Ifintu 7 Ifyo Mwingacita pa Kuti Mulenonkelamo mu Kubelenga Baibolo

“Ukufuma fye na kale, Baibolo balaishita sana, na pali ino ine nshita e yo bashita sana cila mwaka ukucila icitabo icili conse.”—TIME MAGAZINE.

“Ndabelenga Baibolo limo limo, nomba ilantendusha sana.”—KEITH, KEMBA WALUMBUKA UWA KU ENGLAND.

ABANTU abengi balikwata Baibolo, nomba icipapusha ca kuti tabanonkelamo sana mu kuibelenga. Lelo bamo balicindika ifyo babelenga mu Baibolo. Ku ca kumwenako, umwanakashi umo uwe shina lya kuti Nancy atile: “Ukutula apo natendekela ukubelenga Baibolo cila lucelo no kutontonkanya pa fyo ndebelenga, ndeshiba ifya kucita na mafya ayo nkwata cila bushiku. Ukubelenga Baibolo no kutontonkanya pa fyo ndebelenga e kwangafwa sana ukupwisha amasakamika ukucila icili conse ico nabomfyapo pa myaka 35 iyapita.”

Nangu ca kutila tamwatala amubelengapo Baibolo, bushe tamupapa ukwishiba ukuti bamo yalibafwa nga nshi? Nga ca kutila mulabelenga Baibolo, bushe kuti mwatemwa ukulanonkelamo sana mu fyo mubelenga? Nga kuti mwatemwa, esheniko ukukonka inshila 7 ishilondolwelwe muli cino cipande.

1—Ishibeni ico Mulebelengela

◼ Nalimo ico mubelengela Baibolo mulandu wa kuti citabo icisuma, nelyo mulingile fye ukuibelenga, nangu mufwaya ilemutungulula muli cino calo ca mafya. Lelo kuti mwanonkelamo sana nga ca kutila ico muleibelengela kufwaya ukwishiba icine pali Lesa no kufwaya ukumona ifyo amashiwi yabamo yengakuma ubumi bwenu.

Amalembo yalalangilila ubucindami bwa kwishiba ico tuyabelengela lintu yalinganya Baibolo ku cilola, yatila: “Umuntu nga aleumfwa fye icebo ca kwa Lesa, nomba talecita ifyo cisosa, aba ngo muntu uulolesha mu cilola. Pantu ilyo apwa ukuilolesha no kufumapo, apo pene alaba ifyo aba. Lelo uulolesha mu mafunde ayapwililika ayatulenga ukuba abantungwa no kulayakonka, uyu muntu, apo tomfwa fye no kulabako, lelo alacita ifyo icebo  cisosa, akaba uwa nsansa ilyo alecita ifyo fine.”—Yakobo 1:23-25.

Umuntu uo ili lembo lyalandapo alimwene ifyo alemoneka mu cilola nomba alekele fye ukwabula ukuiwamya. Nalimo ailoleshe fye mu cilola ukwabula ukubikako amano ku fyo alemoneka nangu limbi talefwaya ukuwamya imimonekele yakwe. Na ifwe te kuti tunonkelemo sana nga ca kutila tatulebika amano ku kubelenga Baibolo lyonse nangu nga tatulecita ifyo tulebelenga. Lelo tukaba ne nsansa sana nga ca kutila tulebelenga Baibolo no mutima wa kufwaya ‘ukucita’ ifyo tulebelenga, ukuleka ukutontonkanya kwa kwa Lesa e ko kuletungulula amatontonkanyo yesu ne ncitilo.

2—Saleni Baibolo Iisuma

◼ Nalimo mwalikwata amaBaibolo ayengi ayalembwa mu lulimi lwenu. Nangu ca kutila Baibolo iili yonse kuti yamunonsha, lelo muli yamo babomfya ululimi lwa kale sana kabili ulwakosa ukumfwa. (Imilimo 4:13) Mu maBaibolo yamo balaalulamo ne fyebo fine fine ififwile ukubamo, e lyo balembamo amano ya bantu. Ku ca kumwenako, nga fintu tumwene mu fipande fya kubalilapo muli ino magazini, bamo balifumya ishina lya kwa Lesa ilya kuti Yehova mu maBaibolo no kubikamo amalumbo pamo nga “Lesa” nangu “Shikulu.” Kanshi ilyo mulesala Baibolo ya kubelenga, saleni iyalungama, iya-anguka ukumfwa kabili iyo mwingatemwa ukubelenga.

Abantu abengi nga nshi ababelenga Baibolo basanga ukutila Baibolo ya Amalembo ya Calo Cipya yalilungama, yalyanguka ukumfwa kabili kuti mwatemwa ukuibelenga. * Umfweni ifyalandile bashikulubantu bamo aba ku Bulgaria. Baile ku kulongana kwa Nte sha kwa Yehova uko bailebapeela Baibolo ya Amalembo ya Calo Cipya. Pa numa balandile ukuti, “Nalibelenga Baibolo pa myaka iingi, lelo nshatala belengapo Baibolo iya-anguka ukumfwa nge yi kabili iya kuti ilemfika pa mutima.”

3—Mulepepa

◼ Pa kuti mumfwikishe ifyalembwa muli Baibolo kano mwalomba umwine uwailembele ukuti amwafwe, nga filya fyacitile uwalembele amalumbo, uwatile: “Nshibuleni amenso, pa kuti mone ifipesha amano ifya mu mafunde yenu.” (Amalumbo 119:18) Lyonse nga mulebelenga Baibolo, mulepepa kuli Lesa, ukumulomba ukuti amwafwe ukumfwikisha Icebo cakwe. Kuti mwamutasha no kumutasha pa kutupeela Baibolo, pantu aikanabako nga tatwaishiba Lesa.—Amalumbo 119:62.

Bushe Lesa alakutika amapepo ya musango yu, aya kulomba ukuti amwafwe? Umfweni icacitike ku banankashi babili ku Uruguay. Aba bakashana tabaishibe umwalolele amashiwi babelengele pali Daniele 2:44 kabili bapepele kuli Lesa ukuti atume uwa kubalondolwela umo ili lembo lyalola. Ilyo tabalakupika na Baibolo, baNte babili balishile, babelengele ilembo lilya line abakashana bapepelepo kabili babalondolwelele ukuti ili lembo lilanda pa Bufumu bwa kwa Lesa ukuti e bukapyana amabuteko ya bantunse. * Aba bakashana balishininkishe ukuti Lesa alyaswike ipepo lyabo.

4—Muleibelenga Cila Bushiku

◼ Umwaume umo uulemba ifitabo asangile ukuti pa numa ya kusansa kwa fipondo mu United States pa 11 September, 2001 “abantu balitendeke ukushita sana amaBaibolo.” Abengi babelenga fye Icebo ca kwa Lesa nga baba na mafya. Lelo Baibolo itukoselesha ukulaibelenga cila bushiku, pantu itila: “Ibuuku ili ilya mafunde wileka lifume mu kanwa kobe, kabili ulebelenga ifyalembwa muli ili buuku no kwetetulapo akasuba no bushiku, pa kuti ubike amano ku kulakonka fyonse ifyalembwamo; pantu e lyo ukatunguluka kabili e lyo ukaba uwa mano.”—Yoshua 1:8.

Ukubelenga Baibolo kwalicindama sana. Pa kuti tumone ifyo kwacindama, natulangilile. Tutile umuntu alilwele ubulwele bwa ku mutima e lyo badokota bamweba umusango wa fya kulya alingile  ukulalya nomba talefikonka. Bushe kuti camwafwa nga ca kuti atendeka ukulya ifyo badokota bamwebele lilya umutima watampa ukukalipa? Awe nakalya. Afwile lyonse ukulakonka ifyo bamweba ukulalya e lyo engaba no bumi ubusuma. E fyo no kubelenga Baibolo cila bushiku kukamwafwa ‘ukutunguluka.’

5—Mulebomfya Inshila Shalekanalekana pa Kubelenga

◼ Ukubelenga Baibolo ukutampila ku Ukutendeka mpaka ku Ukusokolola na ko kuti kwaba fye bwino, lelo kwaliba inshila na shimbi ishisuma isha kubelengelamo. Shimo ni shi shakonkapo.

Belengeni pa lyashi lya muntu umo umo. Belengeni ifipandwa fyonse nelyo amabuuku yonse ayalanda pa muntu umo uwalembwa mu Baibolo uwalepepa Lesa, pamo nga:

• Yosefe: Ukutendeka 37-50.

• Ruti: Ruti 1-3.

• Yesu: Mateo 1-28; Marko 1-16; Luka 1-24; Yohane 1-21. *

Bikeni fye amano ku lyashi musalile. Belengeni amalembo ayalelanda pali ilyo lyashi. Ku ca kumwenako, fwailisheni ifyebo ifilanda pe pepo, lyena belengeni na pa fyo Baibolo itufunda pa kupepa kabili belengeni na mapepo yamo ayalembwa muli Baibolo. *

Mulepongomoka pa kubelenga. Kuti mwanonkelamo sana nga ca kutila mulepongomoka pa kubelenga Baibolo. (Ukusokolola 1:3) Kuti mulebelengela pamo no lupwa, mulelekanina ukubelenga ifikomo nangu kuti mwayakana umwa kubelenga ukulingana na bantu bali mu lyashi mulebelenga. Bamo balaipakisha ukukutika kuli Baibolo iyo bakopa pa matepu na pa ma CD. Umwanakashi umo atile: “Calingafishe sana ukutampa ukubelenga Baibolo, e ico natendeke ukulakutika ku yo bakopa pa matepu na pa ma CD. Ino nshita nalisanga ukuti Baibolo isuma sana ukubelenga ukucila icitabo icili conse ico balemba bwino.”

6—Muletontonkanya pa fyo Mulebelenga

◼ Cilafya ukusanga inshita ya kutontonkanya pa fyo umuntu alebelenga pantu muno nshiku abantu balipamfiwa e lyo ne fya kupumfyanya na fyo fingi. Lelo nga filya fine ifilyo tulya fikabila ukusungululwa mu mubili pa kuti fibombe bwino, e fyo na ifwe tukabila ukulatontonkanya pa fyo tulebelenga mu Baibolo pa kuti tunonkelemo. Kuti twacita ifi nga tulepituluka mu fyo tulebelenga no kuipusha amepusho pamo nga: ‘Finshi nasambilila pali Yehova Lesa? Kuti nafibomfya shani? Kuti nabomfya shani ifi fyebo ku kwafwa bambi?’

Nga tuletontonkanyapo muli uyu musango ninshi ifyo tulebelenga muli Baibolo fikalatufika pa mutima kabili tukalatemwa no kubelenga Icebo ca kwa Lesa. Amalumbo 119:97 yatila: “Amafunde yenu naliyatemwa icine cine! Akasuba konse e yo ntontonkanyapo.” Ukutontonkanya sana pa mafunde ya kwa Lesa kwalengele ukuti uwaimbile amalumbo aletontonkanya pa mafunde ya kwa Lesa akasuba konse. Ukucite fi kwalengele atemwishe ifyo alesambilila.

7—Ipusheni Bambi Ukuti Bamwafwe Ukumfwikisha Baibolo

◼ Lesa tenekela ifwe ukwishiba ifyaba mu Baibolo ukwabula aba kutwafwa. Na Baibolo ine yalilanda ukuti ‘mwaliba ifintu fimo ifya-afya ukwiluka.’ (2 Petro 3:16) Ibuuku lya Imilimo lilanda pa mwina Etiopia uushaishibe umwalolele ifyo abelengele muli Baibolo. Lesa atumine umubomfi wakwe ku kumwafwa, ne cafuminemo ca kuti umwina Etiopia “aile pa lwendo lwakwe alesekelela.”—Imilimo 8:26-39.

Na imwe bene kuti mwanonkelamo nga nshi mu kubelenga Baibolo nga ca kutila mwaebako bamo ukumwafwa ukwishiba ifyo mulebelenga. Nga mulefwaya ukulasambilila Baibolo apa fye, kuti mwaeba Inte sha kwa Yehova ababela uko mwikala, nelyo kuti mwalembela ku maofeshi yabo ukubomfya adresi ili pe bula 4 muli ino ine magazini.

[Amafutunoti]