ANG TAWO TALAGSAON KAAYO​—KITA MAKASULAT, MAKADROWING, MAKAMUGNA, UG MAKAPAMALANDONG SA IMPORTANTENG MGA PANGUTANA BAHIN SA KINABUHI: Nganong naglungtad ang uniberso? Asa ta gikan? Unsay katuyoan sa kinabuhi? Unsay mahitabo sa umaabot?

Ang ubang tawo dili interesado nianang mga pangutanaha kay nagtuo sila nga lisod kaayo nang tubagon. Ang uban nag-ingon sab nga kana nga mga pangutana walay kapuslanan kay ang kinabuhi maoy resulta lang sa ebolusyon. “Walay diyos, walay katuyoan,” matod pa sa propesor sa history ug biology nga si William Provine. Siya midugang: “Walay basehanan sa husto ug sayop, ug walay kahulogan ang kinabuhi.”

Pero para sa uban, sayop kana nga panglantaw. Ilang nakita nga ang uniberso dunay gisubayng espesipiko, maayong pagkadisenyo nga siyentipikanhong mga balaod. Mibilib sila sa talagsaong mga disenyo sa kinaiyahan, nga gikopya pa gani ang pipila niini dihang mag-imbentog mga produkto. Ug ilang nasabtan base sa ilang adlaw-adlawng kalihokan nga ang maong komplikadong mga disenyo nagpamatuod nga dunay usa ka intelihenteng tigdisenyo.

Kana nga pangatarongan nakapukaw sa ubang ebolusyonista sa pagsusi pag-usab sa ilang baroganan. Tagda ang duha ka pananglitan.

DR. ALEXEI MARNOV, USA KA NEUROSURGEON. “Gitudlo sa among eskuylahan ang ateyismo ug ebolusyon,” siya miingon. “Ang tanang motuo ug Diyos giisip nga ignorante.” Pero sa 1990, ang iyang panglantaw nausab.

“Gusto nakong masabtan ang rason kon nganong naglungtad ang mga butang,” siya miingon, “lakip na ang utok sa tawo. Kining katingalahang organo tukmang gitawag nga labing komplikadong butang sa uniberso. Pero ang utok ba gidisenyo aron lang mokuhag kahibalo, mokat-og kahanas, ug dayon mamatay? Daw dili kini rasonable. Busa nakapangutana ko: ‘Nganong naa ta sa kalibotan? Unsay katuyoan sa kinabuhi?’ Human nako ni mapamalandong, nakaingon ko nga duna gyoy Maglalalang.”

Ang pagpangita ni Alexei sa katuyoan sa kinabuhi nakadasig niya sa pagtuon sa Bibliya. Dayon, ang iyang asawa nga doktor ug ateyista sama niya, nagtuon sab ug Bibliya​—sa sugod, aron pamatud-an nga sayop ang iyang bana! Apan karon, nagtuo na sila nga duna gyoy Diyos ug nakasabot sa Iyang katuyoan para sa tawo sumala sa giingon sa Bibliya.

DR. HUABI YIN, USA KA PLASMA SCIENTIST. Si Huabi Yin nagtuon ug physics, ug daghang tuig siyang nag-research bahin sa plasma, nga giisip nga ikaupat nga state of matter. Ang plasma (sama nianang anaa sa adlaw) gilangkoban ug mga electron ug positive ion.

“Dihang kaming mga siyentista magtuon bahin sa kinaiyanhong mga panghitabo,” matod ni Huabi, “among makita nga kini maayo kaayong pagkaorganisar, nga resulta sa espesipiko o eksakto kaayong mga balaod. ‘Sa unsang paagi mitungha kini nga mga balaod?’ nakapangutana ko. ‘Kon ang simpleng kalayo gani kinahanglang kontrolahon dihang magluto, kinsay naghimo sa mga balaod nga nagkontrolar sa adlaw?’ Sa ulahi, nakaingon ko nga ang labing rasonable nga tubag niana mao ang unang mga pulong sa Bibliya: ‘Sa sinugdan gilalang sa Diyos ang mga langit ug ang yuta.’”​—Genesis 1:1.

Ang siyensiya naghatag ug tubag sa daghang pangutana sama sa: Sa unsang paagi nag-obra ang mga selula sa utok? Sa unsang paagi nakapatunghag kainit ug kahayag ang adlaw? Pero ingon sa nasayran ni Alexei ug Huabi, ang Bibliya naghatag ug tubag sa mas importanteng mga pangutana sama sa: Nganong naglungtad ang uniberso? Nganong nagsunod kinig mga balaod? Nganong nabuhi ta sa kalibotan?

Kon bahin sa yuta, ang Bibliya nag-ingon: “[Ang Diyos] wala maglalang niini sa wala lamay kapuslanan, nga nag-umol niini aron pagapuy-an.” (Isaias 45:18) Oo, dunay katuyoan ang Diyos alang sa yuta, ug kini nga katuyoan nalangkit sa atong paglaom sa umaabot, nga hisgotan sa sunod nga artikulo.