Pahinumdom sa mga Ginikanan

Para sa mga batan-on, ang pagtubo kaamgid sa paglatay sa pisi nga latayan sa sirkador. Ang matag tikang daw walay kasegurohan ug kuyaw pa. Kay ginikanan, mangandoy ka nga unta dili moagi ug ingon niini ang imong mga anak. Siyempre imposible kini, apan mahimo ka nga ilang igpanimbang nga tukon. Ikaw ang makatabang sa imong mga anak aron sila dili masaag ug aron mahimo silang responsableng mga hamtong.

Sayon bang isulti apan lisod buhaton? Oo. Morag dili pa lang dugay nga ang imong anak nga lalaki maoy lihokan nga gamayng bata nga nagkayuring lang; apan karon siya hilomon na nga tin-edyer nga dili gustong makigsulti kanimo. Dili pa dugay nga ang imong anak nga babaye nagsige lag sunod-sunod nimo; apan karon daw maulaw na siyang makig-ubag panuroy sa iyang ginikanan!

Bisan pa niana, ayaw paghunahuna nga wala kay ikasarang sa pagsagubang niini nga mga kausaban. Dunay tuboran sa kaalam nga makahatag ug kasaligang giya kanimo ug sa imong anak. Kana nga tuboran sa kaalam mao ang Pulong sa Diyos, ang Bibliya.

Kining maong libro, Mga Pangutanang Gisukna sa mga Batan-on​—Mga Tubag nga Mosaler, Tomo 2, gidisenyo sa paghatag sa imong anak ug giya nga pinasukad sa Kasulatan. Kon imong tan-awon ang Kaundan diha sa panid 4 ug 5 imong makita nga naghisgot kinig daghang topiko. Apan duna pay laing bahin nga gipresentar niining libroha. Tagda kini:

(1) Kining libroha magpalihok sa mga magbabasa sa pagpakigbahin. Ang imong anak giagda sa pagsulat sa iyang hunahuna ug sa iyang tubag sa mga pangutana. Pananglitan, ang seksiyon nga “Kon Unsay Himoon Kon Pit-oson” diha sa mga panid 132 ug 133 magpahunahuna sa imong anak kon unsay iyang mga problema ug kon unsaon kini pagsulbad. Dugang pa, sa kataposan sa matag usa sa siyam ka seksiyon  niining libroha may panid nga nag-ulohang “Akong Notahanan,” diin ang imong anak makasulat sa iyang hunahuna ug pagbati bahin sa impormasyon nga gihisgotan nianang seksiyona.

(2) Kining libroha nagtudlo kon unsaon pagpakig-estorya. Pananglitan, ang kahon sa panid 63 ug 64 naghisgot bahin sa “Unsaon Nako Pagpakigsulti Kang Papa o Kang Mama Bahin sa Sekso?” Dugang pa, sa kataposan sa matag kapitulo dunay kahon nga nag-ulohang “Unsay Imong Hunahuna?” Kini dili lang magamit sa pagrepaso, kondili mahimo usab kining hisgotan sa pamilya. Lain pa, ang matag kapitulo dunay “Ang Akong Planong Himoon!” nga sa kataposang bahin giagda ang batan-on sa pagkompleto niining mga pulonga: “Kon unsay akong gustong ipangutana sa akong ginikanan bahin niini . . .” Kini makadasig sa mga batan-on sa pagpangayog mapuslanong tambag sa ilang mga ginikanan sa ilang pagsagubang sa malisod nga panahon sa pagkabatan-on.

Aniay tambag: Aron madasig ang imong mga anak sa pagsulat diha sa ilang libro nga walay lipodlipod, hatagi silag pribasiya. Sa ngadto-ngadto dili na sila magpanuko sa pagpakigsulti kanimo bahin sa ilang gipanulat.

Pagbaton ug imong kaugalingong kopya niining libroha, ug basaha kinig maayo. Sa magbasa ka, hunahunaa ang mga problema, ang kalibog, ug ang kabalaka nga imong naagian usab sa batan-on ka pa. Kon nahiangay, suginli usab sila bahin sa imong kinabuhi. Nianang paagiha madasig usab ang imong mga anak sa pagpakigsulti kanimo. Kon sila makigsulti, pamati! Kon dili pa gani kini molampos, ayawg surender. Bisan pag sa tan-aw nimo gipalapos lang nila sa dalunggan ang imong tambag, mas pabilhan sa mga batan-on ang tambag sa ilang ginikanan kay sa ilang mga higala.

Malipayon kami sa pagtagana kaninyo ug sa inyong mga anak niining gipasukad sa Bibliya nga libro, ug nanghinaot kami nga makabenepisyo kini sa inyong pamilya.

Ang mga Magpapatik