Baebol i tokbaot klia ol samting we Jehova mo Jisas bambae tufala i mekem, blong finisim ol trabol blong Setan. Baebol i talem se: ‘From samting ya nao Pikinini blong God i kamtru, blong i brekemdaon ol wok we Setan i mekem.’ (1 Jon 3:8) Yes, fasin griri mo fasin ya blong no laekem narafala, mo ol rabis fasin we oli fulap long wol ya, bambae oli finis. Mo Jisas i promes se bambae hem i “brekem paoa” blong Devel Setan, we i “stap rulum wol ya.” (Jon 12:31) Ale, stret fasin nomo bambae i stap long wol ya, mo bambae i no moa gat trabol, from we Setan i no moa stap.—2 Pita 3:13.

?Olsem wanem long olgeta we oli no wantem jenisim rabis fasin blong olgeta? Yu traem luk samting we Baebol i talem, i se: ‘Ol stret man nomo, bambae oli save stap gud long wol ya blong yumi. Be ol man nogud we oli stap mekem ol rabis fasin, bambae God i tekemaot olgeta oli gowe long wol ya. Hem bambae i rutumaot olgeta, olsem we man i stap rutumaot ol smosmol tri long garen.’ (Ol Proveb 2:21, 22) Yes, ol rabis fasin bambae oli finis, from we ol rabis man oli lus. Ale sloslo ol man we oli obei long God, bambae oli fri long fasin blong sin, mo oli kam stret gud.—Rom 6:17, 18; 8:21.

Long niufala wol, ?God bambae i mekem olsem wanem blong finisim ol rabis fasin? Bambae hem i no fosem ol man blong oli jenisim fasin blong olgeta, olsem wan kenu we man i i kontrolem. Be, bambae hem i tijim ol gudfala man, mo i givhan long olgeta blong oli sakemaot ol nogud tingting mo ol rabis fasin.

?Olsem wanem long ol trabol we oli kasem yumi we yumi no tingbaot? ?God bambae i finisim olgeta? Jehova i promes se i no longtaem, Kingdom blong hem bambae i rulum fulwol. King blong Kingdom ya hemia Jisas Kraes. Hem i gat paoa blong finisim ol sik. (Matiu 14:14) Mo tu, hem i gat paoa blong finisim ol disasta, olsem hariken. (Mak 4:35-41) Yes, ol trabol we yumi stap harem nogud long hem mo we oli stap kasem yumi enitaem, bambae oli finis. (Prija 9:11, NW) Ale, aninit long rul blong Kraes, bambae i no moa gat ol trabol we oli stap mekem yumi safa.—Ol Proveb 1:33.

?Olsem wanem long ol milian man we oli ded from ol trabol ya? Bifo we Jisas i mekem Lasaros i laef bakegen, hem i talem se: ‘Mi nao, mi stamba blong laef bakegen long ded, mo mi stamba blong laef.’ (Jon 11:25) !Yes, Jisas i gat paoa blong mekem olgeta we oli ded, oli laef bakegen!

?Yu yu glad blong save se long niufala wol, ol trabol bambae oli no moa kasem ol gudfala man? Sipos yes, i gud yu stadi long Baebol blong kasem save tru God mo stamba tingting blong hem. Ol Witnes blong Jehova long eria blong yu, bambae oli glad nomo blong stadi Baebol wetem yu. Yu save askem long wan Witnes long ples blong yu, no yu save raet i go long adres blong olgeta we oli wokem magasin ya.