abaponeshepo ifumo tabalingile ukulaumfwa sana ububi ica kuti balamona kwati Yehova te kuti ababelele uluse. Nga mulefwaya ukwishibilapo na fimbi, moneni icipande cileti “Finshi Baibolo Ilanda pa Kuponya Ifumo?” icili apaleti “Ishibilenipo na Fimbi” muli lino line isambililo.
Nalimo Kuti Mwatemwako ne fi
AMEPUSHO ABANTU BEPUSHA SANA
Bushe Isambililo lya Baibolo E Cinshi?
Amasuko ku mepusho pe sambililo lya Baibolo ilyabula ukulipilisha.
