Long lanwis Grik, nem blong Buk Blong Revelesen, hem i A·po·kaʹly·psis (apokalips), we i minim “soemaot” o “mekem i kam long klia ples.” Nem ya i talemaot mining blong Revelesen—se hem i soemaot ol samting we oli bin haed mo i mekem ol samting we oli bin raetem longtaem bifo oli kam long klia ples. Plante profet tok we buk ya i talemaot, bambae oli kamtru yet long fiuja.

Ol men samting long buk blong Revelesen

•   Fastok.—Revelesen 1:1-9.

•   Mesej we Jisas i givim long ol seven kongregesen.—Revelesen 1:10–3:22.

•   Wan vison we i soemaot God, long tron blong hem long heven.—Revelesen 4:1-11.

•   Ol defdefren vison, we wan i kamaot afta long narawan:

  •   Ol seven stamp.—Revelesen 5:1–8:6.

  •   Ol seven trampet, we tri laswan i talemaot tri trabol.—Revelesen 8:7–14:20.

  •   Ol seven dis, we insaed long olgeta wanwan i gat wan trabol we i representem jajmen blong God we bambae oli kafsaedem i kam long wol.—Revelesen 15:1–16:21.

  •   Ol vison we i soemaot taem ya we God bambae i spolem ol enemi blong hem.—Revelesen 17:1–20:10.

  •   Ol vison we i soemaot ol blesing we God bambae i mekem i kamtru long heven mo long wol.—Revelesen 20:11–22:5.

•   Lastok.—Revelesen 22:6-21.

Ol men poen blong kasemsave long buk blong Revelesen

1.   Mining blong ol tok long buk ya oli positif, mo oli no mekem ol man we oli mekem wok blong God oli fraet. Be plante man oli talem se tok ya “apokalips” i joen wetem bigfala disasta, be buk blong Revelesen i stat mo i finis wetem tok ya se, olgeta we oli ridim, oli kasemsave, mo oli folem ol tok ya, bambae oli glad.—Revelesen 1:3; 22:7.

2.   Revelesen i yusum plante “saen,” o ol pijatok, we oli no rili minim stret samting we i stap, be i mining defren samting.—Revelesen 1:1.

3.   Plante bigfala samting mo pijatok we i stap long buk blong Revelesen oli bin tokbaot tu long stat blong Baebol:

   •   Jehova—“trufala God blong heven” mo God Ya We i Wokem olgeta samting.—Dutronome 4:39; Ol Sam 103:19; Revelesen 4:11; 15:3.

   •   Jisas Kraes—“Smol Sipsip Blong God.”—Jon 1:29; Revelesen 5:6; 14:1.

   •   Devel Setan—enemi blong God.—Jenesis 3:14, 15; Jon 8:44; Revelesen 12:9.

   •   Bigfala Babilon—i olsem Babilon we i stap bifo (Babel), wan enemi blong Jehova God mo blong ol man blong hem mo hem i stamba blong olgeta giaman tijing blong ol skul.—Jenesis 11:2-9; Aesea 13:1, 11; Revelesen 17:4-6; 18:4, 20.

   •   “Solwota”—ol man nogud we oli agensem God.—Aesea 57:20; Revelesen 13:1; 21:1.

   •   Ol samting we i sem mak olsem ol samting we oli bin yusum long tabenakel, blong mekem wosip long God—i gat bokis blong kontrak, wan samting we i olsem solwota i stap mo i olsem glas (besin blong swim), ol laet, insens blong ofring, mo wan olta blong mekem sakrefaes.—Eksodas 25:10, 17, 18; 40:24-32; Revelesen 4:5, 6; 5:8; 8:3; 11:19.

   •   Ol wael animol—pija blong ol gavman blong man.—Daniel 7:1-8, 17-26; Revelesen 13:2, 11; 17:3.

   •   Ol namba we oli gat mining.—Revelesen 1:20; 8:13; 13:18; 21:16.

4.   Ol vison ya oli joen wetem “dei blong Masta,” we i stat long taem ya we Kingdom blong God i stanap long 1914 mo Jisas i stat blong rul olsem King. (Revelesen 1:10) Long taem blong yumi tede, yumi save ekspektem blong luk ol samting we Revelesen i tokbaot oli kamtru.

5.   Blong kasemsave long buk blong Revelesen, yumi nidim sem samting we i halpem yumi blong kasemsave long ol narafala haf blong Baebol. Hemia ol samting olsem waes we i kam long God mo help blong ol man we oli kasemsave finis long buk ya.—Ol Wok 8:26-39; Jemes 1:5.