Yésus a ndôme kobô ajô bindune bengon awôm a betalent a too Nkôle Beolivier. Nde aval avé a ke suu éyalane jé a lat a nsili beyé’é bé be nga sili nye, ô fombô’ô éyoñ a ye jôé, a asu’ulane ya nta’ane mam? A bo de a zene ya nkana wo su’ulan, ô fombô’ô mintômba a bikela.

Yésus a taté liti mame ma ye boban a jô’ô na: “Éyoñe Mona môt a ye so étôto’o jé ba be beéngele bé bese, a ye tabe étôto’o éto njôane jé.” (Matthieu 25:31, Mfefé Nkôñelan) Nkana wu wo dañe kobô ajô Yésus émien. Amu a jaéya loon émiene na “Mona môt.”​—Matthieu 8:20; 9:6; 20:18, 28.

Nkana ôte wo ye tôéban éyoñ évé? A ne éyoñe Yésus “a ye so étôto’o jé” a beéngele bé, a tabe “étôto’o éto njôane jé.” A mbe a kobôya ajô “Mona môt a so’o minkute ya yôp a ngu a beta étôtok,” a beéngele bé. Jam ete da ye boban éyoñ évé? “Été été, éyoñe nju’u ya mimôse mite ô maneya.” (Matthieu 24:29-31, Mfefé Nkôñelan; Marc 13:26, 27; Luc 21:27) Bi nga wô’ô valé na, nkana ôte wo ye tôéban melu ma zu, éyoñe Yésus a ye so étôto’o jé. Jé a ye bo?

Yésus a timine de a jô’ô na: “Éyoñe Mone môt a ye zu . . . , meyoñe mese me aye sulan asu dé: a ye kandé bôt, aval ane mba’ale a kandé mintômba a bikela; a ye telé mintômba mbo nnôme wé, ve bikela mbo nga.”​—Matthieu 25:31-33.

Jé ja ye kui mintômba? Yésus a jô na: “Éyoñe te njô bôt a ye jô ba ba ye tebe nye mbo nnôme na: Za’an, mia bôt Ésaa wom a nga botan, nyoñane ngab éjôé é nga kômban asu denan ataté ane émo é nga téban.” (Matthieu 25:34, Mfefé Nkôñelan) Amu jé mintômba mia yené mvaé mise me Njôô?

 Njôô a timine de a jô’ô na: “Amu me nga wô’ô zaé a mi nga ve ma bidi ; me nga wô’ô évé a mi nga nyuu ma mendim; me mbe nneñ a mi nga nyoñe ma; soé a mi nga jalé ma ngômesan; me nga kon a mi nga jome ma; me mbe mimbôk ane mi nga zu yene ma.” Éyoñe mintômba mite, “bezôsôô be bôt,” mia sili a zen fé be nga bo mam mete, a yalane be na: “Bebela ma kate mia na: éyoñ ése mi nga bo wua ya ayôme bôt da dañe tyôtyoé di jam mbe be ne bobejañ, ma ñhe le mi nga bo de.” (Matthieu 25:35, 36, 40, 46, Mfefé Nkôñelan) Be nji bo mbamba be mam bete e yôb été, amu môt éziñ a nji kone wôé, nge wô’ô zaé. Mimboone mite mia yiane ñhe bo mi be nga bo bobenyañ be Krist e si va.

Asu bikela ki bi tele mbo nga? Yésus a jô na: “Wôna [Njô] a ye jô fe bôt be ne nye mbo ngale na, A bôt be ne biyo’é, kôla’ane vôm me to, kelan nduane ya melu mese Zambe a nga kôme fe Satan a beange bé. Amu me nga wô’ô zaé, mi te ve me bidi; me nga wô’ évé mi te nyuu me mendim; me mbe nneñ, mi te ve me nda; me mbe soé, mi te jalé me ngômesan; me mbe ôkon, a nda mimbo’ été, mi te zu yene ma.” (Matthieu 25:41-43) Ntyi’an ajô ôte wo yiane fo’o, amu bikela bite bi nji mvamane bobenyañ be Krist éyoñ be nga too si ane be nga yiane bo.

Minlôman mia wô’ô na ntyi’an ajô te wo ye soo mbia be mam nnôm éto. Yésus a jô be na: “[Njô bôt] a ye yalane be na: Bebela ma jô mia na, e vôme mi nga bo te bo wua ya ayôme bôt da dañe tyôtyoé dina jam, vôm ate mi nga bo te bo ma. Balé bete ba ye tôbane melebe ya nnôm éto, ve bezôsôô be bôt ba ye nyoñ ényiñe ya nnôm éto.”​—Matthieu 25:45, 46, Mfefé Nkôñelan.

Éyalane Yésus a ndôme ve minlôman mié ja ve beyé’é bé bese jame ya fas. Ba yiane sili bebien aval abo dulu avé be bili, a aval avé nleme wop ô né.