Kapitulo 17

Unsay Angay Nakong Mahibaloan Bahin sa Panaghigalaay Diha sa Eskuylahan?

“Usahay makakita kog grupo sa mga batan-on ug makaingon, ‘Nindota nila oy, suod kaayo sila. Maayo untag duna sab koy mga higala nga sama nila.’”​—Joe.

“Wala ko maglisod sa pagpakighigala diha sa eskuylahan. Sayon ra ni para nako. Apan nahimo na hinuon ni nako nga problema.”​—Maria.

 ANG tanan nagkinahanglag mga higala​—mga tawo nga ilang makauban sa maayong mga panahon ug kadangpan usab sa malisod nga mga panahon. Si Jesus dunay mga higala, ug nalipay siya sa pagpakig-uban kanila. (Juan 15:15) Sa dihang siya himalatyon na diha sa estaka sa pagsakit, si Jesus giunongan sa iyang suod nga higalang si Juan, ang “tinun-an nga iyang gihigugma.” (Juan 19:25-27; 21:20) Nagkinahanglan kag mga higala nga sama niana​—mga tawo nga mounong kanimo sa kalipay ug kasakit!

Tingali may mga higala ka na nga sama niana diha sa eskuylahan​—usa o duha sa imong mga klasmet nga suod nimo. Parehas kamog mga hilig ug malingaw kamo nga mag-estoryahanay. Para nimo dili sila maisip nga ‘daotang kauban.’ (1 Corinto 15:33) “Halos adlaw-adlaw nimo silang makita,” matod ni Anne. “Busa komportable kang makig-uban nila. Dili sama sa imong mga igsoon sa kongregasyon nga usahay kinahanglan ka pang magbantay sa imong lihok. Apan sa eskuylahan dili na.” Dugang pa, parehas tingali ang imong panglantaw kang Lois, kinsa miingon, “Gusto ko nga makita sa akong mga higala sa eskuylahan nga normal ang mga Saksi ni Jehova.” Maayo ba kini nga katarongan sa pagpakigsuod kanila?

Nganong Angay Kang Magbantay?

Tagda ang nahitabo kang Maria nga gihisgotan sa sinugdan. Tungod kay bibo siyag kinaiya, dali kaayo siya makakitag mga higala apan naglibog siya kon kinsay angay ug dili  angayng suoron. “Nalipay ko nga daghan ang ganahan nako, babaye man o lalaki,” siya miadmitir. “Apan nagkaproblema ko kay nagkaunlod ako niining kalibotana.” Ingon usab niini ang nahitabo kang Lois. “Natakdan ko sa tinamdan sa ubang mga batan-on,” siya miingon. “Parehas na kog tinamdan nila.”

Dili kini katingad-an. Gani, aron makapabiling suod nga managhigala, kinahanglang parehas mog mga interes ug mga prinsipyo. Kon makigsuod ka sa mga tawo nga dili sama nimog tinuohan ug mga sukdanan, seguradong maimpluwensiyahan ka nila. (Proverbio 13:20) Dunay maayong katarongan kon nganong si apostol Pablo misulat: “Ayaw pagpayugo nga dili timbang sa mga dili-magtutuo.”​—2 Corinto 6:14.

Kon Unsay Imong Himoon

Ang tambag ni Pablo nagpasabot ba nga kinahanglan nimong likayan ang imong mga klasmet ug dili ka na managad kanila? Dili! Ang mga Kristohanon kinahanglang mahibalo kon unsaon pagpakigsulti sa mga tawo nga lainlaig rasa, relihiyon, ug kultura aron matuman ang sugo sa “paghimog mga tinun-an sa katawhan sa tanang kanasoran.”​—Mateo 28:19.

Si apostol Pablo maayo kaayong panig-ingnan niining bahina. Siya mahibalong makigsulti sa “tanang matang sa katawhan,”  bisag lahi ug tinuohan. (1 Corinto 9:22, 23) Makasundog ka sa panig-ingnan ni Pablo. Magmahigalaon sa imong mga isigkabatan-on. Pagtuon sa pagpakigsultig maayo kanila. Apan ayaw sundoga ang sinultihan ug paggawi sa imong mga klasmet. Hinunoa, matinahorong isulti kanila kon nganong nagsubay ka sa mga sukdanan sa Bibliya.​—2 Timoteo 2:25.

Tinuod, makita nila nga lahi ka, ug dili kini tiaw. (Juan 15:19) Apan nganong dili nimo tan-awon ang kahimtang niining paagiha? Kon anaa ka sa bote ug gilibotan sa mga tawo nga nagpunga-punga diha sa tubig, unsay imong himoon sa pagtabang nila​—moambak ka ba sa tubig? Siyempre dili!

Sa susamang paagi, sa eskuylahan gilibotan kag mga tawo nga walay panalipod ni Jehova, ug kini nga panalipod  matagamtam lang niadtong iyang mga higala. (Salmo 121:2-8) Kon imong isalikway ang mga sukdanan ni Jehova aron masuod ka sa imong mga klasmet, imong gipameligro ang imong relasyon sa Diyos ug ang imong kalipay. (Efeso 4:14, 15; Santiago 4:4) Mas maayong imong tabangan ang imong mga klasmet sa pagsaka sa bote, ingnon ta, pinaagi sa pagtudlo kanila kon unsaon pag-alagad kang Jehova. Sa pagkatinuod, aduna pa bay mas maayong paagi sa pagpamatuod nga tinuod ka nga higala?

TEKSTO

“Gihimo ko ang tanang butang tungod sa maayong balita, aron ako mahimong mag-aambit niini sa uban.”​—1 Corinto 9:23.

SUGYOT

Kon ang uban nimong klasmet interesadong mahibalo sa imong tinuohan, hatagi sab silag higayon sa pagpahayag sa ilang opinyon. Paminaw ug maayo kanila. Sa dihang mosulti ka, sulti sa malumo ug matinahorong paagi.​—1 Pedro 3:15.

NAHIBALO KA BA . . . ?

Daghang alagad sa Diyos karon nakakat-on sa Bibliya gikan sa usa ka klasmet nga maisogong misulti bahin sa iyang pagtuo.

ANG AKONG PLANONG HIMOON!

Kini ang akong himoon kon sa akong tan-aw suod na kaayo ko sa akong klasmet ․․․․․

Kini ang akong himoon kon biaybiayon ko sa akong eskolmet tungod sa akong tinuohan ․․․․․

Kon unsay akong gustong ipangutana sa akong ginikanan bahin niini ․․․․․

UNSAY IMONG HUNAHUNA?

● Sa imong hunahuna nganong morag mas sayon man mangitag higala sa eskuylahan kay sa Kristohanong kongregasyon?

● Nganong delikadong maglingaw-lingaw human sa klase uban sa klasmet nga dili magtutuo?

● Unsay mga kaayohan kon magpaila ka sa imong mga klasmet nga Saksi ni Jehova ka?

[Blurb sa panid 143]

“Ang akong batasan kaniadto walay kalainan sa ubang mga batan-on sa among eskuylahan, busa wala ko maglisod sa pagpakighigala. Apan nakakat-on kog leksiyon sa akong mga kasaypanan. Karon may mga higala na ko sa kongregasyon​—mga higala nga akong kasaligan.”​—Daniel

[Hulagway sa panid 146]

Unsa ang labing maayong paagi sa pagtabang sa tawong hapit nang malumos​—pinaagi ba sa pag-ambak sa tubig o pinaagi sa pag-itsa kaniyag salbabida?