Alamona Ubusuma mu Bantu
Palameni Kuli Lesa
Alamona Ubusuma mu Bantu
“YEHOVA alafwaya mu mitima yonse, kabili aleluka na matontonkanyo yonse.” (1 Imilandu 28:9) Ico aya mashiwi yafuma kuli Lesa yalembelwe ni pa kutila tuletasha pa fyo Yehova atubikako sana amano. Yehova amonamo ubusuma mu mitima yesu nangu ca kutila tuli babembu. Kuti twashininkisha ici nga twabelenga amashiwi aebele Abiya ayalembwa pali 1 Ishamfumu 14:13.
Ulupwa lwa kwa Abiya lwali ulubi nga nshi. Yeroboamu wishi e watendeke ubusangu pa shamfumu sha mu Israele. * Yehova apangile ukupyanga ing’anda yonse iya kwa Yeroboamu, nga filya “umuntu apyanga amafi.” (1 Ishamfumu 14:10) Lelo Lesa asosele ukuti pali bonse aba mu ng’anda ya kwa Yeroboamu, ni Abiya fye uwalwele sana, e wali no kushiikwa bwino. * Mulandu nshi? Lesa alondolwele ukuti: “Pantu Yehova nasangamo ubusuma muli ena mu ba mu ng’anda ya kwa Yeroboamu.” (1 Ishamfumu 14:1, 12, 13) Bushe aya mashiwi yatulanga ukuti Abiya ali muntu wa musango nshi?
Baibolo tayatweba nga ca kuti Abiya ali ni kapepa wa cishinka uwa kwa Lesa. Na lyo line, mwaliko ubusuma bumo muli ena. Aletontonkanya ifisuma pali “Yehova,” napamo pa kupepa Kwakwe. Bakalemba ba ciRabi batila nalimo Abiya aimine ubulendo ukuya kwi tempele mu Yerusalemu nelyo alifumishepo abalinshi abo wishi abikileko pa kuti balelesha abena Israele ukuya ku Yerusalemu.
Lelo te mulandu ne fyo cali, icishinka ca kuti ubusuma bwali muli Abiya bwalimoneke. Ica kubalilapo ca kuti alefwaisha ukucita ifisuma ifyo aletontonkanyapo. Ubu busuma bwali “muli ena,” e kutila mu mutima wakwe. Ica bubili ca kuti bwali-ibelele. Muli Abiya mwali ubusuma nangu cingati ali “mu ng’anda ya kwa Yeroboamu.” Uwasoma umo atile: “Umuntu uwa kuti ekala na bantu ababipa nangu mu lupwa ulwabipa e lyo atwalilila ukuba umusuma ninshi mwaume icine cine.” Umbi na o atile ubusuma bwali muli Abiya “bwalemoneka . . . , nga filya fine intanda shibeeka nga nakufiita, nelyo kwati ni filya imikedari imoneka bwino nga imiti ipalamineko yalilukusha amabuula.”
Ne cacindama sana ca kuti amashiwi yaba pali 1 Ishamfumu 14:13 yalatusambilisha icintu cimo icisuma pali Yehova ne co afwaya ukumona muli ifwe. Mwilaba ukuti Lesa ‘alisangile’ ubusuma muli Abiya. Cimoneka kwati Yehova aliceceetele mu mutima wa kwa Abiya mpaka asangamo ubusuma bumo. Kalemba umo atile, Abiya ali kwati ni margariti imo pa “mwina wa mabwe,” pantu e wali fye umusuma mu lupwa lonse. Yehova alitemenwe sana ubusuma bwali mu Abiya ica kuti alimulambwile, kabili alimulangile uluse nangu ca kutila ulupwa lwakwe lwali ulubi.
Bushe tacitusansamusha ukwishiba ukuti Yehova amona fye ubusuma muli ifwe kabili alatemwa ilyo amona ubu busuma te mulandu no kuti tatwapwililika? (Amalumbo 130:3) Ukwishiba ifi kufwile ukutulenga ukupalama kuli Yehova, Lesa uuceceeta imitima yesu ukuti amonemo ubusuma nangu fye ubunono.
[Amafutunoti]
^ para. 5 Yeroboamu e walengele ukuti kube ukupepa umwana wa ng’ombe mu bufumu bwa mikowa 10 ubwa ku kapinda ka ku kuso aka Israele pantu talefwaya abantu baleya mu kupepa Yehova mwi tempele ku Yerusalemu.
^ para. 5 Kale sana, umuntu nga tabamushiikile bwino, cali cilangililo ca kuti Lesa tatemenwe incitilo shakwe.—Yeremia 25:32, 33.