Niadtong Enero 2021, gipahibalo sa Nagamandong Lawas ang pag-release sa bag-ong libro para sa pagtuon sa Bibliya, ang Mabuhi Ka Hangtod sa Hangtod! a Unsay imong reaksiyon niana nga pahibalo? Si Matthew, nga taga-Canada, miingon: “Eksayted kaayo ko! Ug nisamot pa ni dihang gipatin-aw sa mga pakigpulong ug video kon nganong gihimo ang libro ug kon nganong epektibo ning gamiton. Naghinamhinam na ko nga makita ug magamit ni nga libro.”

 Bag-o na ang paagi sa pagdumalag mga pagtuon sa Bibliya gamit ang Mabuhi Ka Hangtod sa Hangtod! Pero dili lang kana ang kalainan niining bag-ong libro ug sa mga libro nga gigamit kaniadto sa pag-Bible study. Kon naggamit kag printed nga kopya sa Mabuhi Ka Hangtod sa Hangtod! tingali namatikdan nimo nga lahi nig quality. Aron masayran kon ngano, atong tan-awon kon giunsa paghimo ang libro.

 Mas baga nga papel. Nganong kinahanglan man ni? Ang Mabuhi Ka Hangtod sa Hangtod! naay kapig 600 ka colorful nga mga picture, nga halos 10 ka pilo nga mas daghan kay sa Gitudlo Kanato nga libro! Ang mga panid pod sa libro mas daghan ug blangko nga space—mga parte nga walay text o artwork. Kining duha nakapatungha ug problema: Kon nipis ang papel, maklaro ang mga picture nga naa sa likod sa panid. Aron malikayan ni, gitestingan sa mga igsoon sa International Printing Department (IPD), sa Wallkill, New York, U.S.A., ang upat ka klase sa papel nga gigamit karon sa atong mga printery. Gisusi sa Komite sa Pagpanulat sa Nagamandong Lawas ang matag sampol, ug gipili nila ang dili kaayo sihag nga papel. Mas mahal kinig 16 porsiyento kay sa mga papel nga gigamit sa kadaghanan sa atong mga publikasyon. Pero makatabang ni sa mga Bible study nga mabasa ang matag panid nga dili ra ma-distract sa mga picture nga naa sa likod sa panid.

 Lahi nga klase sa laminate ang gigamit sa cover. Ang cover sa bag-ong libro lahi ug texture kay sa mga cover sa atong ubang libro kay lahi kinig laminate, o protective film. Imbes sinaw nga laminate ang gamiton, matte finish ang gigamit sa bag-ong libro, maong mas makita ang artwork sa cover niini. Ang matte nga laminate makatabang pod aron dili daling madaan ang libro bisag pirme ning gamiton. Pero mas mahal nig lima ka pilo kay sa sinaw nga laminate. Maong nagtinabangay ang pipila ka sangang buhatan aron makakitag mas barato nga matte laminate.

 Nganong mas mahal man nga materyales ang gigamit? Ang brader nga nagtrabaho sa IPD miingon: “Gidahom namo nga gamiton pag-ayo ni nga libro, maong gusto namo nga presentable gihapon ni tan-awon bisag pirme ning gamiton.” Si Eduardo, nga nagtrabaho sa Printery Office sa sangang buhatan sa Brazil, miingon: “Nalipay kaayo mi nga ang organisasyon ni Jehova naggamit ug dekalidad nga materyales aron ang libro maayong tan-awon, lig-on, ug nindot gunitan. Sa laing bahin, nagamit pod sa maayong paagi ang mga donasyon.”

 Gisugdan pag-imprenta ang Mabuhi Ka Hangtod sa Hangtod! niadtong Marso 2021. Panahon ni sa COVID-19 nga pandemic maong naay mga kalisdanan. Kay gi-lockdown ang Bethel, walay mga Bethel commuter nga makatabang sa atong mga printery, ug dili pod makapasulod ug bag-ong mga Bethelite. Tungod ani, ang pipila ka printery kulang ug tawo, ug ang uban temporaryong gisirad-an tungod sa mga restriksiyon sa gobyerno.

 Sa unsang paagi kini nasolusyonan? Dihang maka-operate na ang mga printery, ang mga Bethelite sa ubang department temporaryong gipatabang sa pag-imprenta. “Ang ilang pagsakripisyo ug pagkaandam nga mokat-on ug bag-ong asaynment nakatabang nga molampos ang trabaho,” miingon si Joel, nga nagtrabaho sa IPD.

 Bisan pa sa mga kalisdanan, nakaimprenta na mig minilyong kopya sa Mabuhi Ka Hangtod sa Hangtod! Nagkinahanglan nig daghang klase sa materyales, sama sa mga printing plate, laminate film, papel, ink, ug adhesive. Sa unang lima ka bulan pa lang sa pag-imprenta, kapig $2.3 milyon (U.S.) na ang nagasto sa materyales. Aron makadaginot, giseguro namo nga iimprenta lang ang gidaghanon sa mga libro nga gikinahanglan sa mga kongregasyon.

 Unsay ikasulti sa mga nagdumalag pagtuon sa Bibliya ug sa ilang mga study bahin sa bag-ong libro? Si Paul, brader nga taga-Australia, miingon: “Makalingaw kaayong gamiton ang Mabuhi Ka Hangtod sa Hangtod! maong eksayted kong magdumalag mga pagtuon sa Bibliya. Nindot kaayo ang layout sa libro ug interactive gyod ni. Tin-aw kaayo ang mga impormasyon ug makatandog sa kasingkasing ang mga pangutana. Naa pod ni mga video, picture, chart, ug mga tumong nga puwedeng sulayan sa study. Nindot kaayo ni nga libro, ug nakatabang ni nako nga mapauswag pa ang akong pagpanudlo.”

 Ang Bible study nga taga-United States miingon: “Ganahan kaayo ko aning bag-ong libro. Ang mga artwork nakatabang nako nga masabtan ang pangunang mga punto. Natandog pod ko sa mga video maong gusto nakong ipadapat ang akong nakat-onan.” Kini nga study kaduha magtuon sa usa ka semana ug regular nga nagtambongan sa mga tigom.

 Minilyong kopya pa sa Mabuhi Ka Hangtod sa Hangtod! ang kinahanglang iimprenta sa daghang pinulongan. Gani, sa pagkakaron, giaprobahan sa Nagamandong Lawas ang pag-publish niini nga libro sa 710 ka pinulongan, nga mas daghan ug 340 sa giaprobahan nga pinulongan para sa Gitudlo Kanato nga libro!

 Asa gikan ang kuwarta nga gigasto sa pag-imprenta? Sa mga donasyon sa worldwide work, nga ang kadaghanan gipadala sa donate.dan124.com. Salamat kaayo sa inyong pagkamahinatagon. Ang inyong mga donasyon nakatabang sa paghimog mga publikasyon para niadtong gustong mokat-on bahin kang Jehova ug “mabuhi … hangtod sa hangtod.”—Salmo 22:26.