1. Unsay kasagarang gikahadlokan sa mga tawo?

 KONSIDERAHA ang mosunod nga mga kahimtang. Si Nestor ug ang iyang asawa nga si María gustong moalagad sa lugar nga mas dakog panginahanglan. * Aron mahimo nâ, kinahanglan silang magpasimple. Pero nabalaka sila nga basin dili sila magmalipayon kon gamay na lang silag kuwarta. Dihang na-Saksi si Biniam sa nasod nga gisupak ang atong buluhaton, nahibalo siya nga puwede siyang lutoson. Nahadlok siya, pero mas nahadlok siya sa reaksiyon sa iyang pamilya kon mahibaloan nila nga nagbag-o siyag relihiyon. Si Valérie nadayagnos nga naay grabeng klase sa kanser, ug naglisod siyag pangitag doktor nga motahod sa iyang baroganan bahin sa dugo. Siyempre, nahadlok siyang mamatay.

2. Nganong maningkamot ta nga dili magpadaog sa atong mga kahadlok?

² Mibati ba ka sukad ug ingon ana nga kahadlok? Daghan nato ang mibati ana. Kon magpadaog ta sa atong mga kahadlok, basin makahimo tag dili maayong mga desisyon nga makadaot sa atong relasyon kang Jehova. Mao nay gusto ni Satanas. Pahimuslan pod niya ang atong mga kahadlok aron supakon nato ang mga balaod ni Jehova, apil ang sugo nga isangyaw ang maayong balita. (Pin. 12:17) Si Satanas daotan, mangtas, ug gamhanan. Pero naay makatabang nimo aron dili ka niya madaog. Unsa man?

3. Unsay makatabang nato aron madaog ang atong mga kahadlok?

³ Kon kombinsido ta nga gihigugma ta ni Jehova ug siya  dapig nato, madaog nato si Satanas. (Sal. 118:6) Pananglitan, ang magsusulat sa Salmo 118 nakaatubang ug lisod kaayong mga kahimtang. Daghan ang nakig-away niya, ug ang uban nila tag-as ug posisyon (bersikulo 9, 10). Dihay mga panahon nga na-stress kaayo siya (bersikulo 13). Nakadawat pod siyag bug-at nga disiplina gikan kang Jehova (bersikulo 18). Bisan pa ana, ang salmista miawit: “Dili ko mahadlok.” Nganong mibati siya ana? Nahibalo siya nga bisag gidisiplina siya ni Jehova, gihigugma siya pag-ayo sa iyang langitnong Amahan. Kombinsido ang salmista nga bisan unsa pay iyang maatubang, ang iyang mahigugmaong Diyos motabang gyod niya.—Sal. 118:29.

4. Unsa nga mga kahadlok ang atong madaog kon kombinsido ta nga gihigugma ta sa Diyos?

⁴ Kinahanglang kombinsido ta nga gihigugma ta ni Jehova. Makatabang nâ nato nga madaog ang tulo ka komon nga kahadlok, (1) kahadlok nga dili ta makatagana sa atong pamilya, (2) kahadlok sa tawo, ug (3) kahadlok nga mamatay. Ang mga igsoon nga gihisgotan sa unang parapo milampos sa pagdaog sa ilang mga kahadlok kay kombinsido sila sa gugma sa Diyos.

5. Unsa tingali ang makapabalaka pag-ayo sa ulo sa pamilya? (Tan-awa ang hulagway sa atubangan sa magasin.)

⁵ Ang Kristohanong ulo sa pamilya nag-isip nga seryosong responsibilidad ang pag-atiman sa materyal nga panginahanglan sa iyang pamilya. (1 Tim. 5:8) Kon ulo ka sa pamilya, tingali nabalaka ka nga mawad-ag trabaho panahon sa pandemic. Tingali nabalaka ka nga dili nimo mapakaon ang imong pamilya ug dili ka kabayad sa abang sa inyong balay. Basig nahadlok pod ka nga kon mawad-an kag trabaho, dili na ka makakitag laing trabaho. O sama kang Nestor ug María nga gihisgotan ganina, basig naghunahuna ka nga magkalisod mo kon magpasimple mo sa inyong kinabuhi. Daghan nag napahunong si Satanas sa pag-alagad kang Jehova tungod sa maong mga kahadlok.

6. Unsay gusto ni Satanas nga hunahunaon nato?

⁶ Gusto ni Satanas nga patuohon ta nga si Jehova wala mahigugma nato ug dili siya motabang nato sa pagtagana para sa atong pamilya. Tungod ana, basig maghunahuna ta nga kinahanglan natong himoon ang tanan, bisan ang pagsupak sa mga prinsipyo sa Bibliya, aron lang dili mawad-ag trabaho.

