Nté Yésus a ke ôsu a ye’ele Judée, a kobô ajô éziñ, ajô bôte ba vô’ôlô nye be ne ji’a wôk: mintômba a abemba mintômba. Ve a belan éve’an. Bejuif ba yiane simesane mejô me David ma: “Yéhôva a ne mba’ale wom; m’aye ke yi jôm. A kañese na me jô’ôbô mbamba miñyanebe été.” (Besam 23:1, 2) E sam mfe, David a nga bañete ayoñ a jô’ô na: “Zaka bi kutane meboñe si asu Yehôva Nté wongan: Amu a ne Zambe wongan, a bia bi ne bôte ya ñyanebe wé.” (Besam 95:6, 7) Ôwé, nté ane be ne Atiñe si, be ja’aya zu ba ve’e bone b’Israël ane mbame mintômba.

“Mintômba” mite mi ne “abemba” avale dina na, mi nga bialé élate y’Atiñe Moïse si. Atiñ ete e ne be ane nka’alé wo kamane mie ékotekote mimboone mi bôt be nji be benyoñe ngabe ya nta’ane mam ôte. Ve da, bone b’Israël béziñ ba te tibili abemba mintômba mi Zambe. Nde Yésus a jô na: “Me abele fo’o ane me ajô mia na, Môt a bo te nyin mbé abemba mintômba, ve bete zene fe, môt ate a ne ñwuwup a mvô. Ve môt a nyin mbé, nnye a ne mba’ale mintômba.”​—Jean 10:1, 2.

Éyoñe bôte ba wô’ô bifia bite, ba yiane simesane bôte be nga jô na be ne Messie, nge na Krist. Balé be ne ane miñwuwup, a mimvômvôl. Be nji yiane tôñ aval bôt ete. Ba yiane tôñe “mba’ale mintômba” Yésus a jô nye na:

“Môt a nonô mbé a diine nye wô, a mintômba mia yeme tyiñ jé, a loone fe mintômba mié biyôlé biab a kulu mie atan. Éyoñ a maneya kulu mintômba mié mise e nseñ, a téé ñhe dulu a ke tebe ôsu, mintômba mi nga tôñe nye, amu mia yeme nye tyiñ. Ve nneñe ki, mintômba mi se ngul ya ye’e tôñe nye, mia ye viane tube nye a ke ôyab, amu mi nji yeme tyiñ beyeñ.”​—Jean 10:3-5, Mfefé Nkôñelan.

Ôbe nté mvus, Jean Baptiste, aval ane ñyoé mbé, a nga liti Yésus ane nyô mintômba mia yiane tôñ. A mintômba miziñe ya Galilée a mi ya Judée va, mi yemelaneya tyiñe Yésus. Abui ya ba ba wô’ô éve’an éte da sili bebiene na: nne a ye ke mie vé? A jé nje mia ye bi nge mia tôñe nye? Ba sili nalé amu “be nji wô’ô mejô a jô be.”​—Jean 10:6.

Yésus a timine mejô mé a jô’ô na: “Bebela, bebela fo’o, ma kate mia na ma me ne mbé mintômba. E bôte bese be nga zu me ôsu be ne miñwuwub a beze mimfaka, ajô te mintômba mi nga bo te vô’ôlô be. Ma me ne mbé, nge môt éziñ a nyiin e be ma a ye bi ényiñ, a ye nyiin a kui fe nseñ, a yene fe bidi ya di.”​—Jean 10:7-9, Mfefé Nkôñelan.

Yésus a ve fo’o mfefé ñye’elane valé. Ba ba vô’ôlô nye ba yeme na a nji bo mbé ya élate ya Atiñ, ñwô ôte ô tabeya den a nto mintete mimbu. Nde, a yiane kobô ajô abemba afe, vôme mintômba a ‘kuli nseñ’ mia ke nyiin. Jé nje mia ye ñhe bi?

Yésus a timin ésaé jé a jô’ô na: “Ma me nga zu, nalé ate mintômba mi aye yen ényiñ, a yene je abui. Ma me ne mbamba mba’ale mintômba: mbamba mba’ale a ve ényiñe jé amu mintômba.” (Jean 10:10, 11) Yésus a nga taté ve beyé’é bé ngule nyul a jô’ô na: “Mia mon nsamba mintômba, te koane woñ; amu Éso wônan a nye’e a va’a mia [éjôé jé].” (Luc 12:32) Nalé ate a liti na, ba be ne “mon nsamba mintômba” mbe ba ye bo ba Yésus a ye ke be mfefé abemba, asu na be “yen ényiñ, a yene je abui.” E bo ébu’a ya mbame te a ne fo’o beta ébotan!

Ve da, Yésus a nji mane ñye’elan valé. A jô na: “Me bili fe mintômba mife, mi nji bo abemba dina été. Ma yiane fe ke ma nyeñele mie, mia ye wô’ô tyiñe jam, éyoñe te mia ye bo mbame wua,  mba’ale fe ve wua.” (Jean 10:16, Mfefé Nkôñelan) “Mintômba mife” mina mi “nji bo abemba dina été”. Ajô te, ba yiane bo abemba afe, é sela’ane a “mone abemba” nnye a ye nyoñ Éjôé. Mimbame mite mibaé, nge na mebemba mintômba, mi nji bi ndi nleme jia. Ve da, mimbame mintômba mite mibaé mia ye bu’ubane ésaé Yésus. Ane a jô na: “Ajô te Esaa wom a nye’e ma, amu ma ve ényiñe jam.”​—Jean 10:17, Mfefé Nkôñelan.

Abui bôte da kam a jô na: “A bili mbia nsisim, e nde fe a nga so’ akut.” Ve bevo’o ba liti na ba nye’e mame ba wôk, a be bili nkômbane ya tôñe mbamba mba’ale. A ba jô na: “Mejô ma me nji bo mejô me môt a bili mbia nsisim; ye mbia nsisim a ne ngule ya bo na mise mindindim me yombô?” (Jean 10:20, 21, Mfefé Nkôñelan) Éko éziñ ba yiane jôô môt a nga bialé ndim Yésus a nga saé.