HONDURAS lishiwi lya ciSpanish ilipilibula ukuti “Ukushika,” kabili nalimo ili e shiwi Christopher Columbus abomfeshe ku kulondolola ifyashika Bemba wa Atlantic iyabela mupepi ne ci calo. Bamo batila ici e calengele baleita ici calo ati Honduras.

Abena Honduras balicindika sana bucishinka mu lupwa e lyo no kubombela pamo. Ku ca kumwenako, nga balepingula pa fintu pamo nga ifya kubomfya indalama pa ng’anda nelyo ifya masukulu, abalume na bakashi bafwile ukusuminishanya intanshi.

Abena Honduras abengi, bafyelwe ku bena Bulaya abaleupana na bena America inkonko. Lelo kwena abena Hondurus inkonko bamo pamo nga aba Chortí e ko baba na pali ino ine inshita. E lyo abena Honduras bambi pamo nga aba Garifuna bena ifikolwe fyabo fyafumine fye kumbi.

Aba Garifuna bafyelwe ku bena Afrika abaleupana  na bafumine ku India abo beta ukuti abena Carib Indian abaleikala pa cishi ca St. Vincent. Aba Garifuna nalimo bafikile pa cishi ca Islas de la Bahía (Bay Islands) mu 1797. Pa numa baileikala mu Central America ku lulamba lwa bemba wa Caribbean. Lyena batendeke ukuya ku ncende shimbi mu Central America kabili bailefika na mu North America.

Aba Garifuna balitemwa ukushana inyimbo isho balisha ne ng’oma. Kabili bafwala ifya kufwala ifya malangi ayamwenekesha sana, balitemwa ukushimika amalyashi, kabili balya ereba (umukate uwapapatala uo bapangila na tute).

Mu Honduras mwaba ifilonganino fya Nte sha kwa Yehova 400. Pa kulongana babomfya iciSpanish, iciNgeleshi, iciGarifuna, ululimi lwa ba cibulu ulwa mu ciHonduras, iciMandarin Chinese, ne ciMiskito.