7. Unsay gipasalig ni Jesus kanato?

⁷ Si Jesus nakaila pag-ayo sa Amahan, ug gipasaligan ta niya nga ang atong Diyos “nahibalo na sa [atong] gikinahanglan sa wala pa [ta] mangayo kaniya.” (Mat. 6:8) Ug nahibalo si Jesus nga si Jehova motagana gyod sa atong panginahanglan. Ingong mga Kristohanon, sakop ta sa panimalay sa Diyos. Makaseguro ta nga ingong Ulo sa pamilya, sundon gyod ni Jehova ang prinsipyo nga iyang gipasulat diha sa 1 Timoteo 5:8.

8. (a) Unsay makatabang aron madaog nato ang kahadlok nga dili ta makatagana sa atong pamilya? (Mateo 6:31-33) (b) Base sa hulagway, unsaon nato pagsundog ang magtiayon nga mihatag ug pagkaon sa usa ka sister?

⁸ Kon kombinsido ta nga gihigugma ta ni Jehova ug ang atong pamilya, dili ta magduhaduha nga matagan-an ta sa atong panginahanglan. (Basaha ang Mateo 6:31-33.) Gusto ni Jehova nga tagan-an ta. Siya mahigugmaon ug mahinatagon kaayo. Dihang gilalang niya ang yuta, dili lang ang atong pangunang panginahanglan ang iyang gihatag. Tungod sa iyang gugma, gipuno niya ang  yuta sa mga butang nga makapalipay nato. (Gen. 2:9) Bisan pag usahay, igoigo lang ang atong nabatonan, maayong hunahunaon nga natagan-an ang atong panginahanglan. Wa gyod mosipyat si Jehova sa pagtagana nato. (Mat. 6:11) Angay natong hinumdoman nga bisan unsay atong isakripisyo karon, wala ra nâ sa kumingking sa ihatag kanato sa atong mahigugmaong Diyos, karon ug sa umaabot. Mao nay naeksperyensiyahan ni Nestor ug María.​—Isa. 65:21, 22.

9. Unsay imong makat-onan kang Nestor ug María?

⁹ Si Nestor ug María hayahay ug kinabuhi sa Colombia. Sila miingon: “Gusto namong magpasimple sa among kinabuhi ug magpauswag sa among ministeryo. Pero nahadlok mi nga basig dili mi magmalipayon kon gamay ra mig kuwarta.” Unsay nakatabang nila nga madaog ang ilang kahadlok? Ilang gipamalandong kon giunsa pagpakita ni Jehova ang iyang gugma kanila sa daghang paagi. Kay kombinsido sila nga atimanon gyod sila ni Jehova, miresayn sila sa ilang trabaho nga dakog suweldo. Gibaligya nila ang ilang balay, ug mibalhin sila sa laing lugar sa ilang nasod nga may dakong panginahanglan sa magsasangyaw. Unsay ilang gibati sa ilang desisyon? Si Nestor miingon: “Tinuod gyod ang giingon sa Mateo 6:33. Wa gyod mi makulangi sa bisan unsa. Ug mas malipayon mi karon.”

10. Nganong mahadlok ang mga tawo sa ubang tawo?

¹⁰ Sukad pa sa una, ang mga tawo naghimog kadaot sa uban. (Eccl. 8:9) Pananglitan, ang mga tawo mag-abuso sa ilang awtoridad, ang mga kriminal mohimog daotan, ang mga bully sa eskuwelahan manginsulto ug manghadlok sa ilang mga classmate, ug ang ubang tawo magmaltratar sa ilang pamilya. Mao diay nga mahadlok ang mga tawo sa ubang tawo! Sa unsang paagi gipahimuslan ni Satanas ang atong kahadlok sa tawo?

11-12. Giunsa paggamit ni Satanas ang atong kahadlok sa tawo?

¹¹ Gamiton ni Satanas ang atong kahadlok sa tawo aron mapugos ta nga mokompromiso ug moundang sa pagsangyaw. Giimpluwensiyahan ni Satanas ang mga gobyerno aron idili ang atong buluhaton ug lutoson ta. (Luc. 21:12; Pin. 2:10) Sa kalibotan ni Satanas, daghang tawo ang nagpakaylap ug dili tinuod ug makadaot nga impormasyon bahin sa mga Saksi ni Jehova. Tungod niini, yagayagaan  ta o dagmalan pa gani. (Mat. 10:36) Angay ba tang matingala sa mga paagi ni Satanas? Dili. Iya na nang gihimo sa unang siglo!​—Buh. 5:27, 28, 40.

¹² Ang kahadlok nga supakon sa gobyerno dili ra maoy gigamit ni Satanas. Ang uban mas mahadlok sa reaksiyon sa ilang pamilya kon ma-Saksi sila kay sa kulatahon sila. Gimahal nila pag-ayo ang ilang mga paryente, ug gusto nila nga sila makaila ug mahigugma pod kang Jehova. Maguol sila dihang madungog nila nga ang ilang mga paryente mosultig dili maayo bahin sa matuod nga Diyos ug sa iyang mga magsisimba. Hinuon, naay mga higayon nga ang mga paryente nga supak sa primero na-Saksi ra sa ulahi. Pero ibutang nato nga isalikway ta sa atong pamilya tungod sa atong bag-ong tinuohan. Unsa may atong reaksiyon?

13. Kon kombinsido ta nga gimahal ta sa Diyos, sa unsang paagi ni makatabang dihang isalikway ta sa atong pamilya? (Salmo 27:10)

¹³ Mahupay ta sa makapadasig nga kamatuoran nga narekord sa Salmo 27:10. (Basaha.) Dihang atong hinumdoman nga gimahal ta pag-ayo ni Jehova, dili ta mahadlok sa mahitabo bisag isalikway ta sa atong pamilya. Ug makasalig ta nga gantihan ta niya sa atong paglahutay. Wala gyoy makalabaw kang Jehova sa pagtagana sa atong pisikal, emosyonal, ug espirituwal nga panginahanglan! Mao nay naeksperyensiyahan ni Biniam, nga gihisgotan ganiha.

14. Unsay imong makat-onan kang Biniam?

¹⁴ Si Biniam midesisyon nga mahimong Saksi ni Jehova bisag nahibalo siya nga makaatubang siyag grabeng paglutos. Konsideraha kon sa unsang paagi ang pagkahibalo ni Biniam nga gihigugma siya ni Jehova nakatabang niya nga dili mahadlok sa tawo. Siya miingon: “Grabe gyod diay ang paglutos. Pero mas nahadlok ko sa pagsupak sa akong pamilya kay sa paglutos sa gobyerno. Nahadlok ko nga tungod sa akong desisyon nga moalagad kang Jehova, madismaya ang akong papa nga dili Saksi ug ubos na unyag panglantaw nako ang akong pamilya.” Pero kombinsido si Biniam nga atimanon gyod ni Jehova kadtong Iyang gihigugma. Siya miingon: “Namalandong ko kon giunsa pagtabang ni Jehova ang uban nga makalahutay sa kalisod sa pinansiyal, diskriminasyon, ug pag-atake sa bayolenteng mga tawo. Kabalo ko nga kon mounong ko kang Jehova, panalanginan ko niya.  Kapila ko dakpa, ug gi-torture pa gani ko. Pero naeksperyensiyahan nako mismo nga tabangan gyod ta ni Jehova panahon sa kalisdanan kon magmatinumanon ta.” Si Jehova nahimo gyong Amahan kang Biniam, ug ang Iyang katawhan nahimo gyod niyang pamilya.

15. Nganong normal lang nga mahadlok tang mamatay?

¹⁵ Giila sa Bibliya nga ang kamatayon maoy kaaway. (1 Cor. 15:25, 26) Dihang maghunahuna tag kamatayon, tingali mabalaka ta, ilabina kon kita o ang atong mga minahal naay grabeng sakit. Nganong mahadlok tang mamatay? Kay dihang gilalang ta ni Jehova, gibutang niya sa atong kasingkasing ang tinguha nga mabuhi sa walay kataposan. (Eccl. 3:11) Ang kahadlok nga mamatay makatabang nga ampingan nato ang atong kinabuhi. Pananglitan, magpalihok ni nato nga mokaon ug sustansiyadong pagkaon, mag-exercise, magpadoktor, motomar ug tambal, ug maglikay nga ipameligro ang atong kinabuhi sa walay kapuslanan.

16. Sa unsang paagi pahimuslan ni Satanas ang atong kahadlok nga mamatay?

¹⁶ Si Satanas nahibalo nga importante nato ang atong kinabuhi. Pero miingon siya nga ibaylo nato ang tanan​—bisan ang atong relasyon kang Jehova—​aron lang di ta mawad-an sa atong kinabuhi. (Job 2:4, 5) Sayop gyod si Satanas! Pero kay siya man ang “may gahom sa pagpahinabog kamatayon,” iyang pahimuslan ang atong kahadlok nga mamatay aron biyaan nato si Jehova. (Heb. 2:14, 15) Usahay, ang mga tawo nga naimpluwensiyahan ni Satanas mamahad nga patyon nila ang mga alagad ni Jehova kon dili nila talikdan ang ilang pagtuo. Usahay pod, pahimuslan ni Satanas ang mga medical emergency aron mokompromiso ta. Presyuron tingali ta sa mga doktor o sa dili Saksing mga membro sa pamilya nga magpaabonog dugo, nga supak sa balaod sa Diyos. O kaha basin naay mangombinsir nato nga sulayan ang laing paagi sa pagtambal nga supak sa mga prinsipyo sa Bibliya.

17. Base sa Roma 8:37-39, nganong dili ta angayng mahadlok nga mamatay?

¹⁷ Dili ta gustong mamatay, pero nahibalo ta nga si Jehova dili mohunong sa paghigugma nato kon mawad-an ta sa atong kinabuhi. (Basaha ang Roma 8:37-39.) Dihang mamatay ang mga higala ni Jehova, iya gihapon silang hinumdoman. Naa sila sa iyang hunahuna, nga mora bag buhi gihapon sila. (Luc. 20:37, 38) Nangandoy siya sa panahon nga banhawon na niya sila. (Job 14:15) Dako kaayog gibayad si Jehova aron ‘makabaton tag kinabuhing walay kataposan.’ (Juan 3:16) Nahibalo ta nga gimahal ug gipangga kaayo ta ni Jehova. Busa imbes talikdan nato si Jehova dihang masakit ta o baharan nga patyon, moduol hinuon ta niya para sa kahupayan, kaalam, ug kusog. Mao nay gihimo ni Valérie ug sa iyang bana.​—Sal. 41:3.

18. Unsay imong makat-onan kang Valérie?

¹⁸ Adtong 35 anyos si Valérie, nadayagnos siya nga naay grabe kaayo nga kanser. Konsideraha kon sa unsang paagi ang gugma nakatabang nga madaog niya ang kahadlok nga mamatay. Siya miingon: “Pagkahibalo nako nga naa koy kanser, nakurat kaayo mi sa akong bana. Kinahanglan kong magpaopera. Daghan kog gikonsulta nga doktor, pero dili sila moopera kon dili ko magpaabonog dugo. Nahadlok ko, pero dili gyod ko gustong magpaabonog dugo kay supak ni sa sugo sa Diyos. Sa tibuok nakong kinabuhi,  gipakita ni Jehova nga gimahal ko niya pag-ayo. Karon, higayon na pod nako nga ipakita ang akong pagmahal niya. Sa matag higayon nga sultihan ko sa mga doktor ug dili maayong balita, mas determinado ko nga lipayon si Jehova ug dili gyod magpapildi kang Satanas. Sa ulahi, naoperahan ra gyod ko nga wala abonohig dugo. Bisag naa pa gihapon ang akong sakit, gitagana gyod ni Jehova ang among gikinahanglan. Pananglitan, sa semana una ko madayagnos, among gitun-an sa tigom ang artikulong ‘Atubanga ang mga Kalisdanan Uban ang Kaisog.’ * Kini nga artikulo nakahupay pag-ayo namo. Gibalikbalik namo nig basa. Ang mga artikulo nga sama ani ug ang among maayong rutina sa espirituwal nakahatag namong magtiayon ug kalinaw sa hunahuna ug nakatabang namo nga mahimong balanse ug makahimog maayong mga desisyon.”

19. Unsay hapit nang mahitabo?

¹⁹ Sa tabang ni Jehova, ang mga Kristohanon sa tibuok kalibotan wala magpadaog sa lisod nga mga kahimtang ug milampos sa pagsukol sa Yawa. (1 Ped. 5:8, 9) Mahimo pod nâ nimo. Sa dili madugay, sugoon ni Jehova si Jesus ug ang iyang kaubang mga magmamando “aron gub-on ang mga buhat sa Yawa.” (1 Juan 3:8) Ang mga alagad sa Diyos dinhi sa yuta ‘wala nay kahadlokan ug walay kalisangan.’ (Isa. 54:14; Miq. 4:4) Pero sa pagkakaron, kinahanglan tang maningkamot nga madaog ang atong mga kahadlok.

20. Unsay makatabang nato nga madaog ang atong mga kahadlok?

²⁰ Kinahanglang padayon natong palig-onon ang atong pagsalig nga si Jehova nahigugma ug nanalipod sa iyang mga alagad. Mahimo nato nâ kon atong pamalandongon ug isulti sa uban kon giunsa pagpanalipod ni Jehova ang iyang mga alagad kaniadto. Ug hinumdoman nato kon giunsa ta niya pagtabang dihang nag-atubang tag lisod nga mga situwasyon. Sa tabang ni Jehova, madaog nato ang atong mga kahadlok!​—Sal. 34:4